2Samoela 12
12
Fananaran’i Natàna. Fanenenan’i Davida
1Nirahin’i Iaveh ho any amin’i Davida i Natàna, ka tonga tany aminy izy, dia nanao taminy hoe: «Nisy olona roa lahy, tao amin’ity tanàna anankiray; ny iray mpanan-karena ary ny iray mahantra. 2Ondry aman’omby sesehena no an’ilay mpanan-karena; 3fa ondrivavy kely anankiray novidiny no mba an’ilay mahantra. Nompiany izy ka nitombo tao aminy niaraka tamin’ny zanany, nihinana tamin’ny mofony, nisotro tamin’ny kapoakany, natory teny an-trotroany, ary nataony toy ny zanany vavy. 4Nanam-bahiny kosa ilay mpanan-karena, nefa tsy nety naka tamin’ny ondriny na ny ombiny izy hanamboatra sakafo ho an’ilay vahiny tonga tao aminy; fa ny ondrivavin’ilay mahantra no nalainy sy namboariny, ho an’ilay olona tonga tao aminy.»
5Nirehitra fatratra tamin’izany olona izany ny fahatezeran’i Davida, ka hoy izy tamin’i Natàna: «Raha velona koa i Iaveh dia marina raha tsy mendrika ny hovonoina izay olona nanao izany, 6ary ilay ondrivavy honerany efatra heny#12,6 Ilay ondry vavy honerany efatra heny: satria izany no lalàna (jereo Eks 20,37, ampitahao amin’ny Lk 19,8)., noho izy nahavita an’izany sy tsy nanana antra.» 7Dia hoy i Natàna tamin’i Davida: «Tsy iza fa ianao izany olona izany. Ka izao no lazain’i Iaveh Andriamanitr’i Israely: Nanosotra anao ho mpanjaka amin’i Israely Aho, ary nanafaka anao tamin’ny tanan’i Saola; 8ny tranon’ny tomponao nomeko anao; ny vadin’ny tomponao nataoko teo am-pofoanao; ny taranak’i Israely sy i Jodà natolotro anao, ary raha kely loatra izany mbola ho nampiako izao sy izao koa. 9Ka nahoana no nanamavo ny tenin’i Iaveh ianao, fa nanao izay ratsy eo imasony? I Oria Heteanina nasianao ny sabatra, ny vadiny nalainao ho vady, izy novonoinao tamin’ny sabatry ny taranak’i Amôna! 10Koa ankehitriny noho ianao nanamavo Ahy, sy naka ny vadin’i Oria Heteanina, ho vadinao, dia tsy hiala amin’ny taranakao mandrakizay kosa ny sabatra. 11Izao no lazain’i Iaveh: Indro fa ny ankohonanao, hananganako ny loza hihatra aminao; ny vadinao hotsoahako eo imasonao, ka homeko ny mifanolo-bodirindrina aminao, izay handry aminy eo anatrehan’izao masoandro izao; 12fa ianao dia mangingina no nanaovanao izany, ary Izaho kosa dia eo imason’i Israely rehetra sy anatrehan’izao masoandro izao no hanaovako izany.»
13Dia hoy i Davida tamin’i Natàna: «Nanota tamin’i Iaveh aho!» Fa hoy kosa i Natàna tamin’i Davida: «Navelan’i Iaveh ny helokao, ka tsy ho faty ianao. 14Nefa nampanesoinao an’i Iaveh ny fahavalony tamin’izany zavatra nataonao izany; ka noho izany dia ho faty ny zanaka naterakao.» 15Dia lasa nankany an-tranony i Natàna.
Ny nahafatesan’ny zanak’i Betsabea
Ny nahaterahan’i Salômôna
Ary nasian’i Iaveh ny zaza naterak’i Oria, tamin’i Davida, ka nandraiki-narary mafy. 16Nivavaka tamin’Andriamanitra ho an’ny zaza i Davida sady nifady hanina; ary niditra izy ka nandry tamin’ny tany nandritra ny alina. 17Ka niangavy mafy taminy ny loholona tao an-tranony, mba hampiarina azy amin’ny tany; nefa tsy nety izy, ary tsy niara-nihinana tamin’ireo. 18Nony tamin’ny andro fahafito, maty ny zaza, ka natahotra ny hilaza ny nahafatesany tamin’i Davida ny mpanompony, fa hoy ireo: «Fony mbola velona aza ny zaza, niteny taminy isika fa tsy nohenoiny ny feontsika, ka hataontsika ahoana no filaza aminy hoe: maty ny zaza! Vao mainka loza no hafitsony.» 19Hitan’i Davida nitakoritsika ny mpanompony, ka fantatr’i Davida fa maty ny zaza. Hoy i Davida tamin’ny mpanompony: «Maty angaha ny zaza?» ary hoy ireo: «Maty izy.» 20Dia niarina tamin’ny tany i Davida ka nandro, nihosotra diloilo#12,20 Ka nandro, nihosotra diloilo, sns. Raha avy nisaona ny olona, dia nandro sy nihosotra. sy nanova fitafiana#12,20 Nanova fitafiana. Navelany ny akanjom-pivalozana nanaovany., dia nankao an-tranon’i Iaveh#12,20 Nankao an-tranon’i Iaveh. Tsy nila fidiovana manokana i Davida vao hankao an-tranon’i Iaveh; satria tsy niditra am-paty na nandevina izy. izy ary niankohoka. Nony nody tao an-tranony izy nangataka horosoana sakafo dia nihinana. 21Ka hoy ny mpanompony taminy: «Izao ataonao izao kosa no mba ahoana? Fa fony mbola velona ny zaza, nifady hanina sy nitomany ianao, nony maty kosa ny zaza ankehitriny, miarina sy mihinana mofo ianao?» 22Dia hoy izy: «Fony mbola velona ny zaza nifady hanina sy nitomany aho; fa hoy aho anakam-po: Iza no mahalala? Hamindra fo amiko angaha i Iaveh ka ho velona ihany ny zaza. 23Fa rehefa maty kosa izy ankehitriny dia ahoana indray no hifadiako hanina? Mahay mamerina azy indray va aho? Izaho no hankany aminy, fa izy tsy hiverina hankatỳ amiko intsony!»
24Nanala alahelo an’i Betsabea vadiny i Davida dia nankao aminy, ka nandry taminy. Ary tera-dahy ravehivavy, ka nataony hoe Salômôna#12,24 Salômôna, olona mpampihavana, tia fihavanana, no hevitry ny anarany. no anarany: tia azy i Iaveh, 25ka naniraka hilaza izany tamin’ny alalan’i Natàna, mpaminany, izay nanome anarana azy hoe i Jedidiah#12,25 Jedidiah: izany hoe: ankasitrahin’ny Tompo. Amin’ny teny Hebrio: tian’Andriamanitra., noho ny amin’i Iaveh.
Ny nahazoana an’i Rabà
(Jereo 1Tan 20,1b-3)
26Ary i Jôaba ilay nanao fahirano an’i Rabàn’ny taranak’i Amôna, dia nahafaka ny tanànam-panjakana#12,26 Tanànam-panjakana: Angamba ilay atao hoe Tanànan’ny rano voalaza ao amin’ny andininy 27 no izy. Mbola hita tsara ankehitriny any Amàna io tanàna io, izay tena andehanan’ny rano tokoa.. 27Ka naniraka olona tany amin’i Davida i Jôaba hanao aminy hoe: «Nataoko fahirano i Rabà, ary efa afako ny tanànan’ny rano. 28Koa ankehitriny vorio ny vahoaka sisa, dia avia ianao hitoby hamely ny tanàna sy haka azy, fandrao dia ny tenako no maka ny tanàna ka hantsoina amin’ny anarako izy.» 29Dia novorin’i Davida ny vahoaka rehetra ary nankany Rabà izy namely azy ka nahazo azy. 30Nesoriny teny an-dohan’ny mpanjakan’izy ireo, ny satroboninahiny#12,30 Satroboninahiny: izany dia milaza satroboninahitr’i Davida izay misy vatosoa sarobidy. lanjana talenta volamena iray, izay nisy vatosoa anankiray ka natao teny an-dohan’i Davida. Ary babo be dia be no nentiny avy ao an-tanàna. 31Ary ny vahoaka hita tao dia navoakany ka napetrany hiasa amin’ny tsofa#12,31 Hiasa amin’ny tsofa: izany hoe, hampanaovina raharaha mafy., sy ny pika vy, mbamin’ny famaky vy, ary nafindrany tamin’ny fanefem-biriky. Nataony toy izany avokoa ny tanànan’ny taranak’i Amôna. Dia niverina nankany Jerosalema i Davida sy ny vahoaka rehetra.
Voafantina amin'izao fotoana izao:
2Samoela 12: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.