Nehemià 6
6
1Ren’i Sanebalato sy i Tôbià ary i Gesema ilay Arabo mbamin’ny namany fahavalonay fa tafatsangako indray ny manda ka tsy misy banga intsony. Kanefa tamin’io fotoana io dia tsy mbola voalatsako ny lela-vavahady. 2Koa nandefa iraka hankatỳ amiko i Sanebalato sy i Gesema hilaza hoe:
–Tongava mba hihaona ao Kefirîma#6.2 Kefirîma: tanàna tsy fantatra ny misy azy; Onao; tanàna akaikin’ny Ranomasina Mediteranea, eo anelanelan’i Lôda sy i Jafao. amin’ny tany lemak’i Onao isika!
Kanjo nikasa hanisy ratsy ahy izy roa lahy. 3Dia nandefa iraka hankany aminy kosa aho hanao hoe:
–Asa lehibe no ataoko ka tsy afa-midina aho; raha ilaozako midina any aminareo manko ny asa, dia hiato.
4Mbola nandefa iraka tamiko inefatra miantoana araka izany ihany izy roa lahy; saingy izany ihany koa no navaliko azy hatrany. 5Dia nirahin’i Sanebalato fanindiminy hankatỳ amiko ny mpanompony, nitondra taratasy nivelatra teny an-tanany 6ka izao no voasoratra tao: «Efa mahoraka any amin’ny firenena maro sady lazain’i Gesema koa fa hoe mikasa hikomy ianao sy ny Jiosy; ka izany no anangananao ny manda. Ary, araka izany siosio miely izany, dia maniry ho mpanjakanay ianao. 7Efa nanendry mpaminany mihitsy aza ianao mba hanambara ao Jerosalema fa ianao no mpanjakan’i Joda. Ankehitriny dia ho ren’ny amperôra izany raharaha izany; koa avia isika hiara-mikaon-doha.» 8Dia nandefa iraka ho any amin’i Sanebalato aho hanao hoe:
–Tsy marina izany zavatra lazainao izany fa noforoninao fotsiny.
9Ny hampatahotra anay manko no kendren’izy rehetra, satria heveriny fa ho kivy amin’ny asa izahay ka tsy hahatontosa.
«Koa ankehitriny herezo aho, Andriamanitra ô!»
10Indray andro aho dia nankao an-tranon’i Semahià zanakalahin’i Delatà sy zafin’i Mehetabeela, satria nisy sampona tsy nahatongavany tany amiko. Ka hoy izy hoe:
–Ao an-tranon’Andriamanitra, ao anatin’ny Toeramasina, no ndeha isika hihaona; ary aoka hohidintsika ny varavarana fa ho avy hamono anao ireo mpanohitra anao; eny, ho avy alina hamono anao izy.
11Fa novaliako hoe:
–Lehilahy toa ahy izao tsy tokony handositra. Ary olona tahaka ahy ve no hiditra ao amin’ny Toeramasina ka ho velona#6.11 Ary olona... velona: Tsy mpisorona i Nehemià ka tsy mahazo miditra ao amin’ny Toeramasina (jereo Nom 18.7). –Ary olona... velona: dkt hafa Ary iza no olona tahaka ahy hiditra ao amin’ny Toeramasina mba hamonjy ny ainy?? Tsia, tsy hiditra ao aho! 12Hitako manko fa tsy Andriamanitra no naniraka an’i Semahià, fa hamitahana ahy no nilazany tamiko izany hafatra izany, satria voakaraman’i Tôbià sy i Sanebalato izy. 13Ny nanakaramany azy dia mba hampitahotra ahy hanarahako ny toroheviny sy hanotako, ka hahazoany miteny ratsy ahy sy manala baràka ahy.
14«Ry Andriamanitra ô, tsarovy i Tôbià sy i Sanebalato araka izany asany izany, ary tsarovy koa i Nôhadià mpaminanivavy sy ireo mpaminany hafa izay nitady hampitahotra ahy.»
15Ny andro faha-25, tamin’ny volana Elola#6.15 Elola: volana fahenina amin’ny taona manomboka lohataona, izany hoe aogositra-septambra., no nahavitana ny manda, izany hoe 52 andro niasana. 16Rehefa ren’ny fahavalonay tamin’ny firenena manodidina rehetra izany, dia raiki-tahotra ry zareo sady nahatsapa ny maha tsinontsinona azy. Ary niaiky ireo fahavalonay fa ilay Andriamanitray no nahavitana izany asa izany.
17Tamin’izay ny loholona jiosy dia nampitondra taratasy maro ho any amin’i Tôbià; ary ny taratasy avy tamin’i Tôbià kosa tonga atỳ amin’ireo loholona ireo. 18Betsaka manko ny Jiosy efa nianiana niray tetika taminy, noho izy vinanton’i Sekanià zanakalahin’i Ara; ary i Jôhanàna zanakalahin’i Tôbià koa efa nanambady ny zanakavavin’i Mesolama zanakalahin’i Berekià. 19Nanao tsara laza an’i Tôbià teo anatrehako ry zareo sady nitatitra ny teniko tany aminy; i Tôbià kosa nampitondra taratasy hampitahotra ahy.
Voafantina amin'izao fotoana izao:
Nehemià 6: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.