Izaia 51
51
Famonjena ny zanak’i Abrahama
1Mihainoa Ahy, ianareo izay manaraka ny marina,
izay mitady an’i Iaveh.
Diniho ny vatolampy nanendahana anareo;
sy ny tany fihadiam-bato nangalana anareo.
2Diniho i Abrahama rainareo;
sy i Sarà, izay niteraka anareo;
fa fony izy mbola tokana no nantsoiko izy.
dia notahiko sy nohamaroiko.
3Satria efa nampionona an’i Siôna i Iaveh,
ka nampiononiny ny rava rehetra teo;
novany ho tahaka an’i Edena ny efitra teo;
ary ho zaridainan’i Iaveh#51,3 Zaridainan’i Iaveh: Izany hoe, tany tsara sy mahafinaritra indrindra tahaka ny Paradisa an-tany. ny tany foana tao.
Fifaliana amam-piravoravoana no ho hita ao,
mbamin’ny hira fisaorana amam-peo mozika.
Hitsara an’izao tontolo izao i Iaveh
4Mihainoa ny feoko, ry vahoakako,
manongilàna sofina, ry fireneko!
fa hamoaka lalàna Aho,
ary hanorina ny didiko ho fanazavana ny firenena.
5Akaiky ny fahamarinako#51,5 Akaiky ny fahamarinako: Ny famonjena an’i Israely izay mampiseho fa tsy nivadika i Iaveh, fa mitana ny fanekena nataony tamin’ny voalohany.; efa hiseho ny famonjeko:
ary hitsara ny firenena ny sandriko;
manantena Ahy ny nosy,
ary matoky ny sandriko izy.
6Andrandrao ho amin’ny lanitra ny masonareo,
dia ampidino ho amin’ny tany ny fijerinareo;
fa ny lanitra ho levona tahaka ny setroka;
ary ny tany hanjary vorotra, hoatra ny fitafiana;
ny mponina eo aminy ho levona torak’izany koa;
fa ny famonjeko kosa haharitra mandrakizay;
ary ny fahamarinako tsy mba ho levona.
7Mihainoa Ahy, ianareo mahalala ny fahamarinana,
ry firenena izay manana ny lalàko ao am-ponao.
Aza matahotra izay latsan’olombelona;
na mivadi-po amin’izay fanaratsian’izy ireo.
8Fa holanin’ny kalalao, hoatra ny fitafiana izy ireo,
ary hokotehin’ny tsindoha, hoatra ny volon’ondry.
Fa ny fahamarinako kosa haharitra mandrakizay;
ary ny famonjeko hihatra amin’ny taona rehetra.
Mifoha i Iaveh
9Mifohaza, mifohaza ianao, mitafia hery,
ry zandrin’i Iaveh!
Mifohaza toy ny tamin’ny andro taloha,
tahaka ny tamin’ny taona fahiny.
Tsy Ianao va no nitetika an-dRahaba#51,9 Rahaba. Ny tena hevitr’io anarana io, raha araka ny fampiasan-dry zareo any Ejipta dia hoe: fiavonavonana, fieboana (jereo toko 30,7; Sal 86,4) ho potipotika,
sy nitomboka ilay dragona#51,9 Dragona. Raha araka ny filazan’i Ezekiela, dia i Faraôna mpanjakan’i Ejipta no misazoka izany anarana izany. ho gorobaka?
10Tsy Ianao va no nahamaina ny ranomasina,
dia ny rano tao amin’ny hantsam-be.
Ka nanao ny fanambanin’ny ranomasina
ho lalana nalehan’ny navotana?
11Koa hiverina ny navotan’i Iaveh;
dia hiditra ao Siôna amin’ny hobim-pifaliana;
firavoravoana mandrakizay no ho fehilohany;
ho henika azy ny fifaliana amam-piravoravoana;
Lasa nandositra ny sento amam-pahoriana.-
Mpankahery tapitra ohatra i Iaveh
12Izaho dia Izaho no mampionona anareo;
fa iza moa ianao no dia matahotra olombelona mety maty,
zanak’olombelona#51,12 Zanak’olombelona. Fiangentsanam-pitenenana izany, fa ny ambarany dia olona fotsiny. Amin’ity andininy ity sy ny manaraka, dia ny amin’i Nabokodonozora mpanjakan’i Babilona no kasihina. mihelina hoatra ny ahitra;
13ka dia manadino an’i Iaveh, Mpahary anao,
izay namelatra ny lanitra sy nanorina ny tany;
mangovitra tsy an-kijanona, tontolo andro,
eo anatrehan’ny fisafoakan’ny mpifehy masiaka
rehefa mioman-kandrava anao Izy.
Ary aiza izao, izay fisafoaky ny mpanapaka masiaka?
Ny famonjena
14Vetivety foana, dia ho voavaha izay mitanondrika;
tsy ho faty ao an-davaka izy;
ary tsy ho diso hanina.
15Izaho dia Iaveh Andriamanitrao,
izay mampanonja ny ranomasina, ka dia mirohondrohona ny onjany;
Iavehn’ny tafika no anarany.
16Nataoko tao am-bavanao ny teniko,
ary noalofako tamin’ny aloky ny tanako ianao,
mba hamboly lanitra sy hanorina tany#51,16 Mba hamboly lanitra sy hanorina tany. Azo lazaina marina mihitsy fa ilay Andriamanitra Mpamonjy no efa nanao lanitra vaovao, sy nanorina tany vaovao, tamin’ny nanorenany ny Eglizy, tamin’ny nanovàny endrika an’izao tontolo izao noho ny fitoriana ny Evanjely, tamin’ny nanamboarany ny vahoaka simba, tafalentika tamin’ny haizina, ho vahoaka masina, madio ary mazava saina, izay toa tsy miaina eto an-tany fotsiny fa any an-danitra.,
ary hilaza amin’i Siôna hoe: «Vahoakako ianao!»
Mifoha i Jerosalema
17Mifohaza, mifohaza,
miarena ianao, ry Jerosalema,
izay efa nisotro ny kapoakan’ny hatezerana,
avy amin’ny tanan’i Iaveh;
izay efa nisotro sy nandany
ny kapoaka mahajenjina!
18Tsy nisy nitari-dalana azy, na iray aza,
ny zanany naterany rehetra.
Tsy nisy nitantana azy, na iray aza,
ny zanaka notezainy rehetra.
19Loza roa no namely anao: -
iza moa no hanao teny mangoraka anao? -
Dia ny fandravana amam-pandringanana,
ny mosary sy ny sabatra,
- hataoko ahoana no fampionona anao? -
20Ny zanakao lahy efa reraka ka miapokapoka
eny an-joron-dalana rehetra eny,
mova tsy ny antilôpa voan’ny fandrika harato,
jenjin’ny hatezeran’i Iaveh
sy ny fandrahonan’ny Andriamanitrao.
21Koa mihainoa izao, ry Ikala fadiranovana,
jenjina, fa tsy amin-divay!
22Izao no lazain’i Iaveh Tomponao
sy Andriamanitrao izay miaro ny vahoakany:
Indro efa noesoriko teny an-tananao,
ny kapoaka mahajenjina,
ny kapoakan’ny fahatezerako;
tsy hisotro izany intsony ianao, izao sisa izao.
23Hataoko eo an-tanan’ny mpanenjika anao izany,
dia amin-dry zareo nanao taminao hoe:
«Miondreha handehananay#51,23 Miondreha handehananay, sns. Ny mpanjaka Kaldeanina, dia nanala-baraka ampahibemaso izay mpanjaka resiny, amin’ny fanaovany azy ireo ho ambaratonga iakarany, na asainy miondrika amin’ny tany dia hitsahiny eo an-tampon-damosiny. Maro be koa no nataon’ireo mpanjakan-dry zareo Tatsinanana toy izany (jereo Jôs 10,24; Sal 109,1)!»
Dia ny lamosinao no nataony toy ny tany,
sy toy ny lalam-be ho an’ny mpandeha!
Voafantina amin'izao fotoana izao:
Izaia 51: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.