Zakarià 10
10
Mangataka amin’ny Tompo fa tsy amin’ny sampy
1Mangataha amin’ny Tompo
handefasany ranonoran-dohataona
fa Izy no manao ny oram-baratra;
dia homeny oram-be mivatravatra ianareo
ary samy hataony maitso mavana ny sahanareo
2Fa zava-poana no tenenin’ny sampy.
Ary lainga no hany hitan’ny mpisikidy;
tsy misy dikany ny nofy tantarainy,
feno fitaka ny fampiononana entiny.
Izany no nahavoatery ny vahoaka handeha,
ka ory tahaka ny andianondry tsy misy mpiandry.
Ireo tokim-panafahana
3«Ireo vahiny miandry ny vahoakako
no irehetan’ny fahatezerako;
ireo osilahy no iantefan’ny famaliako.
Izaho Tompon’izao rehetra izao kosa
efa hamangy ny ondriko,
dia ny taranak’i Joda izany.
Toy ny soavaly voaravaka hiady izy
no hoentiko any amin’ny toeram-piadiana.
4Avy ao aminy no hipoiran’ny filoha rehetra
izay azo antoka toy ny vatofehizoro,
matotra toy ny tsatokan-day,
ary hentitra toy ny tsipîkan’ady.
5Ho toy ny mpiady mahery ireo,
ka hanitsakitsaka ny mpifanandrina aminy
toy ny fotaka eny an-dàlambe.
Hiady ireo, satria Izaho Tompo no momba azy;
ary dia ho safo-kenatra
ny fahavalo mpitaingin-tsoavaly.
6Hampahery ny taranak’i Joda Aho
ary hamonjy ny taranak’i Jôsefa;
dia haveriko amin’ny laoniny indray ireo,
satria hanehoako famindrampo
ka ho toy ny tsy nariako na oviana na oviana.
Ary hamaly vavaka azy koa Aho,
fa Izaho no Tompo Andriamaniny.
7Ho toy ny mpiady mahery ireo lehilahin’i Efraîma,
ary ho dibo-kafaliana toy ny azon-divay ny fony.
Hahita izany ny zanany, ka ho ravoravo;
ary noho Izaho Tompo dia hibitaka ny fony.
8Hiantso ny vahoakako Aho ka hanangona azy,
satria efa navotako izy,
ka hihamaro toy ny taloha indray.
9Tahaka ny fanaparitaka voa famafy
no nanelezako azy tany amin’ny firenena;
fa na dia any lavitra any aza ireo
dia hahatsiaro Ahy ihany.
Any izy no hiaina miaraka amin-janany,
kanefa avy eo dia hiverina indray.
10Hampodiko avy any Ejipta izy
ary hangoniko avy any Asiria,
ka hoentiko any Gilehada#10.10 Gilehada dia faritany mivelatra hatrany atsinanan’i Jôrdàna; i Libano kosa dia tendrombohitra mitomandavana eo avaratr’i Palestinina. sy any Libano;
saingy na dia ireo toerana ireo aza
dia mbola tsy ho omby azy ihany.
11Hamakivaky ny ranomasim-pahoriana#10.11 ny ranomasim-pahoriana: ny dkt tranainy grika dia manao azy eto hoe ny Ranomasin’i Ejipta; izany dia ny Ranomasin’ny Volotara* ary ny fiantombohan’ity andininy ity dia mampahatsiaro ny fivoahana tany Ejipta, jereo Eks 14.21-22; Is 51.10; Sal 106.9. izy;
Izaho Tompo kosa hively ny onjan-dranomasina
sy hahatankina tanteraka ny onin’ny Neily.
Dia haetry ny avonavon’i Asiria,
ary ho very fahefana i Ejipta.
12Dia Izaho Tompo no ho herin’ny vahoakako;
ary amin’ny anarako no hifampiarahabany.
Izaho Tompo no manao izany teny hentitra izany».
Voafantina amin'izao fotoana izao:
Zakarià 10: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.