Nomerỳ 17
17
Ny fitaovana fandoroana zava-manitra fampiasan’ny mpomba an’i Kôra
1Dia niteny tamin’i Mosesy ny TOMPO ka nanao hoe:
2–Lazao i Elehazara mpisorona zanakalahin’i Aharôna mba hanala ny fitaovana fandoroana zava-manitra ao anaty forohona sy hanely lavitra ny vainafo satria zava-masina ireny fitaovana ireny. 3Ny fitaovam-panembohan’ireo olona matin’ny fahotany ireo dia hatao takelaka manify handrakofana ny alitara#17.3 Ampit Eks 27.2., fa efa naterina teo anatrehako TOMPO ireny ka masina; ary dia ho marika fampitandremana ho an’ny Israelita izany.
4Nalain’i Elehazara mpisorona ny fitaovam-panembohana halimo izay an’ireo olona nodorana velona ireo, ka nofisahiny ho takelaka handrakofana ny alitara. 5Izany dia fahatsiarovana ho an’ny Israelita mba tsy ho olon-kafa ankoatra ny taranak’i Aharôna no hanatona handoro ny vovo-javamanitra eo anatrehan’ny TOMPO; izay sahy hanao izany dia hiharan’ny nanjo an’i Kôra sy ny namany, araka izay nambaran’ny TOMPO tamin’i Aharôna tamin’ny alalan’i Mosesy.
Nanakiana an’i Mosesy sy i Aharôna ny vahoaka
6Nony maraina dia nanakiana an’i Mosesy sy i Aharôna ny fiangonana israelita manontolo ka nanao hoe:
–Ianareo no nahafaty ny vahoakan’ny TOMPO.
7Nitangorona nanakiana an’i Mosesy sy i Aharôna ny fiangonana, fa izy roa lahy kosa nitodika nijery tany amin’ny Tranolay fihaonana, ka indro hitany nanarona azy ny rahona izay nisehoan’ny voninahitry ny TOMPO#17.7 Jereo Eks 13.21 sy nta.. 8Dia nankeo anoloan’ny Tranolay fihaonana i Mosesy sy i Aharôna. 9Ary niteny tamin’i Mosesy ny TOMPO ka nanao hoe:
10–Mialà ianareo amin’io fiangonana io fa handringana azy indray mipi-maso Aho.
Dia niankohoka tamin’ny tany izy roa lahy, 11ary hoy i Mosesy tamin’i Aharôna:
–Raiso ny fitaovam-panembohana, dia asio vainafo avy amin’ny alitara sy vovo-javamanitra ary mankanesa haingana eo amin’ny fiangonana ka manaova ny fombam-pivavahana hahazoany famelan-keloka. Fa efa nisafoaka ny fahatezeran’ny TOMPO ary efa miantomboka ny areti-mandringana.
12Noraisin’i Aharôna araka ny tenin’i Mosesy ny fitaovana fandoroana zava-manitra, dia nilomay nankeo afovoan’ny fiangonana izy; ary indro fa efa niantomboka tamin’ny vahoaka ny loza. Nandoro vovo-javamanitra teo izy ka nanao ny fombam-pivavahana hahazoam-pamelan-keloka ho an’ny vahoaka. 13Nijoro teo anelanelan’ny maty sy ny velona izy, dia nitsahatra ny loza mandringana. 14Kanefa 14 700#17.14 Ny hoe 14 700 dia mety mivaky hoe andiany 14 misy olona 700. no niharan-doza, afa-tsy ireo efa maty tamin’ny raharahan’i Kôra. 15Dia niverina teo amin’i Mosesy teo am-baravaran’ny Tranolay fihaonana i Aharôna, nony efa nitsahatra ny loza.
Ny tehin’i Aharôna
16Niteny tamin’i Mosesy ny TOMPO#17.16 Amin’ny dkt sasany, ny and 16-28 dia voalahatra 17.1-13. Jereo 17.1 sy nta. ka nanao hoe:
17–Lazao ny Israelita mba hanolotra tehina iray ho anao isam-pokony avy, izany hoe hahazo tehina roambinifolo avy amin’ny filohan’ny foko rehetra ianao. Hosoratanao eo amin’ny tehiny avy ny anarany, 18afa-tsy ny an’ny fokon’i Levỳ izay hametrahanao ny anaran’i Aharôna, satria tehina iray ihany isaky ny filoham-poko. 19Hapetrakao ao amin’ny Tranolay fihaonana ireo tehina ireo, eo anoloan’ny Vatamasina itahirizana ny raki-tsoratry ny fanekempihavanana, dia ilay toerana ihaonako aminareo. 20Hitsimoka ny tehin’ilay lehilahy hofidiko, koa dia hampanginiko ny fanakianan’ny Israelita anareo eo anatrehako.
21Niteny tamin’ny Israelita i Mosesy, dia samy nanatitra tehina iray avy isam-poko ny filoha rehetra; koa dia nahazo tehina roambinifolo izy, ary ny tehin’i Aharôna dia teo afovoan’ny tehin’izy ireo. 22Napetrak’i Mosesy teo anatrehan’ny TOMPO tao amin’ny Tranolay nisy ny Vatamasina ireo tehina. 23Ny ampitso dia niditra tao amin’ny Tranolay i Mosesy, ka nahita fa ny tehin’i Aharôna izay anisan’ny fokon’i Levỳ dia nitsimoka sy namony ary namoa voankazo masaka. 24Nalain’i Mosesy teo anatrehan’ny TOMPO avokoa ny tehina ka nasehony tamin’ny Israelita rehetra. Nahita izany izy ireo ka samy naka ny tehiny avy. 25Dia hoy indray ny TOMPO tamin’i Mosesy:
–Avereno eo anoloan’ny Vatamasina ny tehin’i Aharôna; hotahirizina eo izany mba hampahatsiaro ny Israelita fa vahoaka mpiodina izy. Izany no hampitsaharanao ny fanakianany Ahy, dia tsy ho faty izy#17.25 And 23-25: jereo Heb 9.4..
26Dia notanterahin’i Mosesy araka izay nandidian’ny TOMPO hataony izany.
Ny anjara asan’ny mpisorona sy ny levita
27Niteny tamin’i Mosesy ny Israelita ka nanao hoe:
–Indro fa ho faty izahay, ho ringana izahay; eny, ho ringana avokoa izahay rehetra. 28Na zovy na zovy manakaiky ny Fonena-masin’ny TOMPO dia tsy maintsy maty! Koa ho faty tsy misy miangana avokoa va izahay rehetra?
Voafantina amin'izao fotoana izao:
Nomerỳ 17: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.