Nomerỳ 16
16
Ny fikomian’i Kôra
1I Kôra#16.1 Jereo Joda 11. zanakalahin’i Jitsehara dia levita taranak’i Kehata; nitarika an’i Datàna sy i Abirama zanakalahin’i Eliaba, ary i Ôna zanakalahin’i Peleta izay samy taranak’i Reobena izay 2hikomy amin’i Mosesy. Nanampy azy ireo tamin’izany ny Israelita miisa 250 izay samy lohandoham-piangonana sady olom-boafidy ary manan-daza. 3Nitangorona nanodidina an’i Mosesy sy i Aharôna izy ireo ka nanao taminy hoe:
–Ampy ho anareo izay, fa masina avokoa ny olona rehetra ao amin’ny fiangonana sady eo afovoany ny TOMPO. Nahoana ianareo no mihevi-tena ho ambonin’ny mambra hafa ao amin’ny fiangonan’ny TOMPO?
4Raha nandre izany i Mosesy, dia niankohoka tamin’ny tany 5ka niteny tamin’i Kôra sy ny namany hoe:
–Rahampitso dia hasehon’ny TOMPO izay Azy sy izay masina ary izay afaka manakaiky Azy; dia izay hofidiny no hampanakaikeziny Azy. 6Izao no ataovy, ry Kôra sy ianareo namany rehetra: Makà fitaovana fandoroana zava-manitra, 7dia asio vainafo ao anatin’ireny rahampitso ary andraraho vovo-javamanitra eo ambonin’izany eo anatrehan’ny TOMPO. Ho hita eo izay hofidin’ny TOMPO ka ho masina. Ampy izay, ry taranak’i Levỳ.
8Dia hoy indray i Mosesy tamin’i Kôra:
–Henoy, ry taranak’i Levỳ! 9Tsy ampy anareo ve ny nanavahan’ilay Andriamanitr’i Israely anareo tamin’ny fiangonan’i Israely mba hahafahanareo manakaiky Azy, ka hanaovanareo ny asa fanompoana ao amin’ny Fonena-masin’ny TOMPO ary hankalazanareo ny fanompoam-pivavahana amin’ny anaran’ny fiangonan’i Israely? 10Navelany hanakaiky Azy ianareo, ry Kôra sy ny Levita rehetra rahalahinao, dia mbola mitady ny raharahan’ny mpisorona indray ve? 11Izany ange ka ikomianao sy ny namanao rehetra amin’ny TOMPO, fa tsy dia amin’i Aharôna loatra akory no imonomononanareo.
12Dia nampiantsoin’i Mosesy i Datàna sy i Abirama zanakalahin’i Eliaba, fa hoy ireo hoe:
–Tsy hiakatra any izahay! 13Tsy ampy anao ve ny namoahanao anay nandao tany tondra-dronono sy tantely#16.13 Ampit Eks 3.8 sy nta. –Eto ny mpanohitra an’i Mosesy dia mampiasa izany fitenenana izany mba hilazana an’i Ejipta, kanefa ny tany nampanantenaina no mazàna ambarany. mba hahafaty anay atỳ an-taniefitra, no mbola mitady hibaiko anay indray ianao! 14Tsy tany tondra-dronono sy tantely akory no nitondranao anay ary tsy saha na tanimboaloboka akory koa no nomenao ho fanananay! Heverinao ho poa-maso angaha ireo olona ireo? Tsia, tsy ho any izahay!
15Tezitra aoka izany i Mosesy ka niteny tamin’ny TOMPO hoe:
–Aza raharahainao akory izay fanatitr’izy ireo! Fa tsy mba naka na dia boriky iray taminy akory aza aho, ary koa tsy mba nanisy ratsy na dia ny anankiray taminy akory aza.
Ny famaizana an’i Kôra sy ireo namany
16Dia hoy i Mosesy tamin’i Kôra:
–Tongava eo anatrehan’ny TOMPO ianao sy ny namanao rahampitso miaraka amin’i Aharôna. 17Samia maka ny fitaovana fandoroany zava-manitra ka manisy vovo-javamanitra ao anatiny ary samia mitondra ny azy avy eo anatrehan’ny TOMPO; dia fitaovana fandoroana zava-manitra 250 izany no fitambarany. Hitondra ny azy avy koa ianao sy i Aharôna.
18Samy naka ny fitaovana fandoroany zava-manitra izy rehetra ka nanisy vainafo sy nandraraka vovo-javamanitra tao anatiny; ary nijanona teo am-baravaran’ny Tranolay fihaonana izy ireo niaraka tamin’i Mosesy sy i Aharôna. 19Novorin’i Kôra ny fiangonana manontolo hankeo am-baravaran’ny Tranolay fihaonana mba hanohitra azy roa lahy.
Dia niseho tamin’ny fiangonana manontolo ny voninahitry ny TOMPO; 20ary ny TOMPO niteny tamin’i Mosesy sy i Aharôna hoe:
21–Mialà ianareo amin’ireo andian’olona ireo fa handringana azy indray mipi-maso Aho.
22Dia niankohoka tamin’ny tany i Mosesy sy i Aharôna sady nanao hoe:
–Ry Andriamanitra ô, Andriamanitra loharanom-piainan’ny voaary rehetra Ianao, ka hotezeranao ve ny fiangonana manontolo noho ny olona iray nanota?
23Dia namaly an’i Mosesy ny TOMPO ka nanao hoe:
24–Lazao ny fiangonana mba hanalavitra ny fonenan’i Kôra sy i Datàna ary i Abirama.
25Dia nitsangana i Mosesy ka nankeo amin’i Datàna sy i Abirama sady narahin’ny loholon’i Israely. 26Niteny tamin’ny fiangonana izy nanao hoe:
–Halaviro ny lain’ireo ratsy fanahy ireo, ary aza mikasika izay azy akory, fandrao maty noho ny fahotany rehetra koa ianareo.
27Nanalavitra ny manodidina ny fonenan’i Kôra sy i Datàna ary i Abirama ny vahoaka.
Dia nivoaka ny lainy i Datàna sy i Abirama ka nijoro teo am-baravarana niaraka tamin’ny vady aman-janany rehetra. 28Ary hoy i Mosesy hoe:
–Izao no hahafantaranareo fa ny TOMPO no naniraka ahy hanatanteraka ireny asa ireny fa tsy saim-pantatro no nanaovako izany. 29Raha fahafatesana tsotra no hahafaty ireo olona ireo, ka izay hanjo ny besinimaro ihany no hihatra aminy, dia tsy ny TOMPO no naniraka ahy. 30Fa raha manao zavatra tsy mbola fahita kosa ny TOMPO, ka hampisokatra ny tany hitelina azy ireo mbamin’ny fananany rehetra ary izy ireo hidina velona any amin’ny fonenan’ny maty, dia ho fantatrareo fa efa nandà ny TOMPO ireo olona ireo.
31Raha vao tapitra voalazan’i Mosesy avokoa izany teny rehetra izany, dia nivava ny tany nohitsahin’i Datàna sy i Abirama. 32Nisokatra ny tany ka nitelina azy ireo mbamin’ny fianakaviany ary koa nitelina an’i Kôra sy ny olony rehetra mbamin’ny fananany rehetra. 33Nidina velona tany amin’ny fonenan’ny maty izy ireo mbamin’izay azy rehetra, ary dia nandrakotra azy ny tany. Tsy hita intsony teo amin’ny fiangonana izy ireo. 34Ny Israelita rehetra izay nanodidina azy, dia nandositra raha nandre ny fidradradradràny, satria natahotra fandrao hatelin’ny tany eo koa. 35Ary nisy afo nalefan’ny TOMPO izay nandoro velona ireo lehilahy 250 nanatitra vovo-javamanitra.
Voafantina amin'izao fotoana izao:
Nomerỳ 16: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.