Nomerỳ 31
31
Ny ady masina tamin’ny Midianita
1Niteny tamin’i Mosesy ny TOMPO ka nanao hoe:
2–Faizo ny Midianita noho ny ratsy izay nataony tamin’ny Israelita#31.2 Jereo toko 25, indrindra ny 25.17-18.; aorian’izany, dia ho faty tahaka ireo razanao ianao.
3Ka hoy i Mosesy tamin’ny vahoaka:
–Aoka hivonon-kiatrika ady ny sasany aminareo ary hanafika ny Midianita hahatanteraka ny famaizan’ny TOMPO azy. 4Mpiady arivo lahy isam-poko no halefanareo hiantafika.
5Nisy arivo lahy isam-poko notsongaina tamin’ny foloalindahin’i Israely, dia roa arivo sy iray alina izay vonon-kiatrika ady. 6Dia nalefan’i Mosesy hiantafika izy rehetra ireo niaraka tamin’i Pinehasa mpisorona sady zanakalahin’i Elehazara; i Pinehasa no nitondra ny fitaovana masina ary koa ny trompetra mpanainga hiady#31.6 fitaovana masina: mety ho ny Orîma sy ny Tomîma (jereo Eks 28.30 sy nta); ny trompetra: jereo 10.9.. 7Dia nanafika ny Midianita araka izay efa nandidian’ny TOMPO an’i Mosesy ireo, ka namono nahafaty ny lehilahy rehetra. 8Matin’ny Israelita koa ny mpanjaka midianita dimy lahy, dia i Evỳ sy i Rekema, i Tsoro sy i Hora ary i Reba. Novonoiny ho faty tamin’ny sabatra ihany koa i Balahama zanakalahin’i Behôra. 9Nataony sambo-belona ny vehivavy sy ny zaza midianita; nobaboiny avokoa ny biby fiompy rehetra mbamin’ny omby aman’ondriny rehetra ary ny fananany rehetra. 10Nodorany avokoa ny tanàna rehetra nonenany sy nitobiany. 11Dia nalainy avokoa izay rehetra nobaboiny na olona na biby, 12ka nentiny tany amin’i Mosesy sy i Elehazara mpisorona ary ny fiangonana israelita teo an-toby tao amin’ny lemak’i Môaba, amoron’i Jôrdàna tandrifin’i Jerikao.
13Nivoaka nitsena azy teo ivelan’ny toby i Mosesy sy i Elehazara mpisorona ary ny filohan’ny fiangonana rehetra. 14Tezitra tamin’ireo filohan’antokon-tafika sy filohan’andian-tafika izay avy nanafika i Mosesy, 15ka niteny taminy hoe:
–Nahoana no navelanareo ho velona ny vehivavy rehetra? 16Ireo ihany, noho ny torohevitr’i Balahama, no nahatonga ny Israelita hanao fahadisoana lehibe tamin’ny TOMPO, tamin’ilay raharahan’i Pehôra#31.16 noho ny torohevitr’i Balahama: ny toko faha-25 (ny raharahan’i Pehôra) dia tsy milaza izany andraikitra notanan’i Balahama izany; fa lovan-tantara hafa no tsy maintsy ahitana izany., ka niavian’ny areti-mandringana teo amin’ny fiangonan’ny TOMPO. 17Koa ankehitriny vonoy ho faty avokoa ny zaza lahy rehetra ary koa ny vehivavy rehetra efa nanambady. 18Fa ny zazavavy rehetra mbola virijiny kosa dia velomy ka tano ho anareo. 19Mitobia any ivelan’ny toby mandritra ny fito andro ianareo, dia ianareo izay nahafaty olona na nikasi-paty, ka samia midio amin’ny andro fahatelo sy fahafito, na ny tenanareo na ny zazavavy sambo-belonareo. 20Diovy koa ny fitafianareo rehetra mbamin’ny fanaka rehetra vita hoditra na vita volon’osy na vita hazo.
21Dia hoy i Elehazara mpisorona tamin’ny miaramila nandray anjara tamin’ny fanafihana:
–Izao no fepetran-dalàna izay nandidian’ny TOMPO an’i Mosesy: 22Ny volamena, ny volafotsy, ny varahina, ny vy, ny vy fotsy ary ny firaka, 23izany hoe ny zavatra rehetra mahatanty afo, dia sedrao amin’ny afo ho afa-doto, vao atsobohy ao amin’ny rano fanadiovana. Ary izay tsy mahatanty afo kosa dia atsobohy fotsiny ao anaty rano fanadiovana#31.23 rano fanadiovana: jereo 19.9.. 24Sasao ny fitafianareo amin’ny andro fahafito, dia hadio ianareo ka hahazo miditra ao an-toby amin’izay.
Ny fizaràna ny babo
25Niteny tamin’i Mosesy ny TOMPO ka nanao hoe:
26–Mandehana ianao sy i Elehazara mpisorona ary ny filoham-pianakaviana amin’ny fiangonana maka ny isan’ny voababo rehetra na olona izany na biby. 27Zarao izany ka ny antsasany ho an’izay nandray anjara tamin’ny fanafihana ary ny antsasany ho an’ny fiangonana manontolo. 28Hakanao hetra ho AHY anefa ny anjaran’ireo mpiantafika, dia olona iray isaky ny olona dimanjato ary biby iray isaky ny biby dimanjato raha omby na boriky na ondry na osy izany. 29Halanao amin’ny anjaran’ny mpiantafika izany fanatitra ho AHY izany ka homenao an’i Elehazara mpisorona. 30Ary ny anjaran’ny Israelita kosa dia hakanao olona iray isaky ny olona dimampolo ary biby iray isaky ny biby dimampolo raha omby na boriky na ondry na osy na koa biby hafa rehetra, ka homenao ny Levita izay miandraikitra ny fanompoana ao amin’ny Fonena-masina.
31Dia nataon’i Mosesy sy i Elehazara mpisorona araka izay nandidian’ny TOMPO an’i Mosesy izany. 32Ny sisa tavela tamin’ireo babo azon’ny mpanafika dia ondry aman’osy 675 000, 33omby 72 000, 34boriky 61 000, 35ary vehivavy mbola virijiny 32 000. 36Ny antsasany anjaran’ny mpiantafika dia ondry aman’osy 337 500, 37ka ny 675 no hetra nalana ho an’ny TOMPO; 38omby 36 000 ka ny 72 ho an’ny TOMPO; 39boriky 30 500, ka ny 61 ho an’ny TOMPO; 40olona 16 000 ka ny 32 ho an’ny TOMPO. 41Nomen’i Mosesy an’i Elehazara mpisorona ny hetra natao ho fanatitra ho an’ny TOMPO, araka izay nandidian’ny TOMPO an’i Mosesy. 42-43Ny anjara nomena ny fiangonan’i Israely sisa dia mitovy amin’ny an’ny mpiantafika, izany hoe ondry aman’osy 337 500, 44omby 36 000, 45boriky 30 500 46ary olona 16 000. 47Tamin’ny anjara nomena ny Israelita dia nangalan’i Mosesy olona iray isaky ny olona dimampolo, ary biby iray isaky ny biby dimampolo; koa araka izay nandidian’ny TOMPO an’i Mosesy dia nomeny ny Levita izay miandraikitra ny fanompoana momba ny Fonena-masin’ny TOMPO izany.
Fanatitra an-tsitrapo ho an’Andriamanitra
48Nanatona an’i Mosesy ny filoha miaramila rehetra, dia ny komandin’ny antokon-tafika sy ny andian-tafika 49ka nanao taminy hoe:
–Efa nalainay ny isan’ny mpiantafika izay teo ambany fifehezanay, ka tsy nisy latsaka na dia iray aza. 50Koa izany no itondranay fanatitra ho an’ny TOMPO mba hanaovana fombam-pivavahana famelan-keloka eo anatrehany ho an’ny tenanay, dia ny firavaka volamena hitan’ny tsirairay avy toy ny rojo, haba, peratra, kavina ary ny haingom-bozona.
51Noraisin’i Mosesy sy i Elehazara mpisorona tamin’ny filoha miaramila ny volamena rehetra izay firavaka voatefy avokoa. 52Ny lanjan’ny volamena rehetra natolotr’ireo manamboninahitra ireo ho an’ny TOMPO dia nahatratra 170 kilao eo ho eo. 53Fa ny miaramila tsotra kosa dia samy nitahiry ho an’ny tenany izay zavatra nobaboiny manokana. 54Dia napetrak’i Mosesy sy i Elehazara mpisorona tao amin’ny Tranolay fihaonana ny volamena rehetra nomen’ny manamboninahitra miaramila, mba hahatsiarovan’ny TOMPO ireo Israelita.
Voafantina amin'izao fotoana izao:
Nomerỳ 31: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.