Jôba 4
4
Fitokiana an’Andriamanitra
1Dia niteny i Elifaza avy any Temàna ka nanao hoe:
2«Raha manandrana hiteny indraimbava izahay, dia sao sosotra ianao amin’izany.
Nefa zovy moa no hahatana ny teniny?
3Indro fa nampianatra olona maro ianao;
nankahery izay niraviravy tanana ianao;
4nampijoro izay nivembena ny teninao,
sy nanampy ny lohalika malemy ianao.
5Kanjo ankehitriny, nony mankaminao ny loza, dia kivy ianao,
nony mba trany ianao izao, dia manary toky kosa!
6Tsy ny fahatahoranao an’Andriamanitra va no fanantenanao?
Tsy ny hadiovan’ny toetrao va no mba tokinao?
7Mba tadidio ange: zovy moa no tsy manan-tsiny mba very?#4,7 Zovy moa no tsy manan-tsiny mba very? Maro ny tsy manan-tsiny, nefa mijaly sy very eto an-tany. - Olo-marina betsaka no tsapain-toetra tamin’ny loza tsy tambo hisaina; na ny martiry, na ny mpaminany, na ny olo-masina rehetra, dia samy vavolombelon’izany avokoa. Koa diso ny hevitra hoe: Rehefa mety ho tsy manan-tsiny dia tsy mba very, eto an-tany.
Taiza ho aizan’izao tontolo izao, no mba naringana ny olo-marina?
8Raha izaho, ny hitako, dia izay miasa heloka,
sy ireo efa mamafy tsy fahamarinana, no mijinja ny vokatr’izany.
9Fa ny fofon’ain’Andriamanitra no aharinganan’ireny,
ny fifofofofon’ny hatezerany no mahalevona ireny.
10Ny fieron’ny liona mbamin’ny feony mikotrokotroka, dia tankina,
ary ny nifin’ny liona tanora dia voatorotoro#4,10 Ny nifin’ny liona... voatorotoro: Ny liona dia manambara ny ratsy fanahy izay tsy maintsy horinganin’ny fahamarinan’Andriamanitra..
11Noho ny tsy fisian-dremby dia maty ny lion-dahy,
ary ny zanaky ny liom-bavy miely patrana.
12Nisy teny misokosoko tonga tamiko
ary ngonongonina malemy no hany ren’ny sofiko tamin’izany.
13Tao amin’ny fahitana manjavozavo alina,
tao anatin’ny fotoana mahasondrian-tory mafy ny olombelona,
14nisy tahotra aman-kovitra nahazo ahy,
ary nanozongozona ny taolako rehetra izany,
15Dia indro nisy fanahy nandalo teo anatrehako,
ka nampitsangam-bolo ny tenako rehetra.
16Nitraka izy, tsy fantatro endrika velively
dia toa matoatoa eo imasoko.
Dia nisy fahanginana aloha, vao nandre feo aho:
17Ho marina va ny olombelona eo anatrehan’Andriamanitra?
Ho madio va ny olona, eo anoloan’ny Mpahary azy?
18Indro fa ny mpanompony aza, tsy itokiany#4,18 Ny mpanompony...tsy itokiany: ny Anjeliny ahitany tsiny: Ny Anjely raha tsy nampian’ny fahasoavan’Andriamanitra dia tsy ho nahavita asa soa, ary tsy maintsy ho nivadika; ary na dia nampiany aza izy ireo, dia nisy niodina taminy ihany, ka nahazo fahotana tokoa.,
ary ny Anjeliny aza, ahitany tsiny:
19ka mainka izay olona monina an-trano fotaka
ary vovoka ny fototra iorenany,
ka hatao manjary vovoka toy ny voan’ny kalalao!
20Hatramin’ny maraina ka hatramin’ny hariva, dia voaringana izy;
ary levona mandrakizay izy, nefa tsy ahoan’ny olona akory.
21Tapaka ny kofehy amin’ny lain’izy ireo#4,21 Tapaka ny kofehy amin’ny lain’izy ireo: Ny lay dia manambara ny vatana; ny kofehy dia manambara ny fanahy: tapaka ny kofehy dia izany no milaza hoe maty ilay olona (jereo 2Pier 1,14).;
Maty alohan’ny fahazoana ny fahendrena izy.
Voafantina amin'izao fotoana izao:
Jôba 4: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.