Salamo 68
68
SALAMO Salamo fiderana mba handraisana an’Andriamanitra mpandresy
1 Tao amin’ny tahirin-kiran’ny filohan’antoko-mpihira. Salamo nataon’i Davida. Tononkira.
2Hirotsaka hamely anie Andriamanitra
ka ny fahavalony dia hiparitaka,
ny mpankahala handositra lavitra Azy!
3Toy ny fielin’ny setroka no aoka ho fieliny;
tahaka ny savoka mitsonika amin’ny afo
no aoka hahalevona ny olon-dratsy
eo anatrehan’Andriamanitra!
4Ny olo-marina kosa anie hifaly sy hiravo
ary dia hibita-kafaliana eo anoloany!
5Mihirà ho fanajana an’Andriamanitra,
mankalazà ny anarany amin’ny salamo
mba hanoman-dalana ho fandraisana
an’ilay mpitaingin-drahona ho kalesy.
Ny Tompo no anarany
ka mifalia eo anoloany#68.5 Jereo Sal 68.34; Deot 33.26; Is 19.1; Sal 18.10..
6Andriamanitra ao an-Toeramasiny
no ilay Ray miahy ny kamboty
sy manome rariny ny mpitondratena.
7Ny manirery omeny ankohonana,
ny voagadra avoakany ho afaka.
Ny mpikomy ihany no hitoetra
any amin’ny tany karankaina.
8Andriamanitra ô, fony Ianao niainga
mba hialoha ny vahoakanao
ka namakivaky izany taniefitra,
Fiatoana
9dia nihovotrovotra ny tany#68.9 Jereo Eks 19.18.,
nanorana koa ny habakabaka
teo anoloanao, ry Andriamanitr’i Sinay,
teo anoloanao, ry Andriamanitr’i Israely.
10Ranonoram-pitahiana no narotsakao
ka velombelona terỳ ilay taninao lany hery.
11Tao ny vahoakanao no niorim-ponenana,
fa izany no namboarinao ho an’ny ory
satria tsara fo Ianao, Andriamanitra ô.
12Injao ny Tompo mandefa hafatra,
ka dia zavon-tany ny vehivavy
mitondra ny vaovao manao hoe#68.12 Ampit Eks 15.20-21; 1 Sam 18.6-7.:
13«Samy vaky nandositra avokoa
na mpanjaka na tafika fahavalo.
Ireo vehivavy tavela tao an-trano
dia mizarazara ny zavatra voababo.
14Na ianareo tsy mba niady aza
fa nijanona niandry valan’ondry,
dia ho tahaka ny voromahailala
misy elany mirava-bolafotsy
sy volony mirava-bolamena tsara.
15Fony Andriamanitra Tsitoha
nanaparitaka ireo mpanjaka teo,
dia ilay tendrombohitra hoe Salmôna#68.15 Jereo Mpits 5.
no indro nilatsahan’ny oram-panala.»
16Ny vohitr’i Basàna dia vohitra mideza;
vohi-maro tendro ny vohitr’i Basàna.
17Kanefa nahoana, ry vohi-maro tendro,
no ialonanao ilay vohitra voafidy,
voafidin’Andriamanitra mba honenany?
Eny, hitoetra ao mandrakizay ny TOMPO!
18Kalesy an’arivony aman’alina
ireo kalesin’ny Tompo Andriamanitra;
ka avy any an-tendrombohitra Sinay#68.18 Ampit Deot 33.2. Izy
no mankao amin’ilay Toeramasina.
19Nitondra babo Ianao
no niakatra eny an-kavoana;
nandraisanao fanomezana ny olombelona#68.19 Ny hoe an-kavoana lazaina eto dia ny lanitra any ambony (jereo Ef 4.8a) na ny tendrombohitra Tsiôna* tao Jerosalema (jereo Sal 47.6; Is 33.5). –nandraisanao...olombelona: ampit Ef 4.8b.
na dia ireo mpikomy taminao koa aza
mba honenanao eo, ry TOMPO Andriamanitra.
20Hisaorana isan’andro isan’andro anie ny Tompo,
ilay Andriamanitra mpamonjy miahy antsika!
Fiatoana
21Andriamanitra mahavonjy ilay Andriamanitsika.
Eny, ilay ANDRIANANAHARY Tompo no afa-manala,
afa-manala antsika amin’ny fahafatesana.
22Ny lohan’ny fahavalony kosa montsaniny,
dia ireo lava volo mirehaka amin’ny ratsy.
23Hoy ny Tompo hoe:
«Ireo fahavalonao any Basàna hampodîko,
ny any an-kibon-dranomasina koa hampodîko,
24ka ny tongotrao no hanosihosy ny rany
ary hilelaka amin’izany koa ny alikanao#68.24 Ampit Sal 58,11; 2 Mp 9.36..»
25Ry ilay Andriamanitro Mpanjakako ô,
marevaka ny dianao ho any an-Toeramasina.
26Ny mpihira no indreo fa lohalalana,
ny mpitendry valiha no vodilalana;
ny eo anelanelan’izy roa tonta
dia ny tovovavy mively langoroana.
27Misaora an’Andriamanitra, ry vahoakany tafangona;
misaora Azy TOMPO, ry terak’i Israely.
28I Benjamîna, ilay foko bitika indrindra no eo aloha;
dia ny andrian’i Joda izay mareva-pitafiana,
avy eo indray dia ny andrian’i Zebolòna,
ary ny an’i Naftalỳ no manaraka an’ireo.
29Ry Andriamanitra ô, omeo baiko ny herinao
ka hamafiso hatrany izay efa vitanao ho anay,
30avy ao amin’ny tempolinao any Jerosalema
izay itondran’ireo mpanjaka fanatitra ho Anao.
31Rahòny i Ejipta, ilay biby anaty bararata;
rahòny ilay andian’ombilahy, dia ireo mpifehy vahoaka:
aoka ireo hikoy hitondra volafotsy ho Anao;
ataovy mihahaka kosa ireo vahoaka liana ady.
32Ho avy aminao ny andriandahin’i Ejipta;
hananty tanana aminao ny Etiôpianina.
33Ianareo fanjakana eto an-tany,
mihirà ho fanajana an’Andriamanitra;
miredòna salamo ho an’ny Tompo,
Fiatoana
34Ilay toa mitaingina kalesy
eo an-tampon’ny lanitra fahagola.
Injao Izy mamoaka ny feony,
dia feo midoboka mahery#68.34 Jereo Sal 29.3. Ny kotro-baratra no lazaina hoe feon’ny Tompo..
35Koa ekeo fa an’Andriamanitra ny hery:
mifehy an’i Israely ny fiandrianany
ary miery ao anaty rahona ny heriny.
36Mampitolagaga tokoa Andriamanitra
miseho avy ao amin’ilay Toeramasiny.
Izy no Andriamanitr’i Israely,
manome hery sy tanjaka ny vahoakany.
Hisaorana anie Andriamanitra!
Voafantina amin'izao fotoana izao:
Salamo 68: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.