Baròka 3
3
1«Ry Tompo tsitoha Andriamanitr’i Israely ô, fanahy ory sy saina poritra no mitaraina aminao. 2Mihainoa, ry Tompo, ary mamindrà fo, fa nanota teo anatrehanao izahay, 3fa Ianao mipetraka eo amin’ny seza fiandrianana mandrakizay; ary izahay dia maty tsy an-kifody. 4Ry Tompo tsitoha Andriamanitr’i Israely, henoy ny vavak’ireto maty amin’i Israely sy ny taranak’ireo nanota teo anatrehanao, fa tsy nihaino ny feon’ny Andriamaniny ireny, ka fototr’izao loza mipetraka aminay izao.#3,4 Maty amin’i Israely. Noho ny fahoriana mangidy niaretan’ny zanak’i Israely tany amin’ny tany nahalasa babo azy, no nahatonga azy ho toy ny efa maty nalevina tany am-pasana (Ezek 36,12). Na angamba koa io teny io manambara ireo mpaminany masim-pitondrantena tahaka an’i Abrahama, i Isaaka, i Jakôba, sns., izay tsy nitsahatra nivavaka ho an’ny vahoaka ambara-pahafatiny.» 5Aza tsarovanao intsony ny heloky#3,5 Aza tsarovanao...ny helokay. Raha izahay, dia tsy mendrika hovonjenao, sy ny mba hisakana ny fahavalonao tsy haniratsira ny Anaranao (ampitahao Jôs 7,9; 1Mp 8,41; Sal 22,3; Ezek 20,14, sns.). ny razanay, fa ny herinao sy ny Anaranao no tsarovy amin’izao fotoana izao. 6Satria Ianao no Tompo Andriamanitray, ka hidera Anao izahay, ry Tompo. 7Izany no nanaovanao ao am-ponay ny fahatahorana Anao, mba hiantsoanay ny Anaranao; dia hideranay Anao atỳ amin’ny fahababoanay; fa nesorinay tao am-ponay ny heloky ny razanay, izay nanota teo anatrehanao. 8Indreto izahay ankehitriny, atỳ amin’ny fahababoanay, nanelezanao anay, hatao fandatsa, sy fanozona ary onitra, araka ny heloka rehetra nataon’ny razanay, izay nihataka tamin’ny Tompo Andriamanitray.
III NY FAHENDRENA, TOMBON-TSOA NOMENA AN’I ISRAELY
9Mihainoa, ry Israely, ny lalàm-piainana;
manongilàna sofina, hianatra ny fahamalinana.
10Ahoana sy ahoana ange, ry Israely, ity ianao
no atỳ amin’ny tanim-pahavalo;
ka reraka atỳ amin’ny tanin’ny firenen-kafa,
sy mandoto tena amin’ny maty#3,10 Mandoto tena amin’ny maty: Satria ianao miara-mitoetra amin’ny Kaldeanina vahoaka mpanompo sampy, izay manan-toetra mahafa-baraka sady maloto, tahaka ny olona izay nikasika ny tenan’ny maty, na niditra tao amin’ny trano nisy faty (Lev 5,2; 11,25; 22,4; Fanis 19,14). Noho ny fitandremam-pahasalamana, dia natao hoe maloto izay mikasika ny faty, na miditra ao amin’ny trano misy maty; noho izany, dia tsy mahazo manatona ny fivoriana izy, raha tsy efa nidio tena sy nanasa ny fitafiany.,
11ka atao ho anisan’izay efa tafiditra any amin’ny Seoly?
12Nandao ny loharanom-pahendrena Ianao,
13satria, raha nandeha tamin’ny lalan’Andriamanitra ianao,
dia ho nitoetra tamin’ny fiadanana mandrakizay!
14Fantaro izay misy ny fahendrena,
sy ny hery, ary ny fahazavan-tsaina,
mba ho fantatrao miaraka amin’izany koa
izay misy ny fahazavana ho an’ny maso, sy ny fiadanana.
15Iza no efa nahita ny toerana misy ny fahendrena;
ary zovy no efa niditra tao amin’ny firaketany?
16Aiza ny mpanapaka ny firenena,
mbamin’izay nahafolaka ny bibin’ny tany,
17sy izay nilalao ny voromanidina,
18sy nanangona volafotsy amam-bolamena,
izay anankinan’ny olombelona ny fitokiany
sady tsy misy farany ny fananany?
Ireo olona manangona vola, sy misahirana#3,18 Ireo...misahirana: Izany hoe, ny volafotsy sy ny volamena izay nasain’ny mpanapaka ny firenena nohadina tany anatin’ny tany, ka nampanaovana ny karazan’asa rehetra kanto sy sarobidy, voakaly fatratra, ny ankabeazany aza dia tena lavorary mihitsy; ireo nitsembohany ireo dia tsy hahafantarana na hahatsiarovana azy akory. amin’izany,
tsy ho hita soritra akory ny asa nisasarany!
19Fa lasa izy, nidina any amin’ny Seoly,
ary hafa no mitsangana mandimby azy.
20Nisy ihany zatovo nahita ny fahazavana,
ka nonina teto ambonin’ny tany,
nefa tsy nahita ny lalan’ny fahendrena izy;
21na nahalala ny sakeli-dalana akory;
ny zanany koa tsy nahazo an-tsaina azy io;
lavitra ny lalany izy ireo.
22Tsy re nolazaina tany amin’ny tany Kanaana izy,
na hita tany Temàna#3,22 Temàna: tanàna nalaza tany Idomea. Ny olona tao dia nalaza noho ny fahendreny..
23Ireo zanak’i Agara#3,23 Ny taranak’i Agara, izay mitady ny fahendren’ny tany,
ireo mpandranto avy any Merà sy Temàna#3,23 Temàna: Tanàna any Arabia, hafa amin’ilay voatonona ao amin’ny andininy faha-22.;
ireo mpivaofy fanoharana sy ireo mpikaroka fahamalinana,
tsy misy nahalala izay lalan’ny fahendrena,
na nahatadidy ny sakeli-dalany akory.
24Ry Israely ô, akory ny halehiben’ny tranon’i Iaveh,
akory ny halalaky ny tany anjakany!
25Malalaka tsy misy fetra izy,
sady avo tsy hita lany.
26Tany, hatramin’ny fahiny fahagola, no nitoeran’ireo olo-malaza goavam-be#3,26 Olo-malaza goavam-be: Jereo Jen 6,1 sy ny manaraka. Fah 14,6.,
ranjanana sy mahay amin’ny ady.
27Nefa tsy izy ireo no nofidin’Andriamanitra,
ary tsy izy ireo no natorony ny lalan’ny fahendrena.
28Dia maty izy, fa tsy nanana ny fahalalana marina,
maty izy, noho ny hadalany.
29Iza no niakatra tany an-danitra, ka nisambotra ny fahendrena
sy nampidina azy avy amin’ny rahona?
30Iza no nita ny ranomasina, ka nony nahita azy
dia nitondra azy notambazana volamena madio indrindra?
31Tsy misy olona mahalala ny lalany,
na mba namantatra tsara izay sakeli-dalany akory.
32Fa Ilay mahalala ny zavatra rehetra no mahalala azy;
Izy no mahita azy amin’ny fahiratan-tsainy,
dia Ilay nanorina ny tany ho mafy mandrakizay,
sy nameno azy ireo biby manan-tongotra efatra;
33Ilay maniraka ny fahazavana, dia lasa io,
sy miantso azy, dia manaiky amim-pangovitana izy.
34Ireo kintana mamirapiratra eo amin’ny fitoerany,
ka mifaly erỳ,
35dia antsoiny ka mamaly hoe: Indreto izahay!
dia mamirapiratra amin-kafaliana ireo, ho an’Ilay nahary azy.
36Izy no Andriamanitsika
ary tsy misy hafa mitovy aminy.
37Nahita ny lalan’ny fahendrena rehetra Izy
ka nanome izany ho an’i Jakôba mpanompony,
sy ho an’i Israely olo-malalany.
38Raha efa izany, dia niseho teto an-tany Izy
ka niresaka tamin’ny olombelona#3,38 Niresaka tamin’ny olona. Ny Rain’ny Eglizy sy ny mpivaofy Soratra Masina dia samy milaza fa izany teny izany dia manambara ny Fahatongavan’ny Teny ho nofo..
Voafantina amin'izao fotoana izao:
Baròka 3: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.