SAN MATEO 1
1
Jesucristopac ñaupa taitacunapac shuticunami
(Lc 3.23-38)
1Taita Abrahammanta jatun mandac Davidcaman, Davidmanta Jesucristocamanca, Jesucristopac ñaupa taitacunapac shuticunaca caicunami:
2Abrahamca Isaacpac taitami carca. Isaacca Jacobopac taitami carca. Jacoboca Judapac, shinallatac caishuc paipac huauquicunapac taitami carca. 3Judaca Farespac, shinallatac Zarapac taitami carca. Paicunapac mamaca Tamar shuti carca. Faresca Esrompac taitami carca. Esromca Arampac taitami carca. 4Aramca Aminadabpac taitami carca. Aminadabca Naasonpac taitami carca. Naasonca Salmonpac taitami carca. 5Salmonca Boozpac taitami carca. Boozpac mamaca Rahab shuti carca. Boozca Obedpac taitami carca. Obedpac mamaca Rut shuti carca. Obedca Isaipac taitami carca. 6Isaica jatun mandac Davidpac taitami carca. Jatun mandac Davidca Salomonpac taitami carca. Paipac mamaca Uriaspac huarmimi carca.
7Salomonca Roboampac taitami carca. Roboamca Abiaspac taitami carca. Abiasca Asapac taitami carca. 8Asaca Josafatpac taitami carca. Josafatca Jorampac taitami carca. Joramca Uziaspac taitami carca. 9Uziasca Jotampac taitami carca. Jotamca Acazpac taitami carca. Acazca Ezequiaspac taitami carca. 10Ezequiasca Manasespac taitami carca. Manasesca Amonpac taitami carca. Amonca Josiaspac taitami carca. 11Josiasca Jeconiaspac, shinallatac caishuc paipac huauquicunapac taitami carca. Paicuna causacui punzhapimi, israelcunataca*f** Babilonia llactaman prezu aparcacuna.
12Shina apashca q'uipami, Jeconiasca Salatiel nishca churita charirca. Salatielca Zorobabelpac taitami carca. 13Zorobabelca Abiudpac taitami carca. Abiudca Eliaquimpac taitami carca. Eliaquimca Azorpac taitami carca. 14Azorca Sadocpac taitami carca. Sadocca Aquimpac taitami carca. Aquimca Eliudpac taitami carca. 15Eliudca Eleazarpac taitami carca. Eleazarca Matanpac taitami carca. Matanca Jacobopac taitami carca. 16Jacoboca Josepac taitami carca. Joseca Mariapac cusami carca. Mariaca Jesuspac mamami carca. Jesusca Quishpichic Cristomi can.
17Chashna cashpami, Abraham causacui punzhamanta David causai punzhacamanca, chunga chuscu taitacuna cashca. David causacui punzhamanta israelcunata Babilonia llactaman prezu apangacamanca, chunga chuscu taitacunami cashca. Chai punzhamanta Quishpichic Cristo huacharingacamanca, chunga chuscu taitacunami cashca.
Jesucristo ima shina huacharishcamanta
(Lc 2.1-7)
18Jesucristo huacharinaca cashnami carca: Paipac mama Mariaca Josehuan cazarangapacmi ari ninacushca carca. Josehuan manarac tandanacushpami, Mariaca Diospac Espíritu llanducpi, huicsayuc taririrca. 19Paipac cusa cana Joseca cashcata ruhuac cashcamantami, mana pimanpish yachachishpa, Mariataca pacalla shitasha nicurca. 20Pai chashna yuyacucpipish, Taita Dios cachashca angelmi muscuipi ricurishpaca: “Davidpac huahua huahuapuramanta José, Mariahuanca cazarailla, ama manchaichu. Pai charigricuc huahuaca, Diospac Espiritumantami. 21Paica shuc c'ari huahuatami charinga. Chai huahuataca JESÚS shutitami shutichingui. Paimi tucui pai acllashcacunataca juchacunamanta quishpichinga. Chaimantami chai shutica canga” nirca.
22Tucui chaicunaca Taita Dios paimanta huillacman ñaupa huillachishca pactachunmi, chashnaca tucurca. 23Pai huillashpaca:
“Manarac c'arihuan chayarinacushca
shuc solterami,
huicsayuc tucushpa,
shuc c'ari huahuata charinga.
Chai huahuaca
Emanuel shutimi canga” nishcami.
(Emanuel nishpaca: “Dios ñucanchichuan” nisha ninmi).
24José riccharishpaca, Taita Dios paipac angelman huillachishcata cazushpami, Mariahuanca cazararca. 25Joseca chashna cazarashpapish mana chayarinacushpami, María chai huahuata charingacamanca causarca. Chai huahuataca JESÚS shutitami shutichirca.
Voafantina amin'izao fotoana izao:
SAN MATEO 1: QXR96
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Quichua Cañar Nuevo Testamento © United Bible Societies in Ecuador, 1996.
