Jeremia 25
25
4. I BABILÔNA, LOZA IRAHIN’I IAVEH
1Teny tonga tamin’i Jeremia, momba ny vahoaka rehetra any Jodà, tamin’ny taona faha-4 nanjakan’i Jôakima#25,1 Taona faha-4 nanjakan’i Jôakima. Tamin’izany ny fanjakana kaldeanina dia vao avy nandresy an’i Asiria manontolo, ka noravany i Niniva renivohiny. - Ary io filazana taona io, dia ilay ady natao tao Karkemisa (606 taona talohan’i Jesoa Kristy), izay nandresen’i Nabokodonozora an’i Faraôna Nekao izay efa nandroso hatrany Eofrata. I Faraôna Nekao no nanangana an’i Jôakima ho mpanjaka. i Nabokodonozora tamin’izany fotoana izany, dia tsy mbola mpanjakan’i Babilôna; fa noho izy nitondra ny fahefan’ny mpanjaka sady nitari-tafika no niantsoana azy eto hoe mpanjaka (jereo 2Mpa 24,1; Dan 1,1); fa i Nabopôlasara rainy izay efa antitra sady reraky ny fahanterana no mbola nanjaka, ary herintaona taorian’ny itantarana azy izao vao maty izy. Tamin’ny nanenjehana an’ireo Ejiptianina izay vaky nandositra, dia niditra tao Jodea i Nabokodonozora ary nampandoa hetra an’i Jôakima. Ka izany no fiantombohan’ny fahababoan’ny Jody nandritra ny 70 taona, voalaza eo amin’ny and faha-11, izay naharitra hatramin’ny didin’i Sirosa (taona 536 talohan’i Jesoa Kristy)., zanak’i Josiasa, mpanjakan’i Jodà, taona voalohany nanjakan’i Nabokodonozora, mpanjakan’i Babilôna. 2Teny notononin’i Jeremia momba ny vahoaka rehetra any Jodà, mbamin’ny mponina rehetra any Jerosalema nataony hoe: 3Hatramin’ny taona faha-13 nanjakan’i Josiasa zanak’i Amôna, mpanjakan’i Jodà, ka mandrak’androany, dia efa 23 taona#25,3 Taona faha-23: Izany hoe, tamin’ny 19 taona nanjakan’i Josiasa, 3 volana nanjakan’i Jôakaza ary 4 taona nanjakan’i Jôakima. izay, no nahatongavan’ny tenin’i Iaveh tamiko, sy nitenenako taminareo ka niteny taminareo hatramin’ny maraina aho; kanefa tsy nihaino ianareo. 4Nirahin’i Iaveh taminareo avokoa, ny mpaminany mpanompony, sady nirahiny hatramin’ny maraina; kanefa tsy nihaino ianareo, na nanongilan-tsofina hihaino akory, Hoy izy: 5Samia ianareo miverina miala amin’ny lalan-dratsinareo sy amin’ny haratsian’ny asanareo avy, dia honina amin’ny tany nomen’i Iaveh anareo sy ny razanareo, amin’ny taona mifandimby ianareo. 6Aza mandeha manaraka andriamani-kafa, mba hanompo azy sy hivavaka aminy; ary aza mampahatezitra Ahy amin’ny asan-tananareo, dia tsy hampidi-doza aminareo akory Aho. 7Tsy nihaino ahy anefa ianareo, - teny marin’i Iaveh - ho fampahatezerana Ahy tamin’ny asan-tananareo, ary ho loza ho anareo. 8Noho izany, izao no lazain’i Iavehn’ny tafika: Noho ianareo tsy nihaino ny teniko, 9dia indro ampanalaiko ny foko rehetra any avaratra, - teny marin’i Iaveh, - hoentiko amin’i Nabokodonozora mpanjakan’i Babilôna, mpanompoko#25,9 Mpanompoko: Ampitahao amin’ny toko 27,6; 43,10.; ary hataoko tonga izy ireo hamely an’ity tany ity mbamin’ny mponina eo aminy sy ny firenena rehetra amin’ny manodidina, ka hataoko anatema izy, hataoko tany lao, zavatra fandatsa, ary rava mandrakizay. 10Hampijanona eo afovoany aho, ny hobim-pifaliana, ny feo firavoravoana, ny hiran’ny mpampakatra, ny hiran’ny ampakarina, ny feom-bato fikosoham-bary, ary fahazavan’ny jiro#25,10 Feom-bato fikosoham-bary ary fahazavan’ny jiro. Fahiny, dia nanana vato ahodin-tanana natao fitotoam-bary isan-trano ny Jody izay nanaovana ny mofo hohanina isan’andro ary nisy jiro koa teo afovoan-trano izay mirehitra isan-kariva, rehefa tafavory ny fianakaviana.. 11Ity tany rehetra ity ho tany lao, hanompo ny mpanjakan’i Babilôna, mandritra ny 70#25,11 70 taona. Isa bontolo izany: ny fanjakana Kaldeanina dia tsy naharitra afa-tsy 68 taona katroka, izany hoe hatramin’ny taona 606 talohan’i Jesoa Kristy ka hatramin’ny taona 538 izay nahazahoan’ny Meda sy Persa an’i Babilôna. Roa taona taorian’izany (536 talohan’i Jesoa Kristy), no nivoahan’ny didin’i Sirosa nanafaka an’i Israely natao sesitany. taona#25,11 Nandritra ny 70 taona. Ny fanisana an’izany dia hatramin’ny taona voalohany nanjakan’i Nabokodonozora, ka miafara amin’ny taona voalohany nanjakan’i Sirosa (Esd 1,1).
12Rehefa tapitra izany 70 taona izany, dia hampamoahiko ny amin’ny fahotany kosa ny mpanjakan’i Babilôna sy izany firenena izany, - teny marin’i Iaveh, - ary koa ny tanin’ny Kaldeanina, ary hataoko tany lao mandrakizay izany. 13Hataoko mihatra amin’izany tany izany avokoa ny teny voalazako hamelezana azy, dia izay rehetra voasoratra amin’ity boky ity.
2. TENIN’ANDRIAMANITRA MAMELY IREO FIRENENA TSY JODY
1. TENY MIALOHA
Fampisehoan’Andriamanitra ilay kapoaka
Ny novinanin’i Jeremia hamelezana ny firenena rehetra. 14Fa hampanompoin’ny firenena maro ama-mpanjaka lehibe kosa indray izy ireo, ka dia hovaliako araka ny nataony sy ny asan’ny tanany avy.
15Fa izao no nolazain’i Iaveh, Andriamanitr’i Israely tamiko: «Raiso ity kapoakan’#25,15-38 Raiso ity kapoaka ity. Tsy mba nomena kapoaka misy divay tokoa ny mpaminany, fa fanoharana ihany naseho taminy amin’ny fahitany. ny divaim-pahatezerako etỳ an-tanako ity, ka ampisotroy ny firenena rehetra hanirahako anao. 16Hisotro amin’izany izy ireo, dia handraingiraingy sy ho very saina eo anoloan’ny sabatra halefako ho eo afovoan’izy ireo.» 17Noraisiko ny kapoaka teny an-tanan’i Iaveh, nampisotroiko ny firenena#25,17 Nampisotroiko ny firenena, sns. Izany hoe, ny kapoaka misy divay dia manambara ny famaizan’Andriamanitra ny firenena maro. Ny fampisotroan’ny mpaminany azy, dia ny fampandrenesany azy ireo ny loza hamelezan’Andriamanitra azy. rehetra nanirahan’i Iaveh ahy, dia i Jerosalema mbamin’ny tanànan’i Jodà, 18ny mpanjakany, ny lehibeny, mba hanao azy ho tany manirery, ho tany rava, ho zavatra fandatsa, fanozonana, araka izao hita anio izao. 19I Faraôna mpanjakan’i Ejipta, ny mpanompony, ny mpanapaka mbamin’ny vahoakany rehetra, 20ny vahoaka mifangaro rehetra; ny mpanjaka rehetra amin’ny Otsa, ny mpanjaka rehetra amin’ny tanin’ny Filistinina, i Askalôna, i Gazà, i Akarôna, mbamin’ny sisa any Azota; 21I Edôma, i Moaba, mbamin’ny taranak’i Amôna; 22ny mpanjaka rehetra any Tira, ny mpanjaka rehetra any Sidona, mbamin’ny mpanjakan’ny nosy any an-dafin’ny ranomasina; 23I Dedana, i Temà, i Boza#25,23 I Dedana, Temà, Boza. Ireo dia vahoaka telo karazana izay nonina tao atsinanan’i Palestina tao amin’ny efitr’i Arabia; ny anarana ahafantaran’ny olona azy ireo dia hoe: Arabo-Skeneta na Arabo-Sarazìna., mbamin’ireo rehetra miharatra fihirifana; 24ny mpanjaka rehetra any Arabia, ny mpanjaka rehetra amin’ireo firenena mifangaro monina any an’efitra; 25ny mpanjaka rehetra any Zambrì#25,25 Zambrì (hebrio Zimri): Raha araka ny filazan’ny sasany, dia faritany any Persa, ny sasany kosa milaza fa any Arabia., ny mpanjaka rehetra any Elama#25,25 Elama: Izay atao hoe koa Elimaida, dia faritany any Persa., mbamin’ny mpanjaka rehetra any Media; 26ny mpanjaka rehetra any avaratra, na ny akaiky na ny lavitra, na ity na itsy mbamin’ny fanjakana rehetra amin’izao tontolo izao, etỳ ambonin’ny tany; ary ny mpanjakan’i Sesàka#25,26 Sesàka: Ny mpanjakan’i Sesàka, izany hoe ny mpanjakan’i Babilôna. no hisotro manaraka ireo. 27Lazao amin’izy ireo hoe: Izao no tenin’i Iavehn’ny tafika, Andriamanitr’i Israely: «Misotroa ianareo, mimamoa, mandoava, ary mianjerà tsy hiarina intsony, eo anoloan’ny sabatra halefako ho eo afovoanareo.» 28Ary raha mandà tsy handray ny kapoaka eny an-tananao hosotroiny izy ireo, lazao aminy hoe: «Izao no tenin’i Iaveh: Hisotro ianareo! 29Fa jereo ange ny tanàna iantsoana ny Anarako ho fiarovana azy no nampihàrako voalohany ny loza; ka ianareo indray ve no ho afaka? Tsy ho afaka ianareo, fa hantsoiko hamely ny mponina rehetra amin’ny tany, ny sabatra,» - teny marin’i Iaveh. 30Ary ianao haminany izany zavatra rehetra izany amin’izy ireo, ka hilaza aminy hoe:
«Mitrena any ambony i Iaveh
nampikotrokotroka ny feony izy any amin’ny fonenany masina,
mitrena mafy mamely ny taniny;
akoran’ny mpioty voaloboka no alefany,
manohitra ny mponina rehetra amin’ny tany.
31Re hatrany am-paran’ny tany, ny horakoraka;
satria i Iaveh mampamoaka ny firenena rehetra,
mifandahatra amin’ny nofo rehetra eo amin’ny fitsarana,
manolotra ny ratsy fanahy amin’ny sabatra,
- teny marin’i Iaveh. -
32Izao no lazain’i Iavehn’ny tafika:
Indro ny loza hitety ny firenen-tsamihafa.
Misy tafio-drivotra mahery, hiposaka avy any am-paran’ny tany.
33Ka amin’izany andro izany, hisy izay novonoin’i Iaveh,
hatramin’ny faran’ny tany iray, ka hatramin’ny farany iray koa;
tsy hitomaniana na hangonina na halevina ireny,
fa ho toy ny zezika eo ambonin’ny tany.
34Midradradradrà, ianareo mpiandry ondry, ary mitaraìna,
mihosinkosena amin’ny vovoka, ianareo lehiben’ny ondry,
fa tapitra amin’ny famonoana ny andronareo;
hamely anareo Aho, ka hianjera toy ny fanaka sarobidy ianareo.
35Ny mpiandry ondry tsy hanan-kandosirana;
ny lehiben’ny ondry tsy hanan-kialofana.
36Re ny fitarainan’ny mpiandry ondry,
ary ny fidradradradran’ny lehiben’ny ondry,
fa nosimban’i Iaveh ny tany fiandrasana azy.
37Ny any an-tsaha tsy misy tabataba dia rava
avy amin’ny firehetan’ny hatezeran’i Iaveh!
38Mandao ny fiereny toy ny liona mandao ny lobolobony izy;
ny tanin’izy ireo efa hovana ho efitra,
eo anoloan’ny hatezeran’ny mpandrava,
eo anoloan’ny firehetan’ny hatezeran’i Iaveh.»
Voafantina amin'izao fotoana izao:
Jeremia 25: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.