Salamo 69
69
SALAMO Endrey izany fitiavako ny tempolinao!
1 Tao amin’ny tahirin-kiran’ny filohan’antoko-mpihira. Hampiarahina amin’ny gitara. Salamo nataon’i Davida.
2Andriamanitra ô, mba vonjeo aho,
fa efa mby hatenda ny rano;
3Milentika amin’ny fota-mandrevo aho
sady tsy mahita izay hifaharana;
tonga amin’ny rano lalina aho
ary efa indaosin’ny riaka.
4Sasatry ny miantso vonjy aho; ka maina ny tendako,
vizana ny masoko, eo am-piandrasako Anao Andriamanitro.
5Ireo mpankahala ahy tsy amin’antony#69.5 Jereo Sal 35,19; tsiahivina ao amin’ny Jôh 15.25 izany andalana izany.
dia maro kokoa noho ny volon-dohako;
mahery ireo mitady hahafaty ahy,
dia ireo mpandrafy ahy tsy an-drariny.
Zavatra izay tsy nalaiko
no indro asainy averiko.
6Andriamanitra ô, fantatrao ny hadalàko;
ny hadisoako tsy mba miafina aminao.
7Ry Tompo ANDRIAMANITR’izao rehetra izao ô,
aoka tsy ho menatra noho ny amiko
ireo olona miantehitra aminao;
aoka tsy hangaihay noho ny amiko
ireo mitady Anao, ry Andriamanitr’i Israely!
8Noho Ianao no izakako latsa
sy mahasafo-kenatra ny tavako,
9ka nanjary olon-kafa sy vahiny aho
ho an’ireo mpiray tampo amiko.
10Ny fitiavako an’ilay tranonao
dia mandoro ahy toy ny afo#69.10a Andalany tsiahivina ao amin’ny Jôh 2.17. Jereo koa Sal 119.139..
Ny latsa natao hihatra aminao
no mifotitra atỳ amiko#69.10b Andalany tsiahivina ao amin’ny Rm 15.3..
11Mietry tena sady mifady hanina aho,
kanefa dia andatsana ahy izany.
12Fitafiam-pisaonana no nanaovako,
dia tonga fanarabin’ny olona aho
13sy fitafan’ny mpitorovoka eo am-bavahady
ary koa fikalon’ny mpidoroka.
14Izaho kosa mivavaka aminao, TOMPO ô,
satria fotoam-panambinanao izao;
Andriamanitra ô, be fitiavana Ianao,
ka valio aho fa azo antoka ny famonjenao.
15Afaho aho mba tsy ho difotry ny fotaka
na hindaosin’ny tafio-drivotra sy ny rano lalina;
16aoka aho tsy ho safotry ny riaka
na koa ho voatelin’ny hantsana
na ho voahidin’ny fasana ao anatiny!
17TOMPO ô, valio aho fa soa ny fitiavanao;
todiho aho fa be fiantrana Ianao.
18Aza minia tsy hijery ahy mpanomponao;
azom-pahoriana aho, ka valio faingana.
19Tongava eto akaikiko Ianao hiandraikitra ahy,
ka afaho amin’ny fahavaloko aho.
20Latsa, henatra, fahafaham-baràka:
fantatrao fa mihatra amiko avokoa ireny;
tsy misy takona Anao ny mpandrafy ahy.
21Torotoron-datsa ny foko ka reraka aho:
niandry mpitsetra fa tsy nisy,
nitady mpampionona fa tsy nahita.
22Ny sakafoko nasian’ny sasany poizina;
mangetaheta aho, ampisotroiny vinaingitra#69.22 Jereo Mt 27.48; Mk 15.36; Jôh 19.28-29..
23Ho fandrika ho an’ny fahavaloko anie ny sakafony
ary ho tonga hahavoa azy ny sorom-pihavanana hohaniny!
24Hojambena anie ny masony ka tsy hahita,
hanjary manjoko lalandava anie izy#69.24 Ny and 23-24 dia tsiahivina ao amin’ny Rm 11.9-10.!
25Ny fisafoahanao atosahy aminy;
ary enga anie hahatratra azy
ny firehitry ny haviniranao!
26Aoka ho rava ny tobiny
ary tsy hisy mpitoetra ny lainy#69.26 And tsiahivina ao amin’ny Asa 1.20 ary ampiharina amin’i Jodasy mpamadika an’i Jesoa.,
27satria ilay nokapohinao no mbola enjehiny
ary ny ferin’ilay noratrainao no ampiany!
28Ho voatahiry an-tsoratra avokoa anie
ny heloka vitan’ireo fahavaloko,
ka tsy hisy hoekenao ho marina izy!
29Koseho ny anarany ao amin’ilay horonamboky
mirakitra ny lisitr’ireo hanana ny fiainana#69.29 horonamboky... fiainana: jereo Fil 4,3; Apôk 13,8; 17.8; 20.12,15; 21.27; ampit Eks 32.32-33; Dan 12.1; Lk 10.20.;
aoka izy tsy ho voasoratra ho anisan’ny olo-marina!
30Izaho kosa dia ory sy mijaly, Andriamanitra ô,
ka ny famonjenao anie no hampahery ahy;
31dia hidera ny anaranao amin-kira aho
sy hankalaza Anao amin-tsaotra.
32Fa izany, TOMPO ô, no sitrakao noho ny ombilahy
na ny vantotr’omby ary tandroka sy kitro#69.32 Jereo Sal 50.10-14; 51.18-19..
33Hahita ny famonjena ahy ny ory ka ho faly.
Ry mpitady an’Andriamanitra,
ho ela velona anie ianareo!
34Satria ny mahantra henoin’ny TOMPO
ary ny olony voagadra tsy mba ariany.
35Miderà Azy, ry tany aman-danitra
mbamin’ny ranomasina sy izay velona ao.
36Fa Andriamanitra hamonjy an’i Tsiôna
sady hanangana ireo tanànan’i Joda,
ka hitoetra ao ny olony
sady ho tompon-toerana;
37ireo taranaky ny mpanompon’Andriamanitra
no ho tonga mpandova izany;
ary izay tia ny anarany
no hiorim-ponenana ao.
Voafantina amin'izao fotoana izao:
Salamo 69: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.