San Mateo 13
13
Tsíri jatsiriri uandantskua
(Mc 4.1-9; Lc 8.4-8)
1Imani jurhiatekua jimbojtu Jesusi uéraspti ka japundarhu uanamukuni uaxakaspti. 2Ka uánekuaksï andarheraspti, ka Jesusi icharhutani jataspti ka uaxakaspti, ka iámenduechaksï japundarhu uanamukuni pakaraspti. 3Mámaru ambe uandaxekuasïrempti uandantskua terukutarantskua jimbo, arhiaparini: “Tarheri ma niraspti tríju k'uájpani. 4Ka k'uajpani jámani, máruksï tríjuecha xanhari jimbo andatseraspti ka kuínichaksï ántskantaspti. 5Máteruksï tsakapendu andatseraspti, jima enga no káni echeri jápka, ka jima sóntku andaraspti jimboka no kánekua inchatsespka; 6k'óru tata jurhiata andaratini, tríjuni k'arhiraspti, jimboka sïrangua no inchatsespka. 7Máteruksï akarhenirhu andatserasti, ka enga akarheni k'épka ójchakuraaspti. 8Ka máruksï ambakiti echerirhu andatseraspti, ka sési andaraspti; máruksï iúmu ekuatsechani tríju jukaspti, máteruksï tanimu ekuatsechani, ka máteruksï ma ekuatse témbenichani jukaspti. 9Ne enga jurhenaka kurhani, kurhangunte.”
Andi enga Jesusi uandantskuechani jimbo jurhentpempka
(Mc 4.10-12; Lc 8.9-10)
10Jurhengorheri jémbechaksï Jesusini andarheraspti ka kurhamarhesptiksï: “¿Andirisï terukutantskuecha jimbo uandaxekuajki?” 11Ka Jesusi arhiantaaspti: “Jimbokajtsï cha mítetaranhaska auandarhu anapu irechekua ambe enga no mítekorheka, ka indeksï no mítetaranhasti. 12Ima enga jatsikorheka sánderu intsïnhaatiteru ka sánderu kánerakorheati, ka ima enga no jatsikorheka euanhantaati sáni ambe enga jatsikorheka. 13Jimbosïni terukutantskuechani jimbo uandaxekuajka, jimbokaksï inde éskaxaka ka nóksï exesïndi, kurhasïndiksï ka nóksï kurhangusïndi. 14Indecha jimbo úkorhexati ambe enga Diósïri uandari Isaiasi uandaka:
‘Na uéjkiksï xáni kurhani jarhani,
nóksï kurhanguati,
ka náuejkiksï éskani jarhani,
nóksï exeati.
15Jimboka i ireteri mintsita
chuperi úkorhetixaka,
ka mínharhikorhestiksï jimbokaksï
no uékasïnga exeni,
ka níksï mintsita jinguni kurhangukuekajki,
jimbokajtsïni no uékasïnga andarhentaani,
ka ji no úaka ambakerantaani.’”
16“Cha k'óru tsípe je, jimbokajtsï exexaka ka kurhanguxakajtsï. 17Sési jimboksïni arhixaka, eskaksï uánekua Diósïri uandaricha ka kaxumbitichaksï, exekuekaska ka kurhaakuekanksï íni ambe engajtsï cha exeni jaka ka kurhani jarhani, ka nóksï exesti.”
18“Kurhaa je, ambe enga arhikuekajka tarheriri uandantskua: 19Ima engaksï irechekueri uandakuani kurhajka, ka nóksï kurhanguni, ísïstiksï eska tríju enga xanhari jimbo andatseraka; nóambakiti janokusïndi ka aiangperatani k'arhuaskamaasïndi enga mintsitarhu júkskakata jápkia. 20Ka ima tríju enga tsakapendu andatseraka, imechani arhikuekaaxati engaksï uandakuani kurhajka ka tsípekua jingunksï p'irani, 21ka enga no úka sïrangua jukani, nóksï úsïndi p'íngukorheni ka tsîrhukusïndiksï engaksï aiangperakua jimbo ts'éjkunhajka ka nósesiksï kánhani. 22Ka ima tríju enga akarhenirhu andatseraka, imechani arhiaxati engaksï uandakuani kurhajka, ka iásï anapu uandanheata, ambe káneranhchakua ambe ka jatsikorhekua tandojchpíri, mirikutaasïndi íni uandakuani ka tsîrhukusïndiksï. 23Ka ima k'óruia enga ambakiti echerirhu andatseraka, imestiksï engaksï uandakuani kurhajka ka kurhanguni ka sési ambeksï úni, eska tríju enga iúmu ekuatsechani ka tanimu ekuatsechani ka ma ekuatse témbenichani píntsïta andatajka.”
Tríjueri ka uitsakueri uandantskua
24Jesusi máteru arini uandatskua terukutarantskua arhiaspti: “Auandarhu anapu irechekua, acheti méni jáxesti enga ambakiti tríju k'uájpapka. 25Ka enga k'uínhani jápka, ma enga kurhunhempka tríju jatsikatarhu inchaakukuspti, ka tríju jeramba k'uájpakuspti ka níntaspti. 26Enga tríju andarapka ka píntsïta andatani jarhania, tríju jerambajtu andaraspti. 27Ka ánchekorherichaksï andarheraspti ánchetpirini arhini: ‘Tata, ¿Andi nóri ambakiti tríju jatsikuski? ¿Andisï jeramba andara?’ 28Ka ima arhiaspti: ‘Ima ísï niátasti engarini kurhunhejka,’ ka ánchekorherichaksï arhispti: ‘¿Niua jucha uitsakuani muruatani?’ 29Ka ima arhiaspti: ‘Nómbe, jimbokajtsï jerambani muruatatini tríjuntujtsï muruteraaka. 30Jurajku je eskaksï májku k'éri andaraaka, ka uarhojpantskuarhu, uarhoatatichani arhiauaka eskaksï jerambani urheta p'ikuaka, ka eskaksï kurhintaaka; ka eskajtsïni tríjuni jatakuarhu patsachentaaka.’ ”
Mostaseri uandantskua terukutarantskua
(Lc 13.20-21)
31Jesusi máteru uandantskua aianguaspti arhiaparini: “Auandarhu anapu irechekua xakua mostaseri tskípueni jáxesti, enga acheti ma ikarapka. 32Sési jimbo, inde iámendu tskípuecha jinguni sánderu sapinharhisti, ka k'óru enga k'éjka, p'ukutapueni k'ésïndi engaksï kuínicha jamberi xerekua úrhutajka.”
Xarhiperakueri uandantskua terukutantskua
(Lc 13.20-21)
33Ka máteru uandatskua arhiaspti: “Auandarhu anapu irechekua, xáxesti eska xarhiperakua, enga uarhiti ma tanimu k'uetsaperakata jarinarhu jeuetaka.”
Úkorhesti ambe enga karakata arhimpka
(Mc 4.33-34)
34Jesusi íni ambe uandantskua terukutarantskua jimbo arhijpesti, ka enga no terukutarantskuechani jimboepiringa nómbema arhiasïrempti. 35Ka ísï úkorhesti ima enga Diósïri uandari uandapka:
“Uandatskua terukutarakuechani jimbo uandaaka;
xarhataaka ambe enga no mítekorheka
jiájkantki uératini enga Diósï parhakpeni kueraaka.”
Jesusi uitsakueri uandantskua jánhastpesti
36Jesusi tsîngpentaspti ka k'umanchekuarhu inchaspti. Ka jurhengorheri jémbechaksï andarheraspti ka arhisptiksï: “Tríju jeramberi uandatskuajtsïni jánhasta.” 37Ka Jesusi arhiantaaspti: “Tríju ambakiti jatsiri, Acheti Uájpesti. 38Ka echeri enga tríju k'uájpanhajka, parhakpenisti; ambakiti tríju, irechekua uájpesti, ka tríju jeramba nóambakiti uájpesti. 39Kurhunhpiri enga tríju jeramba jatsikupka, nóambakitisti, ka uarhojpantskua parhakpeni k'amakurhikuesti, ka uarhojpantstichaksï ánjelichesti. 40Eskamendu tríju jeramba na muruatanhajka ka chpírirhu k'uanijpanhani, májkueniuati parhakpeni k'amakurhikua. 41Acheti Uájpa ánjeli jémbechani axauati imeri irechekuarhu, eskaksï iámendu terungutpirichani ka nósesi ambe úrichani tánantauaka, 42ka chpírirhuksï k'uanijpauati; jimeuati uekua ka sînichani kirisïmeantaani. 43Jimajkanksï kaxumbiticha Tátjemberi irechekuarhu, tata jurhiateni meremerexeni jauati. Ima enga jurhenaka kurhani, sési kurhangue.”
Uandantskua jatsikorhekueri enga jískakata jaka
44“Ka ístu auandarhu anapu irechekua xáxesti eska jatsikorhekua enga inchaskunhajka. Ka acheti ma xékorhentasti ka ménderu jimajku túskuntani, ka xáni tsípeni, jatsikorhekua ambe atarantasti ka imani echerini piántasti.”
Ambakiti tsakapu meriariri uandantskua
45“Ka ístu auandarhu anapu irechekua, ambe atarantstini jáxesti enga tsakapu meriari jirinhantani jámani jápka, 46ka enga ambakiti tsakapuni exentapka, níntaspti ka jatsikorhekua ambe atarantaspti ka tsakapu merearini piántaspti.”
Cheremakueri uandantskua
47“Ka ístu auandarhu anapu irechekua, cherematarakueni jáxesti enga japundarhu k'uanimanhatini iámendu jásï kuruchechani p'ímajka. 48Ka enga kuetsaperhujka, japundarhu uanamukutinksï péntasïndi ka jimaksï uaxandentasïndi erarhentani, kurucha ambarhatichanksï tsïkiatarhu jatsirasïndi, ka nóambarhatichanksï kuanikuasïndi. 49Ísïuati parhakpeni k'amakurhikua: Ánjelichaksï uéraati ka no ambarhati k'uiripuechanksï, engaksï kaxumbiticha jinguni jámani jauaka, jarharetauatiksï, 50ka nóambarhati k'uripuechanksï chpírirhu k'uanijpauati. Jimaksïsï ueraati ka sînichani kirisïmeantaani.”
Jimbanhe ka tamapu ambe
51Jesusi kurhamarheaspti: “¿Kurhanguxakijtsï?” Ka imaksï: “Jo” Arhintaspti. 52Ka Jesusi arhiaspti: “Ísï jimbo juramukua jurhentpiri ma enga kurhangujkia auandarhu anapu irechekuani, achamasï méni jáxesti enga imecho jimbanhe ambe ka tamapu ambe petajka.”
Jesusi Nasareti níntasti
53Enga Jesusi k'amarapka íni uandantskua aianguntaani, kéndikuspti. 54Ka imeri iretarhu niántaspti, ka jima anapu k'umanchekua tángorhentskuarhu jurhentpesïrempti, ka ísku pakareranhasïrempti eratsenhantani ka uandanhsïrempti: “¿I nani xáni mímixeski, ka néna úasïnki íni milagruechani? 55¿Andi no ísï tekari uájpe? ¿Andi no Maria arhinhasïnki amamba? ¿No ísï Jakobueri ka Joseri ka Simoniri ka Júdasïri erachi jémbe? 56¿Andi nóksï piremba jémbecha juchantsïni jinguni irekaski? ¿Andi nani uératini juásïnki indeni ambe?” 57Ka imeri ambeksï mámaru ambe uandasïrempti. K'óru Jesusi arhiaspti: “Iápuru ísïksï Diósïri uandarini ma sési arhisïndi, ka imeri iretarhu nómbe ka ni chéni jémbo.”
58Ka jima namuntku milagruechani úaspti jimbokaksï imani no mintsikasïrempka.
Voafantina amin'izao fotoana izao:
San Mateo 13: DKPJ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Biblia en P´urhépecha, Michoacán, México © Sociedad Bíblica de México, A.C.
