Ezekiela 23
23
Tantara manambara an’i Jerosalema sy i Samaria
(Jereo Ezek 16; Jer 3,6-13)
1Tonga tamiko ny tenin’i Iaveh nanao hoe:
2Ry zanak’olona, nisy vehivavy anankiroa#23,2-4 Vehivavy anankiroa. Ny Hebrio dia loharano iray niaviana, naterak’i Abrahama sy i Sarà, ka vahoaka iray monja sady nikambana toy izany ihany hatramin’ilay fisarahana izay tonga taorian’ny nahafatesan’i Salômôna. Hatramin’izany ny fanjakana dia nizara ho antokony roa, ka ny iray dia ny fokon’i Jodà sy i Benjamina izay nandray ny anarana hoe, fanjakan’i Jodà; ka i Jerosalema no renivohiny. Ny anankiray kosa dia ireo foko folo sisa, izay natao hoe, fanjakan’i Israely, ka ny renivohiny dia i Samaria. Ireo fanjakana roa ireo, izay loharano iray niaviana, dia oharina amin’ny olona mirahavavy iray tam-po. I Oôlà zokiny (ny hevitry ny anarana dia hoe, ny lainy ao aminy) dia manambara an’i Samaria, na ny fanjakan’i Israely. Tao afovoan’izy ireo angaloha no nitoeran’ny tabernaklan’ny Tompo hatramin’ny nahafatesan’i Helì mpisorona lehibe. I Oolibà zandriny (ny dikan’ny anarany dia hoe, ny laiko ao aminy) dia manambara an’i Jerosalema, na ny fanjakan’i Jodà. Tao afovoan’izy ireo indray no napetraka ny tabernaklan’ny Tompo hatreo amin’ny nahafatesan’i Helì mpisorona lehibe. Izany fizarana roa lehibe tamin’i Israely izany, dia ampitahaina amin’ny fisarahana roa lehibe amin’i Israely vaovao, dia ny Atsinanana sy ny Andrefana, izany hoe, ny Eglizy Grika izay naka tahaka ny fisarahan’i Samaria, ary ny Eglizy Latina izay nitana ny tombon-tsoan’i Jerosalema. Raha ny amin’ny fivadihan’i Oôlà sy i Ooliba mirahavavy kosa, dia azo atao tandindon’ny Kristianina mpivadika izy ireo, ka ny saziny dia ho sahala amin’ny sazy izay voalaza ho mahazo azy mirahavavy. I Masindahy Jérôme dia milaza fa ity toko ity sy ny toko faha-16, izay misy ohatra amin’ny olona mirahavavy, dia mihatra amin’ny Kristianina ratsy.,
zanaky ny reny anankiray.
3Izy ireo dia nijangajanga#23,3 Izy ireo dia nijangajanga: Izany hoe, latsaka tamin’ny fanompoan-tsampy. tany Ejipta,
nijangajanga tamin’ny andro fahatanorany;
tany no namihinana ny nonony,
tany no nanindriana ny tratran’ny fahavirijiniany.
4Izao no anaran’izy ireo: Oôlà, ny zokiny, ary Oôlibà, ny rahavaviny. Ahy izy ireo teo aloha, ary niteraka zazalahy aman-jazavavy. Ny amin’ny anarany dia izao: I Samaria no Oôlà; i Jerosalema no Oôlibà.
5Nivadika tamiko i Oôlibà#23,5 Nivadika tamiko i Oôlibà; noho izy nivadika ny fitokiana momba ny fanambadiana.; fatra-pitia an’ireo lehilahiny#23,5 Fatra-pitia an’ireo lehilahiny: Ny Asiarianina no lazaina ho lehilahiny. izy, dia ny Asirianina izay nifanila aminy.
6Mitafy jaky ireo, governora ama-mpifehy, tovolahy soa avokoa; mpitaingin-tsoavaly, mitaingin-tsoavaly, 7ka izay nokendreny hijangajangany dia izay voafantina rehetra amin’ny zanaka lahin’i Asiria; ary teo anilan’ireo rehetra ireo, izay nahamatim-pitia azy, dia nandoto tena tamin’ny sampin-dozan’ireo.
8Tsy nahafoy ny fijangajangany tany Ejipta izy; fa efa nanala baraka azy tamin’ny andro fahatanorany izy ireo; nanindry ny tratran’ny fahavirijiniany, ary nandefa taminy ny fahalotoany; 9noho izany natolotro eo#23,9 Natolotro eo, sns. Ny foko folo dia nikaikaika tamin’ny nafitsok’i Fola sy i Teglaty-Falasara, sy tamin’i Salmanazara, ary tamin’i Sargona izay nambabo ny zavatra rehetra navelan’ireo mpialoha azy, sady nandrava ny fanjakan’i Samaria (2Mpa 15,19-29; 17;18). an-tanan’ireo lehilahy izy; dia eo an-tanan’ny zanaka lahin’i Asiria, izay nirehetany fitiavana. 10Nampitanjaka azy izy ireo, nahalasa ny zanany lahy aman-janany vavy; namono azy io tamin’ny sabatra, ka tonga nalaza ratsy tamin’ny vehivavy izy fa niharan’ny fitsarana.
11Hitan’i Ooliba rahavaviny izany, ary nataony mitombo haratsiana mihoatra noho ny azy ny fitiavany; ary ny fijangajangany nanoatra noho ny an’ny rahavaviny. 12Matim-pitia an’ireo zanaka lahin’i Asiria izy, governora ama-mpifehy mifanila tany aminy, mitafy lamba sarobidy, mpitaingin-tsoavaly mitaingin-tsoavaly, samy tovolahy soa avokoa. 13Hitako fa nandoto tena koa izy; lalana iray no nomban’izy roa vavy.
14Ny azy mbola nampiany ny fijangajangany; fa nahita sariolona voahoso-doko#23,14 Sariolona voahoso-doko: Ny rindrin’ny rova any Niniva sy Babilôna dia feno sary mampiseho fikatrohana tamin’ny ady sy ny remby, ka ny Israelita izay tonga tamin’ireo renivohitra mahafinaritra ireo, noho ny raharaham-panjakana na ny varotra, dia mitantara erỳ rehefa miverina avy any. eo amin’ny rindrina izy, dia sarin’ny Kaldeanina voahoso-doko mena. 15Nisy fehikibo ny andilany, sy hamama malalaka teo an-dohany, samy andrian-dehibe avokoa no fijery azy; izany dia sarin’ny zanaka lahin’i Babilôna, ary i Kaldea no tany fiaviany. 16Vao nahita azy ireo ny masony, dia nirehi-pitiavana azy izy, dia nandefa iraka ho any aminy, any Kaldea. 17Ary tonga tao aminy, tao amin’ny fandriam-pitiavany ireo zanaka lahin’i Babilôna, ka nandoto azy tamin’ny fijangajangany, ary izy nandoto tena tamin’izy ireo: dia nadikidiky tamin’ireny indray ny fanahiny. 18Nasehony miharihary ny fijangajangany, nasehony ny fitanjahany; ka nadikidiky taminy ny fanahiko, toy ny efa nahadikidiky ny fanahiko tamin’ny rahavaviny.
19Nampitomboiny ny fijangajangany#23,19 Nampitombo ny fijangajangany: Samy tsy nitsahatra tamin’ny fanompoan-tsampy sy ny fanekem-pihavanana tamin’i Ejipta avy na i Israely na i Jodà.; nahatsiahy ny andron’ny fahatanorany, fony izy nijangajanga tany amin’ny tany Ejipta izy. 20Maimay tamin’ireo mpijangajanga izy, dia tamin’ireo izay rantsam-batam-boriky ny rantsam-batany, ary toy ny an’ny soavaly lahy, ny firehetam-pahalotoany.
21Niverina tamin’ny heloky ny fahatanoranao ianao; dia ny fony nanindrian’ny Ejiptianina ny nononao, noho ny tratran’ny fahavirijinianao.
22Noho izany, ry Oôlibà, izao no lazain’ny Tompo Iaveh: Indro Aho hamporisika hamely anao, ireo lehilahinao, izay efa naharikoriko ny fanahinao; ka hoentiko avy any rehetra any, hamely anao, 23dia ny zanaka lahin’i Babilôna, mbamin’ny Kaldeanina rehetra, ny mpanapaka, ny lehibe, ny andriandahy, mbamin’ny zanaka lahin’i Asiria rehetra koa miaraka aminy, tovolahy soa, samy governora ama-mpifehy avokoa, samy manam-pahefana sy olo-malaza, samy mitaingin-tsoavaly avokoa. 24Ho avy hamely anao ny fiadiana, ny kalesy aman-kodiarana, mbamin’ny firenena maro. Ny ampinga, ny ampinga kely, ny fiarovan-doha, halahany hamely anao; hapetrako amin’ireo ny fitsarana, ka hotsaraina araka ny lalàny ianao.
25Hoentiko hamely anao ny fahasaro-piaroko, ka hasian’izy ireny amim-pisafoahana ianao; harasany ny oronao aman-tsofinao; ho lavon-tsabatra ny sisa aminao; hofaohiny ny zanakao lahy aman-janakao vavy; ho levon’ny afo ny sisa aminao. 26Hendahany ny fitafianao; halainy ny firavakao sarobidy. 27Hatsahatro hatreo ny helokao amam-pijangajanganao any amin’ny tany Ejipta; tsy hanopy maso any aminy intsony ianao, na hahatsiaro an’i Ejipta intsony.
28Fa izao no lazain’ny Tompo Iaveh: Indro hatolotro eo an-tanan’ireo halanao ianao, dia eo an-tanan’ireo maharikoriko ny fanahinao. 29Izy ireo hitondra anao amim-pankahalana, hamabo izay rehetra azonao, hamela anao mitanjaka, dia mitanjaka mihitsy; ary ny fitanjahanao amam-pijangajanganao hihanjahanja. 30Hatao aminao izany, satria nitolo-tena hiraikitra amin’ny firenen-kafa ianao, satria nandoto tena tamin’ny sampiny vetaveta. 31Nizotra ny lalan’ny rahavavinao ianao, ka dia hataoko eo an-tananao ny kapoakany#23,31 Hataoko ao an-tananao ny kapoakany: Ny sazy nafitsoko azy hafitsoko anao koa..
32Izao no lazain’ny Tompo Iaveh: Hosotroinao ny kapoaky ny rahavavinao, kapoaka lalina aty sady be vava; ho fihomehezana sy fandatsana anao izany, fa tsy anerany ny habeny.
33Ho safotry ny hamamoana amam-pijaliana ianao, fa kapoakan-doza amam-pandringanana, ny kapoakan’i Samaria rahavavinao.
34Hosotroinao sy hotaperinao izy, ary hokaikerinao aza ny vakivakiny sy handriatanao ny tratranao; fa Izaho no niteny, - teny marin’ny Tompo Iaveh. -
35Koa izao no lazain’ny Tompo Iaveh: Noho ianao nanadino Ahy, sy nanifika Ahy ho any ivohonao: dia aoka ianao koa mba hizaka ny sazin’ny fahalotoanao, amam-pijangajanganao!
36Ary hoy i Iaveh tamiko: Ry zanak’olona, hotsarainao va i Oôlà sy i Oôlibà? Asehoy azy ny fahavetavetany. 37Satria naka vadin’olona izy ary misy ra ny tanany; fa nitolo-tena hiraikitra amin’ny sampin-dozan’ireny; ny zanany aza izay naterany tamiko, nampamakiny ny afo, mba hohanin’ireny. 38Izao koa ny nataony: Ny fitoerako masina, nolotoiny, tamin’izany andro izany, ny sabatako notevatevainy. 39Nony namono ny zanany ho an’ny sampin-dozany indray izy, dia niditra ao amin’ny fitoerako masina#23,39 Niditra tao amin’ny fitoerako masina: Izany hoe, fanaovana an’i Môlôka sy i Iaveh ho mitovy saranga. Ny tahaka izany indrindra ilay nolazain’ny mpaminany hoe, faniratsirana ny fitoerana masina (ampitahao amin’ny 2Mpa 21,4), androtr’izay ihany, mba hanevateva azy! Izany no nataony tao anatin’ny tranoko.
40Naniraka aza izy haka lehilahy#23,40-41 Naniraka izy haka lehilahy, sns. Ny fanekem-pihavanana tamin’ny Asirianina sy ny Ejiptianina no lazaina amin’izany. avy lavitra, ary izay nandefasana iraka dia indreo izy tonga, ...dia ho an’ireo no nandroanao, nanentenanao ny masonao, nihaingoanao tamin’ny firavako! 41Nipetraka teo ambony farafara be renty ianao, ary teo anoloany dia nanamboarana latabatra, ka nametrahana ny emboka manitra aman-diloiloko. 42Re ao ny fihahohahom-bahoaka#23,42 Fihahohahom-bahoaka: Ny vahoaka be any Niniva sy Babilôna izany. be miadana: ny olona avy any amin’ny fitambaram-bahoaka be, dia mbola nikambanan’ireo mpiboboka avy any an’efitra#23,42 Mpiboboka avy any an’efitra: Dia ny firenena arabo any an-tsisin’i Palestina, izay nanaovan’i Jodà fihavanana., izay nanisy haba ny tanan’izy mirahavavy sy satroboninahitra kanto, teo an-dohany.
43Dia izao no lazaiko amin’ilay vehivavy efa reraka azon’ny fijangajangana: Mbola hanohy ny fijangajangany ihany va re izy, izao? 44Mandeha aminy ny olona toy ny handehanany amin’ny vehivavy janga. Toy izany no nandehanany tamin’i Oôlà sy i Oôlibà, ireo vehivavy meloka ireo. 45Hisy olo-marina anefa hanameloka azy ireo, hiharan’ny sazin’ny vehivavy mpijangajanga, sy ny sazin’ny mandatsa-dra; satria mpijangajanga izy, ary misy ra amin’ny tanany.
46Fa izao no lazain’ny Tompo Iaveh: Mampiakara vahoaka be hamely azy; ka aoka hatolotra ho amin’ny tahotra amam-pandrobana izy. 47Ka aoka ny vahoaka be hanototra vato azy sy hitetitetika azy amin’ny sabany; aoka hovonoina ny zanany lahy aman-janany vavy; ary hodorana amin’ny afo ny tranony; 48hampitsahatra ny fahavetavetana amin’ny tany Aho, ka hahazo anatra amin’izany ny vehivavy rehetra#23,48 Hahazo anatra... ny vehivavy rehetra: Ny firenena rehetra no hahazo anatra amin’izany, dia tsy hanao fahavetavetana tahaka ny nataonareo izy. 49Hatsingerina aminareo ny fahavetavetanareo,
ary holonjoinareo ny sazin’ny nanompoanareo sampy;
dia ho fantatrareo fa Izaho no Tompo Iaveh.
Voafantina amin'izao fotoana izao:
Ezekiela 23: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.