1Samoela 2
2
Tononkiran’i Anà#2,1 Tononkiran’i Anà: Io tononkira nataon’i Anà io dia mahagaga fa misy fitoviana be dia be amin’ilay tononkira nataon’i Masina Maria. Ampitahao ny and 1, amin’i Lk 1,46-48; andininy 2-3 amin’i Lk 1,49-50; ny andininy 4-8 amin’i Lk 1,51-53, ary ny and 9-10 amin’i Lk 1,54-55.
(Jereo Sal 2; 18; Lk 1,45-55)
1Ary nivavaka i Anà ka nanao hoe:
«Ny foko misomebin-kafaliana amin’i Iaveh,
ny tandroko#2,1 Ny tandroka: Ny tandroka manambara ny hery amam-pahendrena. nasandratr’i Iaveh,
ny vavako misokatra hamely ny fahavaloko;
fa mifaly amin’ny famonjenao aho.
2Tsy misy masina tahaka an’i Iaveh,
fa tsy misy afa-tsy Ianao no Izy;
tsy misy vatolampy tahaka ny Andriamanitsika.
3Aza dia fatra-piteny avonavona
na mamoaka vava midaondaom-poana.
Fa Andriamanitra mahalala ny zavatra rehetra i Iaveh,
ary velon-ko tsinontsinona ny asan’ny olombelona.
4Ny olo-mahery tapa-tsipìka
fa ny osa kosa misikina hery.
5Ny voky taloha mikarama mofo,
fa ny noana kosa afa-kanoanana;
ny momba aza miteraka fito,
fa ny maro anaka kosa mihamalazo.
6I Iaveh no mahafaty sy mahavelona;
mampidina any amin’ny fonenan’ny maty sy mampiakatra avy any koa.
7I Iaveh no mampahantra sy mampanan-karena.
Izy no mampietry sy manandratra.
8Esoriny amin’ny vovoka ny mahantra;
atsangany hiala amin’ny zezika ny tsy manana,
hampiarahiny mitoetra amin’ny mpanjaka,
ary homeny seza fiandrianana be voninahitra ho anjarany.
Fa an’i Iaveh ny andrin’ny tany,
ary teo amboniny no nametrahany ny tany.
9Ny dian’ny olo-masina hotandremany,
fa ny ratsy fanahy kosa ho very any amin’ny maizina.
Satria tsy ny hery no hahombiasan’ny olona.
10I Iaveh! ho torotoro ny fahavalony,
any ambonin’ny lanitra no hikotrohany amin’ireny;
hotsarain’i Iaveh ny vazantany rehetra.
Homeny hery ny mpanjakany#2,10 Ny mpanjaka, ny nohosorany: Izany dia sady milaza an’ilay Mpanjaka ara-panahy, Jesoa Kristy, no sady manondro ny mpanjaka ara-nofo ho an’i Israely, dia i Davida sy ny taranany, izay voatendry hivoahan’ny Mesia.,
ary hasandrany ny tandroky ny nohosorany#2,10 Hasandrany ny tandroky ny nohosorany: Ny fahefan’ilay Voahosotr’i Iaveh, dia hiantomboka hatramin’ny fanjakana feno fandresen’i Davida, ary mbola hitohy ihany amin’ireo taranany rehetra izay handresy ny fahavalon’Andriamanitra sy ny fanjakany, ka hihamandroso ambara-pahatapitr’izao tontolo izao..»
11Dia nandeha i Elkanà nody tany an-tranony any Ramà; ary ny zaza nijanona nanompo an’i Iaveh teo anatrehan’i Helì, mpisorona.
Ireo zanak’i Helì
12Ary ny zanak’i Helì dia olon’i Beliala, tsy nahalala an’i Iaveh akory; 13fa izao no fanaon’izy mpisorona tamin’ny vahoaka: Raha misy olona manatitra sorona, dia tamy ny mpanompon’ny mpisorona dieny mbola andrahoina ny hena sady mitondra fitrebika telo rantsana izy; 14dia atsobony ao anatin’ny vilany lehibe na nongo na vilany, na vilanin-daoka; ka izay rehetra azon’ny fitrebika avy ao, dia alain’ny mpisorona ho azy. Ataony toy izany avokoa ny Israelita tonga ao Silao. 15Mbola tsy voadoro akory ny sabora, dia tonga ny mpanompon’ny mpisorona, milaza amin’izay manatitra sorona hoe: «Omeo hena aho, hatsatsika ho an’ny mpisorona, fa tsy handray hena masaka aminao izy, fa ny mbola manta ihany.» 16Ary raha miteny aminy ny olona manao hoe: «Aoka aloha hodorana hanetona ny sabora, vao izay vao maka izay tianao ianao» dia valian’ity mpanompo manao hoe: «Tsia, omeo ankehitriny izao ihany, fa raha tsy izany dia halaiko ankehitriny.» 17Ka dia heloka be vava teo anatrehan’i Iaveh ny an’ireo zatovo ireo, satria nahatarika fanaratsiana ny fanatitra ho an’i Iaveh izany olona izany.
I Samoela tany Silao
18Nanao ny fanompoana teo anatrehan’i Iaveh i Samoela, ary efôda rongony no natafiny ny zaza. 19Nanaovan-dreniny akanjo kely izy, nentiny ho azy isan-taona, rehefa miara-miakatra amin’ny vadiny izy, hanatitra ny sorona fanao isan-taona. 20Ary i Helì nitso-drano an’i Elkanà mivady ka nanao hoe: «Homen’i Iaveh taranaka amin’ity vehivavy ity anie ianao noho ny fanomezana nataony ho an’i Iaveh.» Dia lasa nody izy ireo. 21Novangian’i Iaveh i Anà, ka nanana anaka, dia niteraka telo lahy sy roa vavy. Ary i Samoela kely nitombo teo anatrehan’i Iaveh.
Ireo zanak’i Helì ihany
22Efa antitra dia antitra i Helì, ary nandre ny nataon’ny zanany tamin’i Israely rehetra izy, sy ny nandriany tamin’ny vehivavy nanompo teo am-baravaran’ny trano lay fihaonana, 23ka nanao taminy hoe: «Ahoana no anaovanareo izany zavatra izany? Fa reko amin’izao vahoaka rehetra izao ny ratsy ataonareo. 24Tsia, anaka, tsy tsara ny vavam-bahoaka reko; fa mampanota ny vahoakan’i Iaveh. 25Raha olombelona no anotan’olombelona dia Andriamanitra no mitsangan-ko elanelam-panahy, fa raha i Iaveh kosa no anotàny#2,25 Raha i Iaveh kosa no anotàny. Ny fahotana ataon’ny olona amin’ny namany dia hahazoana famelana moramora kokoa, satria tsy mihatra amin’Andriamanitra mivantana. Fa ny fahotana momba ny fanompoana an’Andriamanitra kosa dia sarotra havela: satria manohitra an’Andriamanitra an-kitsirano., iza no hifona ho azy?» Tsy nihaino ny feon-drainy anefa izy fa ny hahafaty azy no sitrak’i Iaveh#2,25 Ny hahafaty azy no sitrak’i Iaveh: Efa nihamafy ny fon’ireo zanak’i Helì, ka tsy mety mibebaka intsony izy.. 26I Samoela kely kosa, nitombo nitombo ihany, ary sitrak’i Iaveh sy ny olombelona.
Fanambaràna ny sazy
(Jereo 1Sam 3,11-14)
27Ary nisy olon’Andriamanitra#2,27 Ary nisy olon’Andriamanitra; ampitahao amin’ny 1Tan 5,8-15. anankiray tonga tao amin’i Helì ary nilaza taminy hoe: «Izao no lazain’i Iaveh: Tsy efa niseho mazava tamin’ny ankohonan-drainao va Aho, fony izy mbola tany Ejipta tao an-tranon’i Faraôna? 28Nofidiko tamin’ny fokon’i Israely rehetra izy ho mpisoroko, hiakatra amin’ny ôteliko, handoro zava-manitra, hitafy ny efôda eo anatrehako, ary nomeko ny tarana-drainao ny fanatitra rehetra ataon’ny zanak’i Israely amin’ny afo. 29Ka ahoana no dia nohosenareo amin’ny tongotrareo ny sorona amam-panatitra ho Ahy izay nodidiako haterina ao amin’ny fonenako? Ary nahoana no dia ny zanakao indray no omenao voninahitra mihoatra noho Izaho, fa anatavezanareo tena ny tsara indrindra amin’ny fanatitra rehetra avy amin’i Israely vahoakako. 30Noho izany, izao no tenin’i Iaveh Andriamanitr’i Israely: Fa efa voalazako fa ny taranakao sy ny tarana-drainao no handeha eo anatrehako mandrakizay; nefa ankehitriny, aza ho toy izany intsony, hoy i Iaveh. Fa izay manaja Ahy no hohajaiko#2,30 Izay manaja Ahy, no hohajaiko: Nony maty i Oziasa mpisorona lehibe, taranak’i Aarôna tamin’i Eleazara, ny fisoronana (tsy fantatra loatra izay andro niandohan’izany), dia nifindra tamin’i Helì, taranak’i Itamara; nefa noho ny faharatsiam-panahin’i zanak’i Helì izay mpaniratsira an’Andriamanitra sy ny lalàny, dia nesoriny taminy izany (jereo Eks 29,9; ampitahao amin’ny Fanis 25,13); sazy nahavoa ny tranon’i Helì izany., ary izay maniratsira Ahy no hotsiratsiraiko koa. 31Indro tonga ny andro hanapahako ny sandrinao sy ny sandrin’ny tarana-drainao, ka tsy hisy lehilahy tratra antitra intsony amin’ny taranakao. 32Ianao hahita ny fonenanao amin’ny fotoana hamenoan’Andriamanitra soa an’i Israely: ary amin’ny taranakao tsy hisy lehilahy tratra antitra intsony, na oviana na oviana. 33Tsy hofongorako tsy ho eo amin’ny ôteliko avokoa ny lehilahy rehetra amin’ny taranakao mba hahajemby ny masonao sy handreraka ny fonao, nefa ho faty amin’ny taonan’ny fahatanjahany avokoa ny solofo rehetra amin’ny taranakao. 34Ary ho famantaranao izany, ny hanjò ny zanakao roa lahy, dia i Ofnì sy i Finea, fa ho indray andro maty#2,34 Indray andro maty: Na dia maty aza izy roa lahy, ny taranak’i Helì hafa dia nifandimbindimby nitana ny maha-mpisorona azy ihany, hatramin’ny nifindran’izany fiamboniana izany tamin’i Sadaoka, tamingan’i Eleazara, tamin’ny andro nanjakan’i Salômôna, ka hatramin’ny naharavan’ny firenen’ny Jody. izy roa lahy. 35Ary hanangana mpisorona mahatoky#2,35 Mpisorona mahatoky: Izany faminaniana izany, dia tanteraka tamin’i Samoela izay nandimby an’i Helì. Nanao raharaha lehibe izy: Mpaminany, mpitsara, mpisorona, tsy hoe mpisorona lehibe anefa akory; ny Soratra Masina dia tsy miantso azy na oviana na oviana amin’izany anarana izany. Fa tamin’i Sadaoka indrindra no nahatanterahan’io faminaniana io. Aho, izay hanao araka ny foko sy ny fanahiko ary hanorenako trano mafy orina izy, ary handeha eo anatrehan’ny voahosotro mandrakizay. 36Ka ho avy hiankohoka eo anatrehany avokoa izay sisa tavela amin’ny taranakao, hangataka lela-vola na sombi-mofo kely, ary hiteny hoe: Raha sitrakao mba omeo anjara kely eo amin’ny raharaham-pisoronana aho, mba hahazoako mofo kely hohanina#2,36 Mba hahazoako mofo kely hohanina; Izany teny izany milaza ny fara fahantrana hahazo ny taranak’i Helì..»
Voafantina amin'izao fotoana izao:
1Samoela 2: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.