Salamo 10
10
LAMEDA
1Nahoana Ianao, TOMPO ô,
no mijanona eny lavitra eny?
Ary nahoana Ianao no miery
amin’ny androm-pahoriana?
2Mirehaka erỳ ny olon-dratsy
mitsentsitra ny malahelo;
tamina tetika maty paika
no namelezany azy ireo.
3Mibitaka erỳ ny olon-dratsy
fa mahazo izay nirîny;
kanefa ny TOMPO tsiratsirainy
sady hamavoiny tokoa.
4Ny olon-dratsy mirehareha hoe:
«Tsy hanadina Andriamanitra,
tsy misy Andriamanitra.»
Izany no ambentin-keviny.
5Mahomby mandrakariva ny zavatra ataony,
vingavingainy avokoa izay manohitra azy,
tsy tazany ny fitsaran’Andriamanitra.
6Hoy ny olon-dratsy anakampony:
«Tsy misy atahorako akory,
fa ieren-doza hatrany aho.»
PE
7Ozona sy fitaka ary hafetsena
no mameno ny teny lazainy#10.7 Jereo Rm 3.14; ampit Mt 12.34.;
fampahoriana sy faharatsiana
no zavatra tiany hambara.
8Mamitsaka hanotrika eny akaikin-tanàna izy
ary mamono an-katakonana ny tsy manan-tsiny;
HAINA
ny masony mitily ireo fadiranovana.
9Manotrika an-katakonana tokoa izy
toy ny fanaon’ny liona ao am-pierena;
manotrika hisambotra ny malahelo izy
ka mitarika azy ho ao anaty haratony.
10Torotoro ny malahelo fa resy mihitsy
ka mianjera ho eo ambany fahefàny.
11Dia hoy ny olon-dratsy anakampony:
«Tsy raharahain’Andriamanitra izany
sady ikimpiany fa tsy mba jereny
ary tsy hitany na oviana na oviana!»
KÔFA
12TOMPO Andriamanitro ô, mirotsaha an-tsehatra.
Ahinjiro ny tananao hanafay ny olon-dratsy
ka aza hadinoina re ireo malahelo.
13Nahoana moa ny olon-dratsy
no haneso Anao Andriamanitra,
ka hiteny anakampo hoe:
«Tsy hanadina ahy Izy!»?
RESA
14Hitanao fa mijaly sy ory ny mahantra,
ka mivonon-kanampy azy hatrany Ianao;
Ianao no itokian’ny malemy,
sady mamonjy ny kamboty.
SINA
15Koa poteho ny herin’ny olon-dratsy,
adino aminy ny ratsy nataony
ary aoka izy tsy ho hita soritra intsony!
16Ny TOMPO no mpanjaka mandrakizay mandrakizay;
ho fongotra amin’ny taniny ny mpanompo sampy.
TAO
17TOMPO ô, renao ny fanirian’ny malahelo
ka ampaherezinao tokoa ny fony.
18Vonon-kihaino hatrany
ny kamboty sy ny ampahorîna Ianao
mba hanomezanao azy ny rariny.
Dia ho foana tanteraka hatreo
ny mpanjakazaka etỳ an-tany.
Voafantina amin'izao fotoana izao:
Salamo 10: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.