मर्कुस 1
1
बप्तिस्मा दिन्या युहन्नाले गर्या प्रचार
(मत्ति ३:१-१२; लुका ३:१-१८; युहन्ना १:१९-२८)
1परमेसोरका छोरा इसु ख्रिस्टको बार्यमै राम्मो रैबारको सुरु यस्हरि हुन्छ। 2परमेसोरका रैबार्या यसैयाको किताबमै यस्हरि लेख्याछ:#मलाकि ३:१
“हेर, मु मेरो रैबार्याकन तुम्मो अगेडि अगेडि पठाउन्याछु,
जोले तुम्मो बाटो तैयार गन्न्याछ।
3रुखो ठौरमै एकजुन ठुलो डाकाले भुन्दैछ,#यसैया ४०:३
‘परमप्रभुको बाटो तैयार गर,
उनुका बाटा स्होजा बुनाउ।’”
4बप्तिस्मा दिन्या युहन्नाले रुखो ठौरमै मान्ठहरुकन यस्हरि प्रचार गर्या, “तुमिहरु पच्छताप गरि पाप गन्न छोडि बप्तिस्मा ल्हेउ र परमेसोरले तुमिहरुका पाप माप गन्न्याछुन्।” 5अनि पुरै यहुदिया र यरुसलेमका मथ्थै मान्ठहरु युहन्नाति आया, र तिनुहरुले आपु पापि हुँ भुन्दै युहन्नाबाट यर्दन गाडमै बप्तिस्मा ल्हिया।
6युहन्नाले उँटका रुँगाबाट बुन्या टाला लाउँदा छिया, र ढाडौनो छालाको पेटि बान्ना छिया, अनि सलह#१:६ सलह एक किसिमको फट्यांरा जैथै किडा हो, जोले बालिनालि बोटबिरुवाको पातस्हम्म खाइकन नास गद्दोछ। र बुन म्हँ खान्छिया।#२ राजा १:८ 7अनि युहन्नाले यस्हो भुन्दै प्रचार गर्या, “एक जुना मु पछि आउन्याछुन्। उनु मु भुन्दा सक्तिसालि छुन्। अनि मु निउडिकन उनुका पौलाका तुना फुकाउन्या लायकको नाइ। 8मोइले तुमिहरुकन पानिले बप्तिस्मा दियाछु, तर उनुले तुमिहरुकन पबित्त आत्माले बप्तिस्मा दिन्याछुन्।”
इसुको बप्तिस्मा र जाँच
(मत्ति ३:१३-१७; ४:१-११; लुका ३:२१-२२; ४:१-१३)
9अनि तेइबेला इसु गालिलको नासरत सहरबाट आया, र युहन्नाबाट यर्दन गाडमै बप्तिस्मा ल्हिया। 10र इसु पानिबाट उठ्ना बित्तिकै सोर्ग उग्डियो, र पबित्त आत्माकन ढुकुर जैथो आपुमाथि आइरया देख्या। 11अनि सोर्गबाट यइथो डाको आयो, “तुमि मेरा प्यारा छोरा हौ, मु तुमिस्हात जात्ति खुसि छु।”#उत्पति २२:२; भजनसंग्रह २:७; यसैया ४२:१
12तेइपछि पबित्त आत्माले इसुकन तुरुन्तै रुखो ठौरमै ल्हिया। 13तब इसु चालिस दिनस्हम्म रुखो ठौरमै बस्याबेला सैतानले उनुकन पापमै फसाउन खोज्यो। उनु जंगलि जन्तुहरुस्हात रया, र सोर्गका रैबार्याहरुले उनुको सेबा गर्या।
इसुले चारजुना चेलाहरुकन घोइर्याया
(मत्ति ४:१२-२२; लुका ४:१४-१५; ५:१-११)
14तब युहन्ना पक्डाउमै पड्यापछि परमेसोरको राम्मो रैबार प्रचार गद्दै इसु गालिलमै आया। 15अनि इसुले भुन्या, “सुमय पुरा भयाछ, र परमेसोरको राज्या नेइति आयाछ। पच्छताप गर, र राम्मो रैबारकन बिसास गर।”
16अनि इसु गालिल तालको छालछालै जानैछिया उनुले सिमोन र तिनुका भाइ अन्द्रियासकन तालमै जाल हानिरया देख्या। क्यानभुन्या तिनुहरु जलारि छिया। 17तब इसुले तिनुहरुकन भुन्या, “मेरो पछि लाग, अबदेखि तुमिहरुले माछा छोप्न्यानाइ, तर मान्ठकन परमेसोरको राज्यामै ल्याउन्याछौ।” 18तब तिनुहरुले स्हाँट्टै आम्ना जालहरु छोड्या, र इसुकापछि लाग्या।
19थोक्कै पर गयापछि इसुले जब्दियाका छोरा याकुब र युहन्नाकन नाउँमै बसि जाल तुनिरया देख्या। 20अनि इसुले तिनुहरुकन स्हाँट्टै घोइर्याया, र तिनुहरुले आम्ना बाबा जब्दियाकन काम गन्न्याहरु स्हातै नाउँमै छोडि इसुको पछि लाग्या।
इसुले भुत लाग्या मान्ठकन भलो गर्या
(लुका ४:३१-३७)
21तब इसु र चेलाहरु कफर्नहुममै गया, अनि स्हाँट्टै पट्याइको दिन सबाघरमै पसि उनुले सिच्छ्या दिन लाग्या। 22अनि तिनुहरु इसुका सिच्छ्यामै छक्कै पड्या, क्यानकि उनुले तिनुहरुकन धर्मगुरुहरुले जैथै होइन, तर हकसहित सिकाया।
23तेइबेला सबाघरमै भुतआत्मा लाग्या मान्ठले किक्याउँदै यइथो भुन्यो, 24“हे नासरतका इसु हामि स्हात तुम्मो क्या मतलब? क्या तुमि हामिकन नास गन्न आया हौ? मु तुमिकन रौन्छु, तुमि परमेसोरका पबित्त मान्ठ हौ।”
25तर इसुले तेइ भुतकन हप्काउँदै भुन्या, “छुपुक्क लाग्, र तेइबाट निक्लिजा।”
26अनि भुतआत्माले तेइ मान्ठकन लछाडपछाड गद्दै र ठुलो डाकोले किक्याउँदै निक्लि गयो। 27तब स्हबै जुना दङ्ग पर्या, र तिनुहरुले यइथो भुन्नै आपु आपु कुडा गन्न लाग्या, “यइ क्या हो? यइ त नौलो सिच्छ्या रैछ। यिनुले त हकस्हत भुतआत्माहरुकन पुनि हुकुम गद्दाछुन्, र भुतआत्माहरुले यिनुको हुकुम मान्दारैछुन्।”
28तब स्हाँट्टै इसुको नाउँ गालिल ठौरको स्हबैतिर फिजियो।
इसुले मथ्थै जुनाकन भलो गर्या
(मत्ति ८:१४-२७; लुका ४:३८-४१)
29अनि इसु स्हाँट्टै सबाघरबाट निक्लिकन याकुब र युहन्ना स्हात सिमोन र अन्द्रियासको घरमै पस्या। 30तेइबेला सिमोनकि स्हासु जराले थलियाइ छि, र तिनुहरुले तुरुन्तै इसुकन स्हैनिको बार्यामै भुन्या। 31इसु हुँइति आइकन स्हैनिको हात स्हुमाति उठाया, र तेइकन जराले छोड्यो। अनि तेइले उनुहरुको सेबा गरि।
32तेइ बाहाबल्टि बेल बुडिस्हक्या मान्ठहरुले मथ्थै मुदौराहरु र भुत लाग्याहरुकन इसुति ल्याया। 33पुरै सहरका मान्ठहरु घरको धेला स्हम्मै खेडिया छिया। 34अनि इसुले मथ्थै खाल्या रोगले सताया मुदौडाहरुकन भलो गर्या, र मथ्थै भुतहरुकन धपाया, तर भुतहरुले इसुकन रया हुनाले उनुले भुतहरुकन बोल्ल दियानुन्।
गालिल ठौरमै इसुको प्रचार
(लुका ४:४२-४४)
35इसु भोलिपल्ट रातै उठिकन बाइर गोप्या ठौरमै गया, र ताँइ प्रार्थना गर्न लाग्या। 36अनि सिमोन र तिनु स्हात भयाहरु इसुकन खोइदै गया। 37इसुकन भेटायापछि तिनुहरुले भुन्या, “स्हबै जुनाले तुमिकन खोइदाछुन्।”
38तब इसुले तिनुहरुकन भुन्या, “आउ, हामिहरु ओडापुडाका अरु गाउँहरुमै जाउँ, र ताँइ पुनि मोइले प्रचार गन्नुपड्छ, क्यानभुन्या मु यइखै निम्ति आया हुँ।”
39अनि इसु पुरै गालिलका सबाघरहरुमै प्रचार गद्दै र भुतहरु निकाल्दै हँड्या।
कोडिकन भलो गर्या
(मत्ति ८:१-४; लुका ५:१२-१६)
40एकजुन कोड लाग्या मान्ठ इसुति आयो र घुँडा टेकि यइथो भुनि बिन्ति गर्यो, “तुमिले इच्छ्या गर्यौ भुन्या मुकन भलो गन्न स्हक्न्याछौ।”
41तब इसुले टिठ् मान्या र आम्नो हात पस्हारि तेइकन छुइयार भुन्या, “मु इच्छ्या गद्दोछु, तो भलो होइजा।” 42अनि स्हाँट्टै तेइको कोड हट्यो र भलो भयो। 43तब इसुले तेइकन स्हारो आग्या दियार यइथो भुनि पठाया, 44“हेर्, तोइले यइ कैकनै नभुन्नु, तर गयर आपैकन पुजारिति देखा र तो भलो भया प्रमान मान्ठहरुकन दिनाबिअ मोसाको आग्या उनुसार बलि चडा।”
45तब तेइ मान्ठ निक्लि गयो, र यइ बिसयमै खुल्लमखुला प्रचार गन्न लाग्यो, अनि इसु फेरि सहरमै स्हबैले देख्न्या गरि जान स्हक्यानुन्, अनि यकुरा ठौरहरुमै बस्या। तर मान्ठहरु चारैतिरबाट उनुति आया।
Voafantina amin'izao fotoana izao:
मर्कुस 1: JUML
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Mother Tongue Translators Society and Wycliffe Bible Translators, Inc. All rights reserved.
