Nomerỳ 7
7
Ireo sarety nomena ny Toeramasina
1Tamin’ny andro namitan’i Mosesy ny fananganana ny Fonena-masina no nanosorany sy nanokanany azy niaraka tamin’ny kojakoja rehetra momba azy; nohosorany sy notokanany tahaka izany koa ny alitara mbamin’ny kojakoja rehetra momba azy. 2Avy eo dia niroso ireo filoham-pianakaviambe tamin’ny fokon’i Israely, izany hoe ireo nitarika ny fanisana. 3Nitondra fanomezana teo anatrehan’ny TOMPO ireo, dia sarety enina mirakotra sy omby 12 ka sarety iray no avy amin’ny filoha roa ary omby iray no avy amin’ny filoha iray. Nentiny teo anoloan’ny Fonena-masina avokoa ireo. 4Dia hoy ny TOMPO tamin’i Mosesy:
5–Raiso ireo fanomezana entiny eto aminao ireo fa ilaina amin’ny asa fanompoana momba ny Tranolay fihaonana izany, ka omeo ny Levita, samy araka ny ilàny azy avy.
6Dia noraisin’i Mosesy ny sarety sy ny omby ka nomeny ny Levita. 7Nomeny sarety roa sy omby efatra ny taranak’i Gersôna, araka ny ilainy amin’ny asany. 8Ny sarety efatra sisa sy ny omby valo kosa dia nomeny ny taranak’i Merarỳ tamin’ny alalan’i Itamara mpisorona sady zanakalahin’i Aharôna, araka ny ilainy amin’ny asany. 9Fa ny taranak’i Kehàta kosa tsy mba nomeny, satria izy ireo no tompon’andraikitra momba ny fitaovana masina, ka tsy maintsy milanja izany eo an-tsoroka.
Ny fanomezana enti-mitokana ny alitara
10Tamin’ny andro nanosorana ny alitara, dia ireo filoham-pianakaviambe koa no nitondra fanomezana ho fitokanana azy. Samy nitondra ny fanomezany avy teo anoloan’ny alitara izy ireo. 11Dia hoy ny TOMPO tamin’i Mosesy:
–Aoka hifandimby hitondra ny fanomezany isan’andro avy ireo filoha ireo amin’ny fanokanana ny alitara!
12-83Toy izao manaraka izao ny fahatongavany nitondra ny fanomezany:
tamin’ny andro voalohany dia i Nahasôna zanakalahin’i Hadaba, avy amin’ny fokon’i Joda;
tamin’ny andro faharoa dia i Natanaela zanakalahin’i Tsohara, avy amin’ny fokon’i Jisakara;
tamin’ny andro fahatelo dia i Eliaba zanakalahin’i Helôna, avy amin’ny fokon’i Zebolòna;
tamin’ny andro fahefatra dia i Elitsora zanakalahin’i Sedeòra, avy amin’ny fokon’i Reobena;
tamin’ny andro fahadimy dia i Selomiela zanakalahin’i Tsorisaday, avy amin’ny fokon’i Simehôna;
tamin’ny andro fahenina dia i Eliasafa zanakalahin’i Dehoela, avy amin’ny fokon’i Gada;
tamin’ny andro fahafito dia i Elisamà zanakalahin’i Hamihoda, avy amin’ny fokon’i Efraîma;
tamin’ny andro fahavalo dia i Gamalièla zanakalahin’i Pedahatsoro, avy amin’ny fokon’i Manase;
tamin’ny andro fahasivy dia i Abidàna zanakalahin’i Gidehônỳ, avy amin’ny fokon’i Benjamîna;
tamin’ny andro fahafolo dia i Ahihezera zanakalahin’i Hamisaday, avy amin’ny fokon’i Dana;
tamin’ny andro faha-11 dia i Pagihiela zanakalahin’i Hôkràna, avy amin’ny fokon’i Asera;
ary tamin’ny andro faha-12 dia i Ahîra zanakalahin’i Henàna, avy amin’ny fokon’i Naftalỳ.
Ireto manaraka ireto kosa ny fanomezana nentin’ny filoham-pianakaviana tsirairay avy:
–lovia volafotsy iray milanja 1 300 grama, tsatokaty volafotsy famafazana iray milanja 700 grama araka ny ventin-danja fampiasa ao amin’ny Toeramasina; ireo fitaovana ireo dia samy feno lafarinina tsara toto sy voafeta menaka ho fanatitra;
–zinga volamena iray milanja 100 grama feno vovo-javamanitra;
–vantotr’ombilahy iray sy ondrilahy iray ary ondrilahikely iray izay iray taona avy, samy hatao sorona dorana manontolo;
–osilahy iray hatao sorona fanalana ny ota;
–ary ombilahy roa, ondrilahy dimy sy osilahy dimy ary ondrilahikely dimy izay iray taona avy, samy hatao sorom-pihavanana.
84Ireto ny fitambaran’ny fanomezana natolotr’ireo filoham-pianakaviamben’i Israely tamin’ny andro nanosorana sy nanokanana ny alitara: lovia volafotsy 12, kaopy volafotsy famafazana 12, lovia kely volamena 12, 85ka 1 300 grama avy no lanjan’ny lovia volafotsy iray ary fitonjato grama avy no lanjan’ny kaopy volafotsy iray. Ny fitambaran’ireo fanaka volafotsy ireo dia 24 kilao araka ny ventin-danja fampiasa ao amin’ny Toeramasina. 86Zato grama no lanjan’ny lovia kely volamena iray, ka ny lanjan’ny zinga 12 mitambatra dia 1 200 grama araka ny ventin-danja fampiasa ao amin’ny Toeramasina. 87Ireo biby rehetra natao sorona dorana manontolo dia vantotr’ombilahy 12, ondrilahy 12, ondrilahikely 12 izay iray taona avy miaraka amin’ny fanatitra momba azy; osilahy 12 no natao sorona fanalana ny ota. 88Ny biby rehetra natao sorom-pihavanana kosa dia ombilahy 24, ondrilahy 60, osilahy 60, ondrilahikely 60 izay iray taona avy. Ireo no fanomezana natolotra ho fanokanana ny alitara rehefa voahosotra izy.
89Rehefa niditra tao amin’ny Tranolay fihaonana i Mosesy mba hiresaka amin’ny TOMPO, dia nandre feo niteny taminy avy teo anelanelan’ny kerobima roa izy, dia teo ambonin’ny rakotry ny Vatamasina misy ny raki-tsoratry ny fanekempihavanana; ary niresahan’ny TOMPO i Mosesy.
Voafantina amin'izao fotoana izao:
Nomerỳ 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.