Jôba 19
19
Herin’ny finoana rehefa ilaozan’Andriamanitra sy ny olombelona.
1Dia niteny i Jôba ka nanao hoe:
2«Mandra-pahoviana no hampahorianareo ny fanahiko,
sy hamizananareo ahy amin’ny teninareo?
3Efa impolo izay no manala baraka ahy ianareo,
sy manevateva ahy tsy amin-kenatra akory.
4Na diso aza aho,
izaho ihany no hihandronan’ny fahadisoako.
5Fa ianareo kosa izay mitsangana hamely ahy#19,5 Mitsangan-kamely ahy: Ny sakaizan’i Jôba mamely azy, satria miampanga azy ho mpanota; ary ny fahotany no lazainy ho antony hampijalian’Andriamanitra azy. Nefa tsy izany velively akory, fa tsy manan-tsiny aho, hoy izy. Fa Andriamanitra sy Mpahary ambony indrindra no mitondra ny zava-boaariny araka ny hevitra tsy takatry ny saintsika, fa tsy misy fetra ny fahendreny.,
ka ny fahafaham-baraka no atombokareo ahy, handresena ahy,
6dia mba fantaro kosa fa Andriamanitra no mampahory ahy,
sy manarona ahy amin’ny fandrika haratony.
7Indro aho mitaraina noho ny fanaovana an-keriny, nefa tsy misy mamaly!
miantso fitsarana ambony, nefa tsy mahazo ny rariny.
8Ny lalako nofefeny, ka tsy afaka handeha aho;
ny sakeli-dalana halehako namelarany haizina.
9Ny voninahitro nendahany tamiko,
ny satroboninahitro nesoriny teo an-dohako.
10Nohadiny manodidina ny ao ambaniko, ka mianjera aho;
nofongorany toy ny hazo ny fanantenako.
11Nirehitra tamiko ny fahatezerany,
ka nataony fitondra fahavalo aho.
12Indray nirohotra ny antoko-miaramilany,
nisava lalana hankanesany atỳ amiko,
dia nanao fahirano ny laiko.
13Ka ny rahalahiko nampanalaviriny ahy;
ny sakaizako mivily miala amiko.
14Ny havako nandao ahy.
Ny olona nifankazatra amiko nanadino ahy.
15Ny mponina ao an-tranoko sy ny ankizy vaviko
manao ahy ho olon-kafa;
16olon-tsy fantatra eo imasony aho.
Miantso ny mpanompoko aho, tsy valiany akory;
voatery hilela-paladia azy amin’ny vavako aho.
17Mahaloiloy ny vadiko ny fofon’aiko,
mifona amin’izay iray tam-po amiko aho.
18Ny ankizy madinika aza, mamingavinga ahy,
nony mba mitsangana aho anaovany kivalavala.
19Ireo tsy nanafenako, dia marikoriko amiko,
ireo nolalaiko mivadika mamely ahy.
20Ny taolako, tafaraikitra amin’ny hoditra ama-nofoko,
ny akanjo-nifiko no hany nentiko nilefa.
21Ianareo sakaizako#19,21 Ianareo sakaizako: Antsoin’i Jôba ho sakaizany izy ireo, na dia mandatsa azy mafy aza, mba hanalefahany ny fony hangorahany azy ahay, sy hilazany teny mora sy mamy aminy. Izy koa tsy manao azy ireo ho fahavalo akory, ary ny tenin’izy ireo dia raisiny amim-panetren-tena. ahay, no mba mamindrà fo,
mamindrà fo amiko,
fa nasian’ny tanan’Andriamanitra aho ity!
22Nahoana no dia manenjika ahy, tahaka an’Andriamanitra koa ianareo,
ka tsy mety ho boboky ny nofoko#19,22 Boboky ny nofoko: Ny mihinana ny nofon’ny olona, dia ny manendrikendrika azy, tahaka ny mamiravira azy amin’ny nify.?
23Adray! raha mba mety ho voasoratra koa ny teniko!
raha mba mety ho vita an-tsoratra ao anatin’ny boky izy!
24raha mba fisokirana vy mbamin’ny firaka
no isokirana azy amin’ny vatolampy ho mandrakizay.
25Fantatro fa velona ny mpamaly ra ho ahy#19,25 Ny mpamaly ra ho ahy: Araka ny fivoasan’ny Rain’ny Eglizy sy ny mpahay Soratra Masina rehetra, dia tsy iza no lazaina amin’ny teny hoe: mpamaly ra, fa i Jesoa Kristy ihany, ny Zanak’Andriamanitra izay hitsara an’izao tontolo izao amin’ny farandro, ka hamaly ny olona samy araka ny antonona azy avy.,
ka hitsangana farany eo ambonin’ny vovoka izy,
26ary amin’izay, dia izao taolako mitafy ny hodiny,
dia ny nofoko izao no ahitako an’Andriamanitra.
27Eny izaho izao no hahita Azy#19,27 Izaho izao no hahita Azy: Ny fitsangan’ny maty no ambaran’ny teny amin’ireo and 25-27 ireo.,
ny masoko no hahita Azy, fa tsy olon-kafa.
Matim-paniriana izany ny foko ato anatiko.
28Amin’izay ianareo va hilaza hoe: ‹Nahoana isika no nanenjika azy?›
fa ho hita ny mahamarina ny adiko.
29Ho an’ny tenanareo no aoka hatahoranareo ny sabatra amin’izay;
fa mahatsiravina ny famalian’ny sabatra,
ary ho fantatrareo fa misy fitsarana marina».
Voafantina amin'izao fotoana izao:
Jôba 19: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.