Ohabolana 25
25
1Indreto koa no ohabolan’i Salômôna voaangon’ny olon’i Hezekià mpanjakan’i Joda.
Ohabolana isan-karazany
2Andriamanitra dia omem-boninahitra
noho Izy manao zava-miafina;
ny mpanjaka kosa dia omem-boninahitra
noho izy manazava ny zavatra ataony.
3Ny haavon’ny lanitra sy ny halalin’ny tany
ary ny ao am-pon’ny mpanjaka dia samy tsy fantatsika.
4Esory amin’ny volafotsy ny lotony,
dia fanaka sarobidy no havoakan’ny mpanefy;
5esory tsy ho eo amin’ny mpanjaka ny olon-dratsy
dia fahamarinana no hiorenan’ny fiandrianany.
6Aza miedinedina eo anatrehan’ny mpanjaka
na misolantsolana eny amin’ny toeran’ny lehibe;
7fa aleo ianao hilazana hoe: «Miakara etỳ»,
toy izay mahita ny tenanao haetry
eo anatrehan’ny manan-kaja#25.7 And 6-7: jereo Lk 14.8-10..
8Izay zavatra hitan’ny masonao#25.8 izay... hitan’ny masonao: araka ireo dkt tranainy izao fampiraisana azy amin’ny andalana manaraka izao. Ny RM dia mampitohy ity tapa-pehezanteny ity amin’ny and 7 ka azo adika hoe manan-kaja izay hitan’ny masonao. ,
aza maika ny hitondra izany am-pitsarana,
fandrao tsy hitanao izay hatao amin’ny farany
rehefa voaporofon’ny namanao fa ianao no diso.
9Alamino miaraka amin’ny namanao ny adinao aminy,
nefa aza tsikafonina ny tsiambaratelon’ny hafa;
10fandrao izay mandre hanome tsiny anao
ka dia ho afa-baràka mandrakizay ianao.
11Toy ny paoma volamena voahaingo volafotsy,
no hasarobidin’ny teny lazaina amin’ny ilàna azy.
12Toy ny kavina sy rojo volamena
no hasoan’ny anatry ny hendry amin’izay mihaino.
13Mamelombelona aina ny hatsiakan’ny rano mamanala
amin’ny fotoam-pijinjana mafana;
mamelombelona aina toy izany koa ny iraka mahatoky
amin’ny tompony naniraka azy.
14Tahaka ny rahona sy rivotra tsy mitondra orana
ny olona mampanantena zavatra izay tsy homeny akory.
15Izay manam-paharetana no maharesy lahatra mpitsara;
ary ny teny malefaka mampilefitra ny henjana.
16Raha mahita tantely ianao, dia hano izay sahaza anao,
fandrao ho leony ianao ka handoa azy;
17aoka ianao tsy hateti-pankany an-tranon’ny namanao,
fandrao tofoka aminao izy ka hankahala anao.
18Mandratra toy ny langilangy na sabatra
na koa zana-tsipîka maranitra
ny olona mijoro ho vavolombelona mandainga
mba hanamelohana ny namany.
19Toy ny mitsako amin’ny nify mihozongozona
na mihazakazaka amin-tongotra kilemaina
ny matoky olona mpamadika
amin’ny androm-pahoriana.
20Toy ny manary lamba amin’ny andro mangatsiaka
na toy ny manisy vinaingitra amin’ny fery,
toy izany koa izay mihira amin’olona malahelo#25.20 manisy vinaingitra amin’ny fery: araka ny dkt tranainy grika; ny RM kosa manao hoe manampy vinaingitra amin’ny siran-tany. .
21Raha noana ny fahavalonao, dia omeo hanina;
raha mangetaheta izy, dia omeo rano hosotroiny;
22fa raha manao izany ianao,
dia toy ny manala vainafo eo an-dohany#25.22 And 21-22: jereo Rm 12.20 sy nta..
Ary ny TOMPO no hamaly soa anao.
23Ny rivotra avy any avaratra mahatonga orana,
ary ny fanendrikendrehana olona mahavinitra endrika azy.
24Aleo mitoetra amin’ny efitra kely ao an-tampon-trano
toy izay miray trano amin’ny vehivavy liana ady.
25Toy ny rano mangatsiaka ho an’ny tenda main-ketaheta
ny vaovao mahafaly avy any an-tany lavitra.
26Toy ny loharano voaloto sy fantsakana voapoizina
ny olo-marina milefitra eo anoloan’ny olon-dratsy.
27Tsy tsara ny mihinana tantely be loatra
na koa ny mitady hahazo voninahitra be loatra.
28Toa tanàna rava tsy misy manda intsony
ny olona izay tsy mahatsindry fo.
Voafantina amin'izao fotoana izao:
Ohabolana 25: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.