UBWANDILO 1
1
Ukupeligwa kwa kisu
1Pabwandilo Kyala apelile ikisu ikya kumwanya nikya pasi. 2Ikisu kya pasi kikali nububumbe nabumo kangi kikali nakandu nakamo, ingisi yali pamwanya pa misi amasolofu; mbepo gwa Kyala alinkwendenda pamwanya pa misi. Kyala alinkuti, 3#2 Kor 4.6“Luyeko ulumuli.” Popapo lulinkuyako ulumuli. 4Umwene Kyala alinkuluketa ulumuli alinkwaga lununu; popapo alinkupagulania ulumuli ningisi. 5Alinkulupa ulumuli lula ingamu iya “Musi,” iyene ingisi yo alinkuyipa ingamu iya “Kilo.” Lulinkuya lubunju, kangi galinkuya mayolo, ilisiku lya kwanda.
6 #
2 Pet 3.5
Popapo Kyala alinkuti, “Guyepo umwela pakati pa misi, go gugatapulaniege amisi.” 7Alinkupela umwela, ukugatapulania amisi aga gali kumwela kusi namisi aga gali pamwela pamwanya. 8Silinkuya bo bunobuno. Kyala alinkugupa umwela gula ingamu iya “Kumwanya.” Lulinkuya lubunju, kangi galinkuya mayolo, ilisiku lya bubili.
9Popapo Kyala alinkuti, “Amisi ga kumwela kusi gabungane mbuyo bumobwene, ukuti ikisu ikyumu kibonekege.” Silinkuya bo bunobuno. 10Kyala alinkulapa ikisu ikyumu “Mfu,” amisi aga gabungene palikimo ingamu iya “Nyanja.” Kyala alinkuketa alinkwaga nnunu itolo. 11Popapo Kyala alinkuti, “Ikisu kimesyege ifyakumela: fyo fibyaligwa ifi fili nimbeyu nkati; nimipiki igi gikupa iseke isi sili nimbeyu nkati, akabyaligwa kosa ukufwana nikikolo kyake.” Silinkuya bo bunobuno. 12Ikisu kilinkumesya ifyakumela, fyo fibyaligwa ifi fili nimbeyu nkati, ni mipiki igi gikupa iseke isi sili nimbeyu nkati: akabyaligwa kosa ukufwana nikikolo kyake. Kyala alinkusiketa silinkuya nnunu itolo. 13Lulinkuya lubunju, kangi galinkuya mayolo, ilisiku lya butatu.
14Kyala alinkuti, “Siyemo imuli mmwela gwa kumwanya, isya kupagulania umusi nikilo; syo sipelege ukuya fimanyilo fya kumanyilamo utubalilo, namasiku, nifyinja. 15Syo simulikege mmwela gwa kumwanya sikipege ikisu ulumuli.” 16Silinkuya bo bunobuno. Kyala alinkupela imuli ingulumba ibili, ulukulumbapo lulinkuya lwakugulagila umusi, ulunandipo lulinkuya lwakukilagila ikilo; kangi alinkupela nindondwa. 17Kyala alinkusibika imuli isi mmwela gwa kumwanya, ukukimulika ikisi, ukulagila akabalilo ka pamusi na ka pakilo, 18nukuti fyo fipagulaniege ulumuli ningisi. 19Kyala alinkusiketa, silinkuya nnunu itolo. Lulinkuya Lubunju, kangi galinkuya mayolo, ilisiku lya buna.
20Popapo Kyala alinkuti, “Mmisi fiyemo ifya bumi fi fingi itolo, ninjuni sipululukege pamwanya pakisu mumpalanga.” 21Bunobuno Kyala alinkufipela ifikulumba ifya mu nyanja nifipeligwa fyosa, ifi fikwendenda kangi nifya bumi fyosa ifi fiyelile itolo mmisi, ukufwana nuluko lwabo; kangi ninjuni sya mumpalanga uluko nu luko. 22Kyala alinkufiketa lilinkuya finunu itolo. Alinkunsaya alinkuti, “Molokege, mwisule mmisi ga mu nyanja, syope ninjuni sibale pakisu.” 23Lulinkuya lubunju, kangi galinkuya mayolo, ilisiku lya buhano.
24Kyala alinkuti, “Ikisu kiye nifipeligwa ifya luko nu luko; ing'ombe kangi nakandu kosa aka kikwendela ulwanda, nifinyamana fyosa ifya ndisu, ifinywamu nifinandi ifya luko nuluko.” Silinkuya bo bunobuno. 25Kyala alinkufipela ifinyamana pa kisu ukufwana nuluko lwabo, ing'ombe sya luko nuluko, na fyosa ifi fikwendela ulwanda ifya luko nuluko. Kyala alinkufiketa filinkuya finunu itolo.
26 #
1 Kor 11.7
Popapo Kyala alinkuti, “Oko, tumpelege umundu nkifwani kyitu, ayege bo yuyuswe; yo ayege gwakulagila paswi sya mu nyanja, na panjuni sya mumpalanga, pang'ombe kangi na pafinyamana fyosa ifya nkisu, na pa tundu tosa utu tukwendela ulwanda.” 27#Bwa 5.1-2#Mat 19.4; Mar 10.6Momuno Kyala alinkumpelela umundu nkifwani kyake; nkifwani kyake yuyo Kyala mo alinkumpelela unyambala nunkikulu. 28Kyala alinkubasaya, kangi alinkubabula alinkuti, “Molokege, mwisule nkisu, kangi mukilambikege, muyege balagili paswi sya mu nyanja, panjuni sya mu mpalanga, na pakandu kosa aka lukwendela ulwanda.” 29Kyala alinkuti, “Keta, mbapele umwe fyosa ifibyaligwa ifi fili nimbeyu nkati, ifi filimo nkisu, nimipiki gyosa igi gikupa iseke pakisu kyosa, igi gili nimbeyu mu seke syake; gyo gikuyaga fya kulya fyinu. 30Fyosa ifinyamana ifya nkisu, syosa ninjuni sya mu palanga, na fyosa ifi fikwendela ulwanda, fyosa itolo ifi gulimo umuyi gwa bumi, fyo mfipele ifyakumela fyosa ifibisi ukuya fya kulya fyabo.” Popapo silinkuya bo bunobuno. 31Kyala alinkufiketa fyosa ifi apelile, alinkwaga finunu itolo. Lulinkuya lubunju, galinkuya mayolo, ilisiku lya buhano nalimo.
Voafantina amin'izao fotoana izao:
UBWANDILO 1: NNBII
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
BAIBULO INONGWA INUNU © Bible Society of Malawi, 2017.