Luk 7
7
Tha Jisas 'e fa'a'akwaa te'e wanenira
(Matiu 8:5-13)
1Si manga tha Jisas 'e fa'asuia to'odoolaa nia ki 'i sana na imole 'eki, nia ka lae na'a ura 'i Kapaneam. 2Te'e wane ba'ita 'ana omea 'i Rom, 'e too 'ana te'e wanenira na 'e mata'i ba'ita 'asia na'a. Wanenira 'eri 'e mata'i ba'ita ma karangia kai mae. Na wane ba'ita 'eri 'e manata ba'ita 'asia na'a 'ana wane mata'i 'eri. 3Ma si manga na wane ba'ita 'eri 'e rongoa na tha Jisas 'e fula mai, nia ka asungania tei wane nana'o 'ana Jiu ki, fasi keka soeto'ona tha Jisas ka lae mai, fasi ka fa'a'akwaa na wanenira nia. 4Si manga kera fula sana tha Jisas, keka ngata kwaitakoi 'i sana, keka 'una 'eri, “Nia 'e faarana 'oko 'adomia bona'a wane ba'ita ne'e, 5sulia 'e liothau 'asiana'a 'ani kamali'a Jiu ki, ma nia ka kasia te'e bi'u ni fo'a famali'a.”
6Sui tha Jisas ka lae na'a biida. Ma si manga 'e fula karangia na kau luma 'eri, waneba'ita 'eri 'i Rom ka asungania la'u kau wane kwaimani nia ki keka ba'e 'una 'eri 'i sana, “Wane'inoto, 'osi 'aberota'i 'oe la'u, 'E a'i kwasi faarana bo'o na 'oki lae mai 'i laa na luma nau. 7Ma nau mena kwasi faarana la'u bo'o ura laelaa kau 'i samu. 'Oki sore'a bamu'a ba'elamu fasi wanenira nau kai 'akwaa. 8Sulia nau la'u bo'o ku raa faara 'abana wane ba'ita ki, ma kwa lio sulia wanenifiru ki na kera raa 'i faara 'abaku. Ma laalae ku ba'e 'una 'eri ura wane ne'e, ‘'O lae,’ nia ka lae bona'a. Ma laalae ku ba'e 'una 'eri fana wane lakoo, ‘'o lae mai,’ nia ka lae bona mai. Ku ba'e ura wanenira nau, ‘'O ilia si doo ne'e,’ nia ka ilia bona'a.”
9Si manga tha Jisas 'e rongoa si ba'ea 'eri, nia ka kwele 'asiana'a. Ma ka abula, ka ba'e 'una 'eri ura imole ki na kera lae bii nia, “Nau ku sore'a 'i samulu'a, nau kwasi rikia 'uu ta fiito'oa 'una 'eri, 'i Israel mena ka a'i.”
10Ma to'a ni ngali bae'a 'eki, keka oli na'a uria luma wane ba'ita ba, ma keka rikia na wane mata'i ba 'e 'akwaa na'a.
Tha Jisas 'e Fa'amarukia Kaluwane te'e 'Oru
11'E a'i si tau bo'o buira si doo 'eki, tha Jisas bia disaepol nia ki, ma imole 'oro ki la'u bo'o, keka lae na'a ura te'e toaa na kera 'alangia 'ana Nein. 12Ma si manga 'e fula karangia maana ma'ethakaa 'ana ma'etoaa 'eri, te'e laea ba'ita kera ngalia mai te'e wane mae, ma keka lae mai 'i maa. Na wane mae 'eri te'efa kaluwane muuta'ia te'e gwa 'oru. Ma imole 'oro ki keka lae mai biia ura aluwanelaa. 13Si manga na Lord 'e rikia gwa 'oru 'eri, nia ka kwaimanatai 'asiana'a fana, maka ba'e 'una 'eri, “'Osi angi la'u.” 14Sui nia ka lae kau maka suaa tafe na wane mae 'eri 'e teo fafona, ma wane 'eki na kera ngalia wane mae 'eri keka toto'o ma keka takwe ngado. Sui tha Jisas ka ba'e 'una 'eri, “wane bi'iba'ita 'ae, ku sore'a 'i samu, 'o tata'e!” 15Ma wane bi'iba'ita 'eri ka tata'e maka thafali ngata bona'a. Ma tha Jisas ka falea kau 'i fana thainana.
16Ma imole ki na kera rikia si doo 'eri, keka kwele 'asiana'a, ma keka tangoa tha God, keka 'una 'eri, “Te'e profet ba'ita 'e fula mai ma'alutakalu'a. Tha God 'e fula na mai ura kai adomia imole nia ki.”
17Ma u'unua sulia tha Jisas ka talofia na'a laa na balifanua 'eri 'i Jiudia, ma fanua ki na kera too kaakali la'u bo'o.
Tha Jon wane ni Babtaes 'e falea roo disaepol nia ki sana tha Jisas
(Matiu 11:2-19)
18Si manga na disaepol tha Jon ki kera fa'arongo nia 'ana raalana tha Jisas, tha Jon ka 'ai uria roo disaepol nia ki 'i sana, 19ma ka fale keero'a keka lae sana tha Lord, ma keka soeto'ona keka 'una 'eri, “mani 'oe na'a na wane ba kai fula mai, mada a'i miki ma'asia 'amali'a ta wane 'ee'eta?”
20Ma si manga keero'a fula sana tha Jisas, keka soeto'ona 'una 'eri, “Tha Jon Thababtis 'e arasi kamare'a mai ura soeto'omulaa, 'una 'eri ma 'oe na'a na wane ba na kai fula mai, mada a'i miki ma'asia 'amali'a ta wane 'ee'eta?”
21Ma 'ana si manga 'eri la'u bo'o, tha Jisas 'e fa'a'akwaa imole mata'i 'oro ki, maka arasia na ano'edo ta'a faasia imole ki, maka fa'a'akwaa imole ki na maada 'e rodo. 22Tha Jisas ka ba'e 'una 'eri 'i sadaro'a, “Moro oli kau ma moko fa'arongoa tha Jon 'ana doo ne'e ki na moro rikia, ma moko rongoa 'itara'ena. Imole maada rodo ki kera lio na'a, ma imole 'aeda mae ki kera fali na'a. Ma imole ki na uru 'e thaungida kera 'akwaa ma kera faalu na'a. Imole ki na alingada 'e boko keki rongo na'a, ma imole mae ki kera maruki na'a, ma si fa'arongoale'a ku fa'ataloa na'a fana to'a siofa'a ki. 23'E le'a fana teina 'e a'i si taofa'i nia 'ani nau.”
24Buira roo disaepol baa ki tha Jon kero oli na'a, tha Jisas ka thafali ngata na'a sulia tha Jon 'i sana na konia 'eri ka 'una 'eri, “si manga mulu lae sana tha Jon laa na fanua kwasi ba, na ta na mulu lae ura rikilana na ba? Si 'abe rade na thauthau 'e 'isu kwailiu 'ania? 25Ta 'ana na mulu lae ura rikilana? Ta wane na 'e 'afi 'ana maku ki na liulana 'e ba'ita? 'E a'i! Sulia imole ki na kera 'afi 'una 'eri kera too 'i laa na luma ki na 'e ba'ita ma rikilana ka le'a ki. 26Mulu fa'arongo nau mai, ma ta 'ana na mulu lae kau ura rikilana na ba? Ta profet? Iu mamana 'asiana'a, sui nia 'e talua fata'i na profet. 27Sulia tha Jon na kera keekeda sulia laa na kekedalaa Abu ba, 'ana si manga ba tha God 'e ba'e 'una 'eri, ‘Nau kwai falea kau na wane ni ngaliba'ea nau 'i na'o, fasi ka kwaithathai 'ana tala 'i femu.’ ” 28Tha Jisas ka ba'e la'u 'una 'eri, “Nau ku sore'a 'i samulu'a, tha Jon 'e ba'ita ka talua na wane ki sui na kera futa mai 'i na'o ka fula 'i tara'ena. Sui ka 'una 'eri mena, ni tei na 'e fa'ekwa 'i laa na 'inotoa tha God 'e ba'ita ka talua tha Jon.”#7:28 Tha Jisas 'e sore'a si doo 'eri, sulia 'e a'i ta raa na 'e ba'ita ka talua fa'atalolana fulalana mai Kraest. Tha Jon 'ana ba 'e ilia si raa 'eri.
29Nga imole ki sui na kera rongoa ba'elana, ma wane ki na kera konia malefo 'ana takisi mena, si manga kera rongoa ba'elana, keka thaito'omana talito'ona biibirangaa tha God bona'a na 'e kokota maka mamana, sulia tha Jon 'e babtaesim kera sui na'a. 30Sui na farasii ki ma to'a ni to'o doo 'ana biibirangaa Jiu ki kera lalakwa 'ana manatalana tha God 'i fada sulia kera lalakwa 'ana tha Jon kai babtaesim kera.
31Ma tha Jisas ka ba'e 'una 'eri la'u 'i fada, “Taa na kwai boobolangania imole ki nai tara'ena 'ania? Taa na kera 'uria? 32Kera 'uria kaala wela ki na kera 'ono maana usia. Ma keka 'ai kwailiu ura kera, keka 'una 'eri, ‘Kamali'a ufia sukwadi 'i famalu'a ma musi wa'e bo'o sulia. Kamali'a mika ngulia fa ngu 'aena maea ki, sui musi angi bo'o.’ 33Si manga tha Jon Thababtis 'e fula mai, nia ka abu fasi fanga, ma 'e a'i si ku'ufia waen, muka sore'a 'amalu'a nia 'e too 'ana ano'edo ta'a. 34Sui, si manga na Kaluwane imole 'e fula mai, maka fanga maka ku'u, muka ba'e la'u bo'o 'una 'eri, ‘mulu rikia fasi! Wane 'e fanga kwasi ne'e, maka ku'u waen kwasi, maka kwaimaani bia wane ki na kera konia malefo 'ana takisi ma wane abulata'a ki.’ 35Sui ma lioto'oa 'e faata'i 'ana kokotolaa 'ana imole ki na kera too sulia.”
Tha Jisas 'e too 'i luma tha Saemon na Farasi
36Te'e Farasi 'e ba'e ura tha Jisas fasi kai lae mai ura kai fanga ma'afera nia. Tha Jisas ka lae luma nia, maka reri ura keki fanga. 37Ma te'e kini olodola 'e too la'u bo'o 'i laa ma'etoaa 'eri. Si manga na kini 'eri 'e rongoa na tha Jisas 'e ni luma Farasi 'eri, nia ka ngalia mai te'e bi'i waiwai na makwa le'a 'asiana'a. 38Nia 'e kotho kau 'i luma, maka takwe 'i buira tha Jisas otofana 'aena, ma 'e angi maka fa'agwinaa 'aena tha Jisas 'ana kafona maana. Sui, ka usua 'ana ifuna gwauna, maka nono'ia 'aena. Sui nia ka 'ikia na waiwai makwa le'a 'eri fafona 'aena tha Jisas.
39Ma si manga Farasi ba 'e rikia si doo 'eri, nia ka manata 'ana 'una 'eri, “Laalae sa wane ne'e ta profet mamana, doo kai thaito'omana kwa'i imole 'ufita na kini ne'e neri, kini abulalana ta'a.”
40Tha Jisas 'e lu'ua maka ba'e 'una 'eri fana, “Saemon 'ae! Kwai fa'arongo 'oe fasi 'ana te'e si doo.”
Nia ka ba'e 'una 'eri, “Iu wane ni to'o doo 'ae, 'o fa'arongo nau mai.”
41Tha Jisas ka ba'e 'una 'eri fana, “Te'e rowane kera ngalia malefo ura du'ulana fasia te'e wane na kai fale malefo. Te'e wane 'e ngalia lima talange'e malefo, ma ta wane ka ngalia lima akwale'e malefo. 42Ma Keero'a sui bo'o kesi tala'ana na'a du'ulana malefo 'eki, ma wane ba ka manatalube keero'a fasi malefo 'eki. 'Una 'eri ma tei 'adaro'a ne liothau 'ani nia ka tatha?”
43Ma tha Saemon 'e lu'ua ka 'una 'eri, “Naku fiia na wane na 'e ngali ba'ita 'ana malefo ni du'ulana 'eri.”
Ma tha Jisas ka ba'e 'una 'eri, “'O ngata mamana.” 44Sui tha Jisas ka abula fana kini 'eri, maka ba'e 'una 'eri fana tha Saemon, “'o rikia fasi kini ne'e. Si manga ku kotho mai laa na luma 'oe, 'osi falea bo'o ta si kafo faku ura ta'ufilana 'aeku. Sui nia 'e ta'ufia 'aeku 'ana kafona maana, maka usua 'ana ifuna gwauna. 45Ma 'osi ba'ele'atale nau bo'o 'ana nono'ilana babaliku, ma kini ne'e 'e 'ita 'ana si manga ba ku kotho mai luma, nia 'e a'i si luka bo'o 'ana nono'ilana 'aeku. 46'Osi gwaia bo'o gwauku 'ana waiwai, ma kini ne'e 'e 'ikia 'aeku 'ana waiwai makwa le'a. 47Naku fa'arongo 'oe, na liothaua ba'ita na 'e faatania, na garolaa 'oro nia ki kera manatalubea te'efau na'a. Sui ta, ni tei na kera manatalubea na garolaa fa'ekwa nia ki, na liothaua nia 'e fa'ekwa la'u bo'o.”
48Sui tha Jisas ka ba'e 'una 'eri fana kini 'eri, “Nau ku manatalubea na'a na garolaa 'oe ki.”
49Ma tei imole ki na kera too la'u bo'o 'i kula 'eri keka ba'e 'una 'eri ma'alutada kwailiu, “Na wane 'ufita fata'i ne'e, na garolaa ki mena nia kai manatalubea?”
50Tha Jisas ka ba'e 'una 'eri la'u fana kini 'eri, “Na fiito'oa 'oe 'e fa'amaruki 'oe, 'o lae na'a 'ana enenoa.”
Voafantina amin'izao fotoana izao:
Luk 7: MLU
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
