Marka 8:1-21

Tamin’izany andro izany, dia vahoaka be indray no teo amin’i Jesoa ary tsy nanan-kohanina; ka nantsoin’i Jesoa ny mpianany ary nilazany hoe: –Mahonena Ahy ireto vahoaka, satria efa telo andro izao no teto amiko, ka tsy manan-kohanina intsony; ary raha alefako mody tsy misakafo ireo, dia ho reraka eny an-dalana satria avy lavitra ny sasany. Dia hoy ny navalin’ny mpianatra Azy: –Aiza no hahitana mofo hahavoky an’ireo olona ireo atỳ an-taniefitra atỳ. Dia nanontany i Jesoa hoe: –Misy mofo firy any aminareo? Ka hoy ireo mpianany hoe: –Fito! Dia nasain’i Jesoa nipetraka tamin’ny tany ireto vahoaka. Ary noraisin’i Jesoa ny mofo fito; ka rehefa avy nisaotra an’Andriamanitra Izy, dia nanapaka ny mofo sy nanome azy ny mpianany harosony; ary dia naroson’ireo tamin’ny vahoaka. Nisy trondro vitsivitsy koa tao, ka rehefa avy nisaoran’i Jesoa an’Andriamanitra, dia nasainy naroso. Dia nihinana ny olona ka voky; ary nangonina ny tapa-mofo aman-trondro ambiny, ka nisy fito harona. Tokony ho efatra arivo anefa ny vatan-dehilahy teo. Dia nalefan’i Jesoa hody ny olona rehetra; ary raha vao vita izany, dia niondrana an-tsambokely Izy mbamin’ny mpianany ary lasa nankany amin’ny faritany atao hoe Dalmanotà. Dia tonga ny Farisianina hiady hevitra amin’i Jesoa. Te hamandrika Azy ry zareo ka nangataka Azy hanao famantarana ho porofo fa avy amin’Andriamanitra ny fahefany. Dia nisento lalina i Jesoa ka niteny hoe: –Nahoana ny olona ankehitriny no mitady famantarana? Lazaiko marina aminareo fa tsy homena famantarana akory izy. Dia nandao azy ireo i Jesoa ary niondrana indray nankeny ampita. Ary hadinon’ny mpianatra ny nitondra mofo, ka tsy nisy afa-tsy mofo iray monja teo aminy tao an-tsambokely. Dia namepetra azy ireo i Jesoa nanao hoe: –Mbà malina ka mitandrema tsy ho voan’ny levioran’ny Farisianina sy ny levioran’i Herôda. Fa iretsy mpianany kosa niady hevitra nifampilaza hoe: –Noho isika tsy nitondra mofo angaha izany! Tsikaritr’i Jesoa izany ka hoy Izy taminy: –Nahoana ianareo no miady hevitra ny amin’ny tsy nitondranareo mofo? Mbola tsy takatrareo ary tsy fantatrareo foana ve? Fa dia mafy fo ve ianareo? Mana-maso ianareo ka no tsy mahita, ary manan-tsofina ka no tsy mandre? Tsy tsaroanareo angaha? Fony Aho nanapaka ireo mofo dimy haroso amin’ny vatan-dehilahy dimy arivo, sobika firy no voaangonareo feno ny tapa-mofo ambiny? Hoy ny navalin’ireo hoe: –Sobika 12. Dia hoy i Jesoa taminy: –Ary fony Aho nanapaka ireo mofo fito haroso amin’ny vatan-dehilahy efatra arivo, harona firy no voaangonareo feno ny tapa-mofo ambiny? Hoy ny navalin’ireo hoe: –Harona fito! Dia hoy i Jesoa taminy: –Mbola tsy fantatrareo foana ve?