Salamo 90
90
BOKY FAHEFATRA
(Salamo 90–106)
SALAMO Mandalo ny olona fa mitoetra Andriamanitra
1 Vavak’i Mosesy, olon’Andriamanitra.
Tompo ô, fialofanay hatrany hatrany Ianao.
2Fony tsy mbola ary akory ny tendrombohitra,
tsy mbola voaforonao ny tany sy izao tontolo izao,
dia efa Andriamanitra Ianao
hatrizay ka ho mandrakizay.
3Averinao ho vovoka#90.3 Vovoka: jereo Gen 3.19. ny olona ka ilazanao hoe:
«Miverena amin’izay niavianareo, rey olombelona.»
4Fa eo imasonao ny arivo taona
dia toy ny andro omaly efa lasana
na ora vitsivitsy amin’ny alina#90.4 Jereo 2Pt 3.8..
5Farananao ny fiainan’ny olona
ka mihelina toa torimaso maraina;
tahaka ny ahitra maniry izy,
6ka mamony sy mandrobona nony maraina,
fa malazo sy maina nony hariva.
7Lanin’ny fahatezeranao izahay
ary tonafan’ny fahaviniranao.
8Napetrakao eo anatrehanao ny helokay;
na ny fahotanay miafina aza dia hitanao mazava.
9Noho ny haviniranao dia lasana ny androm-piainanay,
ka indray misento monja dia nifarana ny taonanay.
10Tsy maharitra afa-tsy fitopolo taona izany,
na valopolo taona ho an’izay matanjaka;
kanefa hasasarana sy zava-poana no vokany.
Mandalo vetivety tokoa izany fiainana
ary manidina ho any amin’ny varo-tsy mifody izahay.
11Iza no mahalala ny herin’ny fahatezeranao
ary hanaja Anao araka ny fahaviniranao?
12Ampahafantaro anay fa voaisa ny andronay
mba hahatonga anay hanana fisainana hendry.
13TOMPO ô, mandra-pahoviana no mbola hitezeranao anay?
Mba itodiho izahay mpanomponao ka amindrao fo.
14Fenoy ny fitiavanao izahay raha vao maraina,
dia hihoby sy hifaly amin’ny andro sisa iainanay.
15Aoka hampifalînao izahay
araka ny andro nampahorînao anay
sy araka ny taona nahitanay loza!
16Ny ataonao aminay anie ho hitanay maso
ary ny voninahitrao ho tsapan’ny taranakay!
17Ry Tompo Andriamanitray ô,
aoka ho aminay ny fahamoram-panahinao
ka ampahombiazo ny asan’ny tananay;
eny, ampahombiazo ny asan’ny tananay.
Voafantina amin'izao fotoana izao:
Salamo 90: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.