Salamo 119
119
SALAMO Lalina sy mahavariana ny lalànan’Andriamanitra
ALEFA
1Sambatra#119.1 Jereo Sal 9.2 sy nta. Salamo araka ny abidỳ ny Sal 119 ka isaky ny and valo no miova ny tarehin-tsoratra fanombohana ny and. Anatin’ny and tsirairay kosa dia ampiasana voambolana mitovitovy hevitra amin’ny didin’ny Tompo: lalàna, baiko, fitsaràna, fepetra, hafatra, teny, lalana, sori-dalana, fampanantenana, toky nomena. ny mahitsy fitondrantena,
dia izay manaraka ny lalànan’ny TOMPO.
2Sambatra izay mitandrina ny baikony,
ka mitady Azy amin’ny fony manontolo.
3Eny, tsy mba manao ratsy ireo
fa manaraka ny sori-dalan’Andriamanitra.
4Ianao namoaka ny fepetranao, Tompo ô,
mba hotandremana fatratra.
5Enga anie ny fitondrantenako ho matotra
amin’ny fitandremana ny lalànanao;
6dia tsy ho menatra aho
mandinika ny didinao rehetra.
7Hidera Anao amin-kitsimpo aho
mianatra ny fitsarana ara-drariny navoakanao.
8Ny lalànanao no tiako hotandremana,
koa aza afoinao na oviana na oviana aho.
BETA
9Raha maninona ny tanora no hadio toetra?
Raha mitandrina ny teninao.
10Amin’ny foko manontolo no itadiavako Anao,
koa aza avela handao ny didinao aho.
11Raketiko ato am-poko ny hafatrao
mba tsy hanotako aminao.
12Hisaorana anie Ianao, TOMPO ô!
Ampianaro ahy ny lalànanao.
13Tanisain’ny molotro avokoa
ny fitsipika naloaky ny vavanao.
14Ny mizotra araka ny baikonao
no mahafaly ahy noho izay harena.
15Ny fepetranao hosaintsainiko,
ny sori-dàlanao hodinihiko;
16ny lalànanao firavoako,
ny teninao fitadîdiko.
GIMELA
17Asio soa aho mpanomponao
ho velona sy hitandrina ny teninao.
18Ampahirato ny masoko hahita
ny zava-mahagaga amin’ny lalànanao.
19Vahiny eto an-tany aho;
aza afenina ahy ny didinao.
20Matimaty erỳ aho maniry
ny fitsipikao amin’ny fotoan-drehetra.
21Rahonanao ny mpirehareha voaozona,
izay mandao ny didinao.
22Alao amin’ny fahafaham-baràka sy ny fanamavoana aho,
satria manaraka ny baikonao.
23Na andriana aza no mioko hamely ahy,
izaho mpanomponao misaintsaina ny lalànanao.
24Ny baikonao no firavoako:
ireo no manolo-tsaina ahy.
DALETA
25Mihohoka amin’ny vovoka ny tenako,
ka velomy indray araka ny fampanantenànao.
26Nitanisako ny fiainako Ianao ka namaly ahy;
ampianaro ahy ny lalànanao.
27Ampahafantaro ahy ny fepetranao ho sori-dàlako
mba hisaintsainako ny asa mahagaga nataonao.
28Patrapatraka ny ranomasoko noho ny alahelo;
areno aho araka ny fampanantenànao.
29Halaviro ahy rehefa mety ho soritra mamitaka;
ny lalànanao no aoka hanenika ahy!
30Nofidiko ho sori-dàlako ny firaiketam-po aminao;
nataoko teo anatrehako ny fitsipikao.
31Ny baikonao no ifikirako;
TOMPO ô, aza avela ho azon-kenatra aho.
32Ny didinao no sori-dalana ihazakazahako,
satria nosokafanao ny saiko.
HE
33TOMPO ô, atoroy ahy ny lalànanao ho sori-dàlako
mba hanarahako azy hatramin’ny farany.
34Ataovy mahira-tsaina aho hanarahako ny lalànanao,
sy hitandremako azy amin’ny foko manontolo.
35Ampizory amin’ny sori-dàlan’ny didinao aho,
satria izany no fahafinaretako.
36Ampirony amin’ny baikonao ny foko
fa tsy amin’ny fitiavan-karena.
37Avilio ny masoko tsy hijery zava-poana;
velomy amin’ny sori-dàlanao aho.
38Tovy amin’ny mpanomponao ny hafatrao
izay nataonao ho an’ny mpanaja Anao.
39Halaviro ahy ny fahafaham-baràka atahorako,
satria tsara ny fitsipikao.
40Indro maniry ny fepetranao aho,
koa velomy ao amin’ny fahamarinanao.
VAO
41Ho tonga amiko anie, TOMPO ô, ny mari-pitiavanao,
dia ny famonjenao araka ny toky nomenao!
42Ny mpanala baràka ahy ho voavaliko,
satria ny teninao no itokiako.
43Ny zava-marim-pototra aza avela hivadihako,
satria ny fitsipikao no antenaiko.
44Ny lalànanao tiako hotandremana lalandava
ka ho mandrakizay mandrakizay.
45Hizotra amin-kalalahana aho,
fa ny fepetranao no katsahiko.
46Ny baikonao no holazaiko
tsy amin-kenatra eo anatrehan’ny mpanjaka.
47Ny didinao no iravoako
ary ankamamîko fatratra.
48Hanandra-tanana hivavaka aminao aho#119.48 Ny manandra-tanana dia fihetsika fanao am-bavaka, jereo Sal 28.2. sy nta.,
ka ny lalànanao no hosaintsainiko.
ZAINA
49Tsarovy ny teninao tamiko mpanomponao,
dia ilay teny nataonao ho fitokiako.
50Hany fiononako amin’ny fahoriako izany,
satria ny hafatrao no mamelona ahy.
51Lalina raha haneso ahy ny mpirehareha
fa izaho tsy mivoana amin’ny lalànanao.
52Ny fitsipikao hatrizay, TOMPO ô,
no tsaroako ka ahazoako fiononana.
53Entanin’ny fahatezerana mafy aho
fa mandao ny lalànanao ny olon-dratsy.
54Ny lalànanao no ataoko fihira
ao an-trano ivahiniako#119.54 Jereo and 19. Ny toerana ivahiniana dia ity tany fandalovana ity..
55Tsaroako mandraka alina Ianao, TOMPO ô,
mba hitandremako ny lalànanao.
56Izao no hany fananako:
ny manaraka ny fepetranao.
HETA
57Ny anjarako, TOMPO ô, hoy aho,
dia ny mitandrina ny teninao.
58Ny foko manontolo no italahoako aminao,
koa iantrao aho araka ny toky nomenao.
59Mandinika ny fitondrantenako aho,
ka manitsy dia amin’ny fitsipikao.
60Dodona aho fa tsy mitaredretra
amin’ny fitandremana ny didinao.
61Voan’ny fandriky ny olon-dratsy aho,
nefa tsy manadino ny lalànanao.
62Mifoha mamatonalina aho hidera Anao
noho ny fitsipikao ara-drariny.
63Ihavanako avokoa izay manaja Anao
sy izay mitandrina ny fepetranao.
64Ny fitiavanao, TOMPO ô, manenika ny tany;
ampianaro ahy ny lalànanao.
TETA
65Efa nasianao soa izaho mpanomponao,
dia araka ny fampanantenànao, TOMPO ô.
66Ampianaro hahafantatra sy hahalala aho,
satria azoko antoka ny didinao.
67Naniasia aho fony tsy mbola azom-pahoriana,
fa ankehitriny tandremako ny hafatrao.
68Soa Ianao, Tompo ô, sady mpanisy soa:
ampianaro ahy ny lalànanao.
69Mamoron-dainga hamelezana ahy ny mpirehareha;
amin’ny foko manontolo no anarahako ny fepetranao.
70Donto velona ny sain’ireo,
fa izaho miravo amin’ny lalànanao.
71Nahasoa ahy ny azom-pahoriana
mba hianarako ny lalànanao.
72Aleoko ny lalàna naloaky ny vavanao
toy izay ny volamena amam-bolafotsy miavosa.
JODA
73Nanao sy namboatra ahy ny tananao:
ataovy mahira-tsaina aho hianarako ny didinao.
74Hifaly mahita ahy ireo manaja Anao,
satria ny teninao no antenaiko.
75Ny fitsipikao, TOMPO ô, fantatro fa rariny;
ka marim-pototra ny nampahorianao ahy.
76Hampionona ahy anie ny fitiavanao,
araka ny hafatrao tamiko mpanomponao!
77Ho tonga ato amiko anie ny indrafonao ka hamelona ahy,
satria ny lalànanao no firavoako!
78Aoka ho menatra ny mpirehareha
mampahory tsy amin’antony,
fa izaho misaintsaina ny fepetranao!
79Hitodika amiko anie ireo manaja Anao,
mba hahafantarany ny baikonao!
80Ny foko manontolo anie hifikitra amin’ny lalànanao,
dia tsy ho rakotry ny henatra mihitsy aho!
KAFA
81Reraka aho maniry ny famonjenao:
ny teninao no antenaiko.
82Valalanina ny masoko miandry ny hafatrao;
rahoviana no hampiononanao ahy?
83Zary *siny hoditra mainan’ny setroka aho,
kanefa tsy hadinoko ny lalànanao.
84Hiaritra ela toy izao foana ve izaho mpanomponao?
Rahoviana ny mpanenjika ahy no hotsarainao?
85Mihady longoa hianjerako ny mpirehareha;
tsy raharahainy akory izay lalànanao.
86Azo antoka avokoa ny didinao;
vonjeo aho fa enjehina tsy amin’antony.
87Kely sisa dia levona eto an-tany aho,
kanefa tsy mba nafoiko ny fepetranao.
88Noho ny fitiavanao, mba velomy aho
hitandremako ny baiko naloaky ny vavanao.
LAMEDA
89Maharitra mandrakizay, TOMPO ô,
no nanorenanao any an-danitra ny teninao.
90Mahatoky Ianao, amin’ny taona mifandimby;
Naorinao ny tany ka mitoetra mafy.
91Mandraka androany, araka ny fitsipikao,
dia mbola eo ny tontolo satria mpanomponao.
92Raha tsy ny lalànanao no firavoako,
toy izay aho efa matin’ny fahoriana.
93Tsy hohadinoiko mandrakizay ny fepetranao
izay namelomanao ny aiko.
94Fanananao aho ka vonjeo,
satria mikatsaka ny fepetranao.
95Mikendry hamely ahy ny olon-dratsy,
satria ny baikonao no hadihadîko.
96Izay toa lavorary dia nahitako fetra;
ny didinao no tena midadasika.
MEMA
97Endrey ny fitiavako ny lalànanao;
tontolo andro dia izy no saintsainiko.
98Ny didinao, izay fananako mandrakizay,
dia mahatonga ahy ho hendry noho ny fahavaloko.
99Hendry noho ny mpampianatra ahy rehetra aho,
satria misaintsaina ny baikonao.
100Mahira-tsaina noho ny zokiolona aho,
satria ny fepetranao no arahiko.
101Tsy nisy nekeko ny sori-dalàn’ny faharatsiana
mba hitandremako ny teninao.
102Tsy mba miala amin’ny fitsipikao aho,
fa Ianao dia Ianao no mampianatra ahy.
103Mamy tokoa amiko ny hafatrao,
eny, manoatra noho ny tantely aza.
104Ny fepetranao mampahira-tsaina ahy;
koa hàlako rehefa mety ho soritra mamitaka.
NONA
105Fanilon’ny diako ny teninao
sy fanazavana ny làlan-kizorako.
106Hamafisiko ny velirano izay nataoko,
dia ny hitandrina ny fitsipikao ara-drariny.
107Mijaly tsy eran’ny aina aho, TOMPO ô:
mba velomy indray araka ny fampanantenànao.
108Mba raiso ny tonom-bavaka atolotro Anao#119.108 Heverina ho fanatitra atolotra an’Andriamanitra ny vavaka; jereo Sal 50.14; 51.19.:
TOMPO ô, ampianaro ahy ny fitsipikao.
109Hatenda lalandava izao ny aiko,
nefa tsy hadinoko ny lalànanao.
110Ny olon-dratsy mitady hamandrika ahy,
fa izaho tsy mihataka amin’ny fepetranao.
111Ny baikonao no fananako mandrakizay:
ireo no fifalifalian’ny foko.
112Aronako hanao ny lalànanao ny foko,
hatramin’ny antsipiriany ary mandrakizay.
SAMEKA
113Hàlako ny olona miroa saina,
fa ny lalànanao kosa no tiako.
114Ianao no fiereko sy ampingako;
ny teninao no antenaiko.
115Mialà amiko, ianareo mpanao ratsy,
hanarahako ny didin’Andriamanitra.
116Tohàny araka ny fampanantenànao aho ho velona;
aoka tsy hataonao diso fanantenana!
117Tohàny hatrany aho mba ho voavonjy;
ny lalànanao no firavoako lalandava.
118Izay rehetra miala amin’ny lalànanao aetrinao,
satria ny lainga no teti-dratsy ao an-tsainy.
119Ny olon-dratsy eran-tany taim-by fanarinao:
izany no itiavako ny baikonao.
120Mihorohoro ny nofoko noho ny aminao,
fa atahorako tokoa ny fitsipikao.
HAINA
121Ny rariny sy hitsiny no ataoko;
aza atolotra ny mpampahory aho.
122Porofoy fa mahasoa ahy mpanomponao izany;
aoka aho tsy hampahorîn’ny mpirehareha!
123Ny masoko valalanina miandry ny famonjenao
sy ny fanafahana izay nampanantenainao.
124Ny fitiavanao itondrana ahy mpanomponao:
koa ampianaro ny lalànanao aho.
125Mpanomponao aho ka mba ataovy mahira-tsaina
hahafantarako ny baikonao.
126Izao no fotoana mety hihetsehanao, TOMPO ô,
fa dikain’ny olona ny lalànanao.
127Izany no itiavako ny didinao
manoatra ny volamena madio indrindra.
128Izany no ifidianako ny fepetranao
sy ankahalàko izay mety ho soritra mamitaka.
PE
129Mahagaga ny baikonao,
ka izany no anarahako azy.
130Manazava tokoa ny fahitana ny teninao
ary mampahira-tsaina ny olon-tsotra.
131Mitanatana vava, mihanahana aho:
ny didinao no mahaliana ahy.
132Mba todiho aho ka iantrao,
araka ny tinapakao ho an’ireo mpitia Anao.
133Hamafiso ho amin’ny hafatrao ny diako;
aoka aho tsy hanjakam-paharatsiana!
134Afaho amin’ny mpampahory aho
mba hitandremako ny fepetranao.
135Jereo amin-kamorampo izaho mpanomponao:
ampianaro ahy ny lalànanao.
136Izaho dia mamarin-dranomaso,
satria tsy voatandrina ny lalànanao.
TSADE
137Mandala ny rariny Ianao, TOMPO ô,
ary mahitsy ny fitsipikao.
138Ny baikonao dia ara-drariny
sy azo antoka tokoa.
139Mandoro ahy toy ny afo ny zotompoko,
fa hadinon’ny mpandrafy ahy ny teninao.
140Voasedra tanaty memy tokoa ny hafatrao,
ka dia tia azy ireny izaho mpanomponao.
141Kely sady mavomavo aho,
nefa tsy hadinoko ny fepetranao.
142Mahitsy mandrakizay ny fahitsianao
ary mahatoky ny lalànanao.
143Azon’ny fahoriana sy ny fahaterena aho,
nefa mbola miravo amin’ny didinao.
144Mahitsy mandrakizay ny baikonao;
ataovy mahira-tsaina aho mba ho velona.
KÔFA
145Miantso amin’ny foko manontolo aho ka valio
mba hanarahako ny lalànanao, TOMPO ô.
146Miantso Anao aho ka vonjeo
hitandremako ny baikonao.
147Mialoha ny mazavatsinanana aho mitalaho
ary dia miandry ny teninao.
148Mialoha ny besinimaro aho no nifoha
mba hisaintsaina ny hafatrao.
149Henoy ny feoko araka ny fitiavanao;
TOMPO ô, velomy araka ny fitsipikao aho.
150Ireo mpanenjika ahy manatona heloka;
ny lalànanao kosa halaviriny.
151Akaiky ahy Ianao, TOMPO ô,
ary mahatoky avokoa ny didinao.
152Ny baikonao dia fantatro hatry ny ela
fa naorinao ho mandrakizay.
RESA
153Jereo ny fahoriako, ka afaho aho,
fa ny lalànanao tsy hadinoiko.
154Iandraiketo ny adiko ka avoty aho
ary velomy araka ny fampanantenànao.
155Lavitra ny olon-dratsy ny famonjena,
satria tsy ny lalànanao no katsahiny.
156Lehibe ny indrafonao, TOMPO ô;
velomy aho araka ny fitsipikao.
157Maro ny mpanenjika sy mpandrafy ahy;
ny baikonao tsy mba ialako.
158Nahita mpivadika aho, ka narikoriko;
ny hafatrao tsy mba tandremany.
159Jereo fa mankamamy ny fepetranao aho,
ka velomy araka ny fitiavanao, TOMPO ô.
160Ny toetra mahatoky no mivohitra amin’ny teninao;
ny fitsipikao dia ara-drariny avokoa sy mandrakizay.
SINA
161Enjehin’andriana tsy amin’antony aho;
ny teninao ihany no atahoran’ny foko.
162Ny hafatrao no mahafaly ahy
tahaka ny mahazo remby sesehena.
163Hàlako ary maharikoriko ahy ny fitaka,
fa ny lalànanao no ankamamîko.
164Impito isan’andro no iderako Anao
noho ny fitsipikao ara-drariny.
165Fiadanam-be ny an’izay mankamamy ny lalànanao,
ary tsy misy zavatra mahasolafaka azy.
166Ny famonjenao, TOMPO ô, no antenaiko
ka ny didinao no tanterahiko.
167Ny baikonao dia tandremako,
satria ankamamîko aoka izany.
168Eny, voatandriko ny fepetra amam-baikonao;
eo anoloanao ny làlan-kalehako rehetra.
TAO
169Aoka ho tonga eo anoloanao ny tarainako, TOMPO ô!
Ataovy mahira-tsaina aho araka ny fampanantenànao.
170Ny fihantàko anie ho tody eo anatrehanao;
mba afaho aho araka ny toky nomenao.
171Hidera Anao anie ny molotro,
satria nampianarinao ahy ny lalànanao!
172Hanambara ny hafatrao anie ny lelako,
satria rariny avokoa ny didinao!
173Ny fiarovanao anie hanampy ahy,
satria ny fepetranao no nofidiko!
174Mahaliana ahy, TOMPO ô, ny famonjenao;
ary ny lalànanao no firavoako.
175Veloma anie ny aiko hiderako Anao;
ary hanampy ahy anie ny fitsipikao!
176 Ondry nania izaho mpanomponao ka tadiavo;
fa ny didinao tsy mba hadinoiko.
Voafantina amin'izao fotoana izao:
Salamo 119: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.