Izaia 30
30
Teny famelezana an’ireo solontena nankany Ejipta
1Loza ho an’izay zaza maditra - teny ton’i Iaveh,
izay manao fikasana nefa tsy ombako;
sy manao fanekem-pivavahana, nefa tsy omban’ny fanahiko,
ka manampy ota ny ota.
2Dia midina eny amin’ny lalana mankany Ejipta izy ireo
nefa tsy manontany ny vavako#30,2 Vavako: Izany hoe, hevitry ny tenany ihany no nitadiavan’ny filohan’i Israely famonjena tany Ejipta, fa tsy nanontany ny mpaminany na ny mpisorona izy ireo, hahalalany ny hevitro.,
mba hialoka eo ambany fiarovan’i Faraôna
sy hialokaloka eo amin’ny alokalok’i Ejipta.
3Hody henatra ho anareo, ny fiarovan’i Faraôna;
ary ho fanalam-baraka ho anareo, ny fialokalofana#30,3 Alokaloka: na hoe, fiarovana; ka ny hevitr’izany teny izany dia hoe, ny fiankinana amin’i Ejipta dia mainka hahafa-baraka amin’ny hafitsoky ny Asirianina.
eo amin’ny alokalok’i Ejipta.
4Efa mby any Tanisa#30,4 Tanisa, tanàna any Ejipta izay atao hoe Mansorà ankehitriny (Fanis 12,23; Sal 77,45). sahady ireo mpanapaka an’i Jodà;
ary efa tafahoatra hatrany Hanesa#30,4 Hanesa, tanàna any Ejipta koa, araka ny filazan’i Masindahy Jérôme dia tao amin’ny farany atsimo amin’i Ejipta io tanàna io, mankamin’ny faritanin’i Etiôpia. ny irany;
5Mangaihay avokoa izy noho izany firenena izany tsy hahefa na inona na inona aminy,
tsy hahazoany vonjy na fanampiana
fa henatra sy fahafaham-baraka foana ihany.
Teny hafa famelezana an’ireo solontena
6Faminaniana ny amin’ireo bibin’i Negeba#30,6-7 Faminaniana ny amin’ireo biby, sns. Ireo dia biby masiaka izay nikarenjy tany an’efitra anelanelan’i Palestina sy i Ejipta. Araka ny hevitry ny sasany dia toa hain-teny entina milaza ireo biby izay nampitondraina fanomezana ho an’i Faraôna izy ireo.:
Izy ireo mamakivaky ny tany mampahory sy mampitebiteby,
izay ivoahan’ny liona aman-diona vavy,
ny menarana sy ny dragona manidina,
mitondra ny hareny eny an-damosin’ny ampondra,
sy ny rakiny eo amin’ny trafon’ny rameva,
ho an’ny firenena tsy mahefa na inona na inona.
7Ho zava-poana sy tsinontsinona ny vonjin’i Ejipta;
izany no iantsoako azy hoe: Ilay be rehaka mipetra-poana.
Fara hafatra
8Koa ankehitriny mandehana soraty#30,8 Mandehana, soraty, sns. Ny Tompo no miteny izany amin’ny mpaminany. Ny antony anoratana azy, dia mba hahatsiarovana, rehefa tonga ny loza, fa zavatra efa nambaran’Andriamanitra rahateo izany. eo anatrehany amin’ny fàfana#30,8 Fàfana: Tahatahaka ny solaitra ihany izany fàfana izany. izany,
ary ataovy an-tsoratra ao anatin’ny boky,
hany ka amin’ny andro ho avy
dia ho vavolombelona mandrakizay izany.
9Satria izy dia firenem-pikomiana
zanaka miodina, zanaka mandà,
tsy mihaino ny lalàn’i Iaveh.
10Izy ireo manao amin’ny mpahita hoe: «Aza mahita»;
sy amin’ny mpaminany hoe: «Aza maminany ny zava-marina aminay,
fa zava-mahafinaritra no lazao aminay;
hevi-dravina no vinanio.
11Mialà amin’ny lalana, ivilio ny lalana,
esory eo imasonay ilay Masin’i Israely!»
12Noho izany, izao no lazain’Ilay Masin’i Israely:
Noho ianareo manamavo izany teny izany,
sy mitoky amin’ny fanaovana an-keriny amam-pitaka,
sady manao izany ho fiankinanareo,
13noho izany, io heloka io ho anareo,
dia ho toy ny mivava efa mila hampianjera
sy efa mandomba eo amin’ny rindrina avo,
izay mirodana tampoka, indray mihelina monja.
14Ka dia ho montsamontsana hoatra ny fahamontsan’ny vilany tany izy,
izay vakivakin’ny olona tsy itondrany roa,
ary ny vakiny tsy hahitana silany akory
mba hakana afo ao am-patana
na hanovozan-drano ao an-dobo.
15Fa izao no nolazain’i Iaveh Tompo,
ilay Masin’i Israely:
«Ny fibebahana sy ny fiandrasana amim-piadanana
no hahavoavonjy anareo;
ao amin’ny fitsaharana amam-pahatokiana no herinareo.»
16Nefa tsy nety ianareo,
fa hoy ianareo: «Tsia,
fa handositra mitaingin-tsoavaly izahay.» -
Eny hoe, handositra ianareo. -
«Himaona mitaingina ny soavaly faingan-tongotra izahay.»
Eny iky, fa ho faingana kokoa izay hanenjika anareo.
17Raha iray no handrahona#30,17 Raha iray no handrahona, sns. Izany hoe, fahavalo iray monja, dia hampitera-kovitra ny arivo lahy aminareo., dia arivo no handositra;
ary raha dimy no handrahona, handositra avokoa ianareo.
Mandra-pahatonganareo ho kely sisa,
tahaka ny tsato-kazo#30,17 Tsato-kazo. Ny firenena Jody dia oharina amin’ny ala izay nikapàna hazo maro, ka singany vitsivitsy foana no sisa tafajanona. eny an-tampon’ny tendrombohitra,
na ny faneva famantarana eny an-kavoana.
18Izany no iandrasan’i Iaveh vao hamindra fo aminareo izy,
dia hitsangana, ka hiantra anareo;
satria Andriamanitra marina i Iaveh.
Sambatra izay rehetra manantena Azy!
Fanambinana ho avy
19Fa ianao, ry vahoaka monina ao Siôna, ao Jerosalema,
tsy hitomany intsony ianao,
fa raha vao mitaraina ianao dia hamindrany fo;
raha vao mandre anao Izy dia hamaly anao.
20Homen’ny Tompo anareo
ny hanim-piahiahiana mafy sy ny ranom-pahoriana;
ary tsy hiery intsony izay mampianatra anao#30,20 Izay mampianatra anao. Ny Eglizy, amin’ny fombam-pivavahana izay atao amin’ny Avent, dia mampihatra izany teny izany amin’i Jesoa Kristy, izay tena dokotera sy mpampianatra antsika.,
ary hahita maso an’izay mampianatra anao ianao.
21Ary handre sofina ny feo hilaza ao ivohonao hoe:
- Ity no lalana, ka ombao io! -
dia raha ianareo hivily na ho ankavanana na ho ankavia.
22Hataonareo zava-maloto, ny volafotsy mipetraka amin’ny sampinareo;
mbamin’ny volamena mipetraka amin’ny sariolonareo#30,22 Sariolonareo: na hoe, ny sampinareo izay noravahana volafotsy.:
ka harianareo hoatra ny zava-maloto:
«Mialà eto», hoy ianareo aminy.
23Ny Tompo handefa ny ranonorany amin’ny voa
nafafinao amin’ny tany,
ary ny tany hahavokatra mofo,
tsara tokoa sady betsaka,
amin’izany andro izany ny biby fiompinareo hihinana
eny amin’ny tany fiandrasana malalaka:
24ary ny omby aman’ampondra miasa ny tany,
hihinam-bilom-bary matsiro,
voakororòka tamin’ny lapela aman-tsahafa.
25Eny an-tendrombohitra avo rehetra,
eny an-kavoana avo rehetra
hisy sakeli-drano aman-dranovelona,
amin’ny andro famonoam-be,
dia hianjeran’ny tilikambo.
26Ny hazavan’ny volana#30,26 Hazavan’ny volana, sns. Amin’izany teny izany araka ny fivoasan’i Masindahy Jérôme azy, dia ny voninahitry ny fiainana ho avy no lazaina, izany hoe, ny lanitra vaovao izay lazain’i Masindahy Piera (2Pier 3,13) sy i Masindahy Joany (Apôk 21,1) ho tahaka ny hazavàn’ny masoandro;
ary ny hazavan’ny masoandro ho avo fito heny,
ho tahaka ny hazavan’ny hafitoana,
amin’ny andro hamelezan’i Iaveh ny ratran’ny vahoakany,
sy hanasitranany ny fery namelezany azy.
Hatao sorona i Asora
27Indro avy any lavitra any ny Anaran’i Iaveh;
mahamay ny hatezerany, ka tsy tanty ny fahamainy;
mivoaka fisafoahana ny molony;
ary tahaka ny afo mandevona ny lelany.
28Tahaka ny riaka manafotra ny fofon’ainy;
manafotra havozona,
hanasivanany ny firenena amin’ny sivana fandravana,
sy hanisiany lamboridy mampivily lalana eo amin’ny valanoranon’ny olona.
29Amin’izany ianareo hiventy hira,
tahaka ny amin’ny alina#30,29 Tahaka ny amin’ny alina: Karazam-pitenenana fahita ao amin’ny Baiboly Masina izany. Ny fety tamin’ny Hebrio, dia indray andro mialoha amin’ny takariva no manomboka; dia ireo fety telo malaza: Paka, Pantekôty, Tabernakla. Mirohotra miakatra any Jerosalema daholo i Jodea manontolo mbamin’ny tanàna sasany any ivelany (Deter 16,16; Sal 121,4), hankalaza izany fety izany. Azo lazaina fa ho nihira ny hiram-pifaliana ny vahoaka nandritra ny andro nankalazana ny fety. ankalazana ny fety,
ary ny fonareo hiravoravo
tahaka an’izay miakatra amin’ny feon-tsodina,
ho ao an-tendrombohitr’i Iaveh
hanatona ny vatolampin’i Israely.
30I Iaveh hampiriadriatra ny feony#30,30 Feony: Izany hoe, ny varatra. Amin’ny andininy manaraka sy amin’ny teny be dia be ao amin’ny Soratra Masina ny hoe: Feon’ny Tompo na Feon’i Iaveh dia ny varatra no lazaina amin’izany (Sal 28,3 sy ny manaraka). miezinezina,
ary hampiseho ny fiantèfan’ny sandriny,
amin’ny firehitry ny hatezerany aman-delafo mandevona;
amin’ny tafio-drivotra aman-dranonoram-baratra sy vato havandra#30,30 Vato havandra. Vaventy be ny havandra any Azia, ka mandevon-javatra aoka izany erỳ, ary manjera trano aza, hono, indraindray (Jôs 10.11).
31Dia hangovitra i Asora amin’ny feon’i Iaveh;
hikapoka amin’ny tsora-kazony Izy,
32ka isaky ny miantefa ny tsora-kazo tsy diso
hampidinin’i Iaveh aminy#30,32 Aminy: I Asora no lazaina amin’izany.,
dia hatao mitatatata ny ampongatapaka#30,32 Mitatatata ny ampongatapaka, sns. Ny Israelita hidera ny Tompo no lazaina amin’izany. aman-dokanga,
ary hiady aminy, sady hamely mafy azy#30,32 Hamely mafy azy: Ny hoasiana dia ny Asirianina. Izy.
33Fa efa voaomana hatramin’ny ela i Tôfeta#30,33 Tôfeta: Fitoerana ao amin’ny lohasaha akaikin’i Jerosalema, izay nandoran’ny Israelita ny zanany ho fanajana an’i Môlôka, sampin’ny Amônita. Ampitahao Jôs 15,8; 1Mpa 11,7; 2Tan 28,3; Jer 7,31 sns. Voaomana io fitoerana io handorana ny fatin’ny mpanjakan’i Asiria sy ny miaramilany.;
io koa dia efa voaomana ho an’ny mpanjaka.
Nataon’ny Tompo malalaka sady lalina izy;
misy afo aman-kitay betsaka eo ambonin’ny antontan-kitainy;
ny fofon’ain’i Iaveh tahaka ny riaka solifara, no mampirehitra azy.
Voafantina amin'izao fotoana izao:
Izaia 30: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.