Jeremia 29
29
Taratasy ho an’ireo voasesitany#29,1 Ireo babo voalohandohany nentina tany Babilôna, izay loholona amin’ny fireneny, dia natoky mafy fa tsy haharitra hoatrinona ny fahababoana, fa vetivety foana dia hiongana ireo nandresy azy ka ho afaka hody any Palestina indray izy. Ny hanohitra sy hampitsahatra izany hevi-diso izany no kendren’i Jeremia mpaminany indrindra amin’ny taratasiny.
1Izao no teny voasoratra ao amin’ny taratasy nampitondrain’i Jeremia mpaminany, avy any Jerosalema, ho any amin’ireo sisan’ny loholona#29,1 Sisan’ny loholona: Na hoe loholona sisa. voababo, ho an’ny mpisorona ama-mpaminany mbamin’ny vahoaka rehetra, nentin’i Nabokodonozora avy any Jerosalema ho any Babilôna; 2nony efa niala tany Jerosalema i Jekôniasa mpanjaka, ny renin’ny mpanjaka#29,2 Renin’ny mpanjaka: I Zeboda no renin’i Jôakima., ny eonòka, ny mpanapaka any Jodà sy Jerosalema, ny mpandrafitra ama-mpanefy vy; 3taratasy nampitondrainy tamin’ny alalan’i Elàsa, zanak’i Safàna, sy i Gamariasa, zanak’i Helkiasa, izay nirahin’i Sedesiasa mpanjakan’i Jodà, ho any Babilôna, amin’i Nabokodonozora, mpanjakan’i Babilôna, ka hoy ny taratasy hoe:
4Izao no lazain’i Iavehn’ny tafika, Andriamanitr’i Israely, amin’ny babo rehetra nasesiko avy any Jerosalema ho any Babilôna. 5Aoka ianareo hanorina trano#29,5 Aoka ianareo hanorina trano: Satria ny fanaovana sesitany anareo mbola haharitra ela., ka hitoetra aminy; hamboly zaridaina, ka hihinana ny vokany; 6hanambady ka hiteraka zazalahy aman-jazavavy; haka vady ho an’ny zanaka lahinareo, sy hampanambady ny zanaka vavinareo, mba hiterahany zazalahy aman-jazavavy; ka hihamaro amin’ity tany ity ianareo, fa tsy hihavitsy. 7Mikatsaha soa ho an’ny tanàna nitondrako anareo ho babo, ary mangataha amin’i Iaveh ho azy, fa soa ho anareo ny soa ho azy.
8Fa izao no lazain’i Iavehn’ny tafika, Andriamanitr’i Israely: Aza mety hofitahin’ny mpaminaninareo, izay eo aminareo, na ny mpanao fankatoavanareo#29,8 Mpanao fankatoavana... nofy alaina ho nofy. Angamba izy izany, dia karazandrazan’irony teto amintsika fony fahiny tamin’ny tany maizina, izay nihambo azy ho nahazo filazana na fahefana manokana tamin’ny fanahy tsy hita toniany, na tamin’ny sampiny: ka dia sahy manambara izany amin’ny olona. Ny anisan’izy ireny teto amintsika, dia ry zareo mpanandro sy mpanao sikidy ary ny mpanao hitsak’andro, mbamin’ny mpanao tsindrimandry; ny tontalin’izy rehetra anefa mpaminany sandoka na hosokosoka avokoa.; ary aza mihaino ny nofy alainareo ho nofy. 9Satria tsy marina no aminaniany aminareo, amin’ny Anarako; tsy naniraka azy ireo Aho, - teny marin’i Iaveh. - 10Fa izao no lazain’i Iaveh: Rehefa tapitra ny fitopolo taona, ho an’i Babilôna, no hamangiako anareo sy hanatanterahako ny teniko tsara noho ny aminareo; ka hamerina anareo amin’ity fitoerana ity Aho. 11Fa Izaho dia mahalala ny hevitro ny aminareo, - teny marin’i Iaveh, - dia hevitra hampiadanana fa tsy hampahoriana, mba hanome anareo andro any ho any sy fanantenana. 12Hiantso Ahy ianareo, dia ho avy sy hivavaka Amiko ianareo, ary hihaino anareo Aho. 13Hitady Ahy ianareo, dia hahita Ahy, satria hitady Ahy amin’ny fonareo tokoa ianareo; 14ka hety ho hitanareo Aho, - teny marin’i Iaveh, - hampodiko ny babo aminareo, ary hangoniko avy any amin’ny firenena rehetra ianareo sy avy amin’ny fitoerana rehetra nandroahako anareo, - teny marin’i Iaveh, - dia haveriko amin’ity fitoerana nanesorako anareo ity indray.
15Kanefa, hoy ianareo dia efa nanangana mpaminany ho anay#29,15 Efa nanangana mpaminany ho anay. Mpaminany ihany ireo, nefa zavatra hafa dia hafa no ambarany. Ireo teny voalaza ao amin’i Jer 5,6 sy ny manaraka, dia hihatra haingana, mba hanamarina ny teniny. eto Babilôna, i Iaveh. 16Izao no lazain’i Iaveh, ny amin’ny mpanjaka mipetraka eo amin’ny seza fiandrianan’i Davida, ny vahoaka rehetra monina amin’ity tanàna ity, sy ireo rahalahinareo tsy mba lasa nandeha niaraka taminareo ho any amin’ny tany fahababoana. 17Izao no lazain’i Iavehn’ny tafika: Efa halefako hamely an’ireo ny sabatra, ny mosary, ary ny pesta; hataoko toy ny aviavy ratsy tsy azo hanina, noho ny haratsiany loatra, izy. 18Henjehiko amin’ny sabatra sy ny mosary mbamin’ny pesta ary hataoko fampitahorana any amin’ny fanjakana rehetra ambonin’ny tany ho fanozona, figagàna, fihomehezana, fanala baraka eo amin’ny firenena rehetra nandroahako azy; 19satria izy ireo tsy nihaino ny teniko, - teny marin’i Iaveh, - nefa naniraka ny mpaminany mpanompoko tamin’izy ireo Aho, naniraka azy hatramin’ny vao maraina, nefa tsy nohenoinareo, - teny marin’i Iaveh. -
20Koa mihainoa ny tenin’i Iaveh, ianareo rehetra, babo nalefako avy tany Jerosalema ho any Babilôna! 21Izao no lazain’i Iavehn’ny tafika, Andriamanitr’i Israely, ny amin’i Akaba zanak’i Kôliasa, sy i Sedesiasa zanak’i Maasiasa, izay maminany lainga aminareo amin’ny Anarako: Indro izy hatolotro eo an-tanan’i Nabokodonozora, mpanjakan’i Babilôna, ka hovonoiny eo imasonareo. 22Izy ireo dia hangalana fomba fanozonana, eo amin’ny babo, avy any Jodà, izay ao Babilôna, toy izao: Aoka ianao hataon’i Iaveh tahaka an’i Sedesiasa sy i Akaba, izay nendasin’ny mpanjakan’i Babilôna, tamin’ny afo. 23Satria namoafady tamin’i Israely izy ireo, nijangajanga tamin’ny vadin’ny namany, sy naminany lainga tamin’ny Anarako, izay tsy nandidiako azy, ary mahalala izany Aho, sy vavolombelona Aho, - teny marin’i Iaveh. -
Ny navalin’ilay sesitany ny taratasin’i Jeremia
24Ary i Semeiàsa, Nehelamita, dia ilazao hoe: 25Izao no lazain’i Iavehn’ny tafika, Andriamanitr’i Israely: «Ianao nandefa taratasy tamin’ny anaranao, ho any amin’ny vahoaka rehetra any Jerosalema, sy i Sôfônia#29,25 Sôfônia. Angamba izy io ilay atao hoe mpisorona faharoa, na faharoan’ny mpisorona izay voalaza ao amin’ny toko faha-52,24; 2Mpa 25,13. mpisorona, zanak’i Maasiasa, mbamin’ny mpisorona rehetra, nilaza hoe: 26Natsangan’i Iaveh ho mpisorona, hisolo an’i Jôiadà mpisorona ianao, mba hisy mpitandrina ao an-tranon’i Iaveh momba izay olona rehetra manao azy ho nahazo tsindrimandry sy ho mpaminany mba hitananao azy amin’ny boloky na gadra. 27Ary ankehitriny, ahoana no tsy nisakananao an’i Jeremia, avy any Anatôta#29,27 Anatôta. Dia tanàna ao amin’ny zaratanin’i Benjamina, izay natao ho fonenan’ny mpisorona. Tao no nipetrahan’i Abiatara mpisorona (1Mpa 2,26-27); ary tao koa no nahaterahan’i Jeremia (Jer 1,11; 11,20)., izay maminany aminareo? 28Fa noho izany, dia nahavatra nampilaza taminay tany Babilôna izy, nanao hoe: Mbola haharitra ela izao, ka manaova trano ary mitoera ao aminy, mambole amin’ny zaridaina ary mihinàna ny vokany.» 29Novakin’i Sôfônia mpisorona teo anatrehan’i Jeremia mpaminany izany taratasy izany. 30Dia tonga tamin’i Jeremia ny tenin’i Iaveh manao hoe: 31Mandefasa iraka, hilaza amin’ny voababo rehetra, hanao hoe: «Izao no lazain’i Iaveh, ny amin’i Semeiàsa, Nehelamita: Noho i Semeiàsa naminany taminareo, nefa tsy nirahiko, ary lainga no nataony hitokianareo; 32noho izany dia izao no lazain’i Iaveh: Hamangy an’i Semeiàsa Nehelamita mbamin’ny taranany Aho; tsy hisy amin’ny fianakaviany honina eo amin’ny fireneny; sady tsy mba hahita ny soa hataoko amin’ny vahoakako izy. - teny marin’i Iaveh, - satria nitory fiodinana amin’i Iaveh izy.»
Voafantina amin'izao fotoana izao:
Jeremia 29: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.