मर्कुस 5
5
येसुन भुत लाग्ल मानुस बिसेक पार्ल
(मति ८:२८-३४; लुका ८:२६-३९)
1येसु चेलाल्कोसिन गालिल तालकर पारपटि गेरासेनस पर्देसनाइ आइपुग्ले। 2येसु लाउबान बाइर निस्किलेसाथ चिहानबान भुत आत्मा लाग्ल एउटो मानुस आइके येसुलाइ भेटाल्ते। 3ह्व चिहान हक्लदिस बस्तेल। कुन्नुल्किन पुनि होलाइ साङ्लान समेत बादइ बइसक्तेला। 4किनारइभने मान्छेल्किन होलाइ नेल र साङ्लान बादिके धर्तिन पुनि होइनिन साङ्लालाइ टुक्रा-टुक्रा पारिके छिनाइतेल र नेललाइ भाचिके भाग्तेल। कुन्नुल्किन पुनि होलाइ अधिननाइ धरइ बइसक्तेला। 5ह्व रात-दिन चिहानदिस र डाँरादिस साराइतिन आफिन आफिलाइ पाथरिन कोतर्तिन हिन्तेल।
6होइनिन येसुलाइ बद्दुरेबान देखल्ते अनि कुत्तिन आइके येसुकर अगाडि घोप्टो परिके ढोग्ले। 7अनि होइनिन बड्खो सोरिन साराइतिन बाज्ले, “हे येसु, महान परमेसोरकर बेटाक, तुइनिन मुइलाइ केति गरइ आँट्ल? मुइ परमेसोरनाइ कसम खाइके बिन्ति गर्छु, मुइलाइ दुख जुनदेउ।” 8किनारइभने येसुन भुत आत्मालाइ अगाडि ने,“ए असुद्द आत्मा, तुइ ह्व मानुसबान निस्किके जा” बल्ल रल्ति।
9येसुन होलाइ सोदल्ते,“तोर नाउँ केति हो?”
होइनिन बाज्ले, “मोर नाउँ फोउज हो, किनारइभने हाइ धेराइ आछे।” 10ह्व भुत आत्मान “हाइलाइ जिनिखे पुनि ह्य इलाकाबान अर्को ठउँनाइ जुन पाठाउ।” बाजिके येसुलाइ बिन्ति गर्ले।
11उछि नजिकइ डाँरानाइ सोरिकर एउटो बड्खो बाथान चरिधर्लाइ रइला। 12अनि भुत आत्माल्किन येसुलाइ बिन्ति गर्तिन बाज्ला, “हाइलाइ सोरिल्कोनाइ जाइ देउ, र हाइ ह्व भित्र पोस्छे।” 13अनि येसुन होल्काइ जाइनार आग्या दिल्याक, र भुत आत्मालत ह्व मानुसबान निस्किके सोरिभित्र पस्ला। पस्लेसात लगभग दुइ हजार सोरिलत भिरालोबान हुर्रितिन जाइके तालनाइ डुबिके मर्ला।
14ह्य देखिके सोरि चाराइनाराइ उछ्यान भागिके जाइला र ह्य कुरो गाउँ र सहरभोरि सुनाइला। अनि मान्छेलत केति हक्ल हो बाजिके येसु हक्लनाइ हेरइ आइला। 15उछिका होल्किन भुत आत्मा लाग्ल मानुसलाइ सद्दे मनकर हकिके लुगा लाइके बसिधर्ल देखिके होलत डाराइला। 16ह्य घटना देख्नारकिन उछि आइलाइ मान्छेल्काइ भुत आत्मा लाग्ल मानुस र सोरिल्काइ केति हक्ल रल्ति ह्व सुनाइदिल्याक।
17अनि होल्किन येसुलाइ “हाम्रो इलाका छाडिके जाइहाल” बाजिके बिन्ति गर्ला।
18येसु लाउनाइ चडइ लाग्तिन बिसेक हक्ल मानुसिन येसुलाइ बिन्ति गर्तिन बलल्ते, “मुइलाइ पुनि सँगिन लाकाउ।”
19तर येसुन होलाइ अनुमति बइदिल्ते, र होलाइ बलल्ते,“तुइ आफ्ने घरनाइ फर्किके जा र पर्भुन तोर जिबननाइ गर्ल बड्खो काम र दयाकर बारेनाइ आफ्ने आफन्तल्काइ र घर परिवारकाइ सुनाखन।”
20अनि ह्व मानुस जाइके येसुन होक्र जिबननाइ गर्ल कामकर बारेनाइ दस सहरनाइ#५:२० दस सहरनाइ ह्यलाइ सोरोत भासानाइ डेकापोलिस बल्लाछि पर्चार गर्ले। अनि सुन्नाराइ सेब्बाइ मान्छेलत छक्क पर्ला।
मर्लि छुनेनि र रोगि बेटि
(मति ९:१८-२६; लुका ८:४०-५६)
21येसु फेरि लाउनाइ चडिके तालकर इपारपटि फर्किके आइले। अनि बड्खो भिड येसुकर वरिपोरि तालकर छेउनाइ जम्मा हक्ला। 22सभाघरकर हाकिमलत मद्दे याइरस नाउँ हक्ल एउटो मानुस येसु हक्लनाइ आइले। येसुलाइ देख्लेसात होइनिन येसुकर गोडनाइ घोप्टो पर्ले, 23र बिन्ति गर्तिन बाज्ले, “मोरि स्यान्खि बेटेक सिकिस्त बिरामि आछि, तुइनिन आइके आफ्ने हात ह्व उप्रान धर्लइ भने ह्व बिसेक हक्नालि र बाच्नालि।”
24अनि येसु ह्व सँगिन जाइले। मान्छेल्को भिड येसुकर पछि लाग्ला र होल्किन येसुलाइ गेचाइतेठि गर्ला।
25अनि उछि बार बर्सदेखि रकत बुहुइनार बेथान दुख पाइलि एउटि बेटि पुनि रइलि। 26होइनिन धेराइ डाक्टरकोनाइ उपचार गरिके आफिसिन हक्ल सेब्बे धन-सम्पति खर्च गर्लि। तर बिसेक हकइकर साटो झन-झन होलाइ रोगिन च्याप्तिन जाल्ते। 27होइनिन येसुकर बारेनाइ सुन्लि रइलि, र भिडकर पछाडिबान आइके येसुकर लुगाकर फुर्का छुइलि। 28किनारइभने होइनिन मनमने बिचार गर्लि रइलि, “मुइनिन येसुकर लुगा मात्र छुइनाइ भने पुनि मुइ बिसेक हक्नारआछु।”
29अनि तुरुन्तइ होक्र रकत बुहुइ रोकल्ते, र आफ्ने जिउनाइ हक्ल रोग बिसेक हक्ल होइनिन था पाइलि। 30येसुन तुरुन्तइ आफिबान सक्ति निस्किके बाइर जाइल था पाइके पछाडि फर्किके भिडकाइ सोद्ल्याक,“कुनिन मोर लुगा छुइले?”
31चेलाल्किन येसुलाइ बल्ला, “यत्रा मान्छेल्को भिडिन गेचाइतेठि गर्ल तुइनिन देखि धर्लाछस, ता पुनि तुइनिन मुइलाइ कुनिन छुइले बाजिके किनिखे बाजइ सक्छस?”
32अनि येसुन आफिलाइ कुनिन छुइले बाजिके वरिपोरि हेरइ लाग्ले। 33ह्व बेटिन आफिनाइ घट्ल कुरो था हक्ल हुदान ह्व डरिन काम्तिन आइके येसुकर अगाडि घोप्टो परिके सेब्बे सत्य कुरो बाताइदिल्ते। 34अनि येसुन होलाइ बलल्ते,“नानि, तोर बिस्वासिन तुइ बिसेक हक्लाछस। ढुक्कसिन जा। तोर रोग बिसेक हक्लाछि।”
35येसुन इत्तिके बाज्तिन गर्तिन याइरसकर घरबान मान्छेलत आइला। र याइरसलाइ बल्ला, “तोरि बेटेर मरिसक्लि, अब गुरुलाइ किनारे बेर्थे दुख दिनार?”
36तर येसुन होल्को कुरोलाइ वास्तइ नगरिके याइरसलाइ बलल्ते,“जुनडाराउ, बिस्वास मात्र गर।” 37अनि येसुन पत्रुस, याकुब र होक्र भाएक युहन्ना बाएक आने कुनुल्काइ पुनि आफिसिन जाइ बइदिल्याक। 38होलत याइरसकर घरनाइ आइपुग्ला, अनि येसुन होहल्ला गर्नाराइ र बिलाप गर्तिन काँदिधर्लाल्काइ देख्ले। 39अनि येसु घरभित्र पसिके होल्काइ बल्-ल्याक,“तोरा किनारे काँन्छो र होहल्ला गर्छो? छुनेनि मर्लि बइने, निदाइलि मात्र आछि।”
40ह्य सुनिके सेब्बाइ येसुकर कुरोनाइ हाँस्ला। तर येसुन होल्काइ बाइर पाठाइदिल्याक अनि छुनेनिकरि आमेक-ब्वाक र आफ्ने तिन्टाइ चेलाल्काइ लिके भित्र छुनेनि हक्ल कोठानाइ जाइले। 41अनि येसुन छुनेनिकर हात आठाइके बाज्ले,“तालिता कुमि!” हेक्र अर्थ हो,“ए छुनेनि, मुइ तुइलाइ बल्छु उठ।”
42अनि छुनेनि जुरुक्क उठ्लि, र हिन्डुल गरइ लाग्लि। ह्य देखिके होलत छक्क पर्ला। ह्व बार बर्सकरि रइलि। 43येसुन होल्काइ ह्य कुरो कुनुल्काइ पुनि जुनबल्खन बाजिके कडा आग्या दिल्याक। अनि छुनेनिलाइ केइ खाइनार कुरो देइ बाजिके होल्काइ बल्-ल्याक।
Voafantina amin'izao fotoana izao:
मर्कुस 5: MAJH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Mother Tongue Translators Society and Wycliffe Bible Translators, Inc. All rights reserved.
