Marka 3:1-21

Niditra tao amin’ny sinagôga indray i Jesoa ary nisy lehilahy maty tanana anila tao. Dia nizaha taratra an’i Jesoa ny olona raha hanasitrana an’io marary io amin’ny andro sabata Izy, mba hahazoany miampanga Azy. Fa hoy i Jesoa tamin’ilay lehilahy maty tanana: –Ndeha mijoro etsy afovoan’ny olona. Dia hoy i Jesoa tamin’ny olona nizaha taratra Azy: –Inona moa no azo atao amin’ny andro sabata, ny manao soa sa ny manao ratsy? ny mamonjy ain’olona sa ny mamono olona? Fa tsy nisy niteny ny olona. Dia tezitra i Jesoa nanopy maso manodidina nijery azy ireo, sady nalahelo tokoa noho ny hamafin’ny fony, ka niteny tamin-dralehilahy hoe: –Atsory ny tananao! Dia natsotran’ilay marary ny tanany ka sitrana. Fa lasa nivoaka ny sinagôga avy hatrany kosa ny Farisianina, ary niara-nioko tamin’ny Herôdianina ny amin’izay hamonoana an’i Jesoa. Dia lasa i Jesoa nihataka teny amoron’ny farihin’i Galilea niaraka tamin’ny mpianany. Vahoaka maro no nanaraka Azy avy ao Galilea; toy izany koa ny avy any Jodea sy avy any Jerosalema, avy any Idomea sy andafin’ny ony Jôrdàna, ary avy amin’ny faritra manodidina an’i Tiro sy i Sidôna. Samy nandre izay nataon’i Jesoa izy rehetra ka nanatona Azy. Ary dia hoy i Jesoa tamin’ny mpianany: –Anomany sambokely eto akaikiko Aho fandrao hifanosehan’ny vahoaka. Fa maro tokoa ny olona nositraniny, ka nifanesika mba hikasika Azy izay rehetra nanana aretina. Ary ireo fanahy maloto, isaky ny mahita an’i Jesoa, dia niankohoka teo anatrehany sady niantsoantso hoe: –Ianao no ilay Zanak’Andriamanitra! Fa i Jesoa niteny mafy azy ireo hoe: –Aza manao izay hahafantarana Ahy! Ary niakatra teo an-tendrombohitra i Jesoa, ka niantso izay tiany hantsoina; ary niala teo amin’ny vahoaka ireo ka nanatona Azy. Ary nanendry 12 lahy izay nomeny anarana hoe apôstôly Izy, mba hiaraka aminy sy hirahiny hitoriteny ka hanam-pahefana handroaka ny demony. Ireto no voatendriny ho isan’ny 12 lahy: i Simôna izay nampian’i Jesoa anarana hoe Petera; i Jakôba sy i Jôhany mirahalahy zanak’i Zebedeo ary nampian’i Jesoa anarana hoe Boanerjesy, izany hoe olona mahery setra tahaka ny varatra; i Andrea, i Filipo, i Bartôlômeo, i Matio, i Tômà, i Jakôba zanak’i Halfeo, i Tadeo, i Simôna Kananeanina, ary i Jodasy Iskariôta ilay nanolotra an’i Jesoa. Dia niverina tao an-trano i Jesoa; ary vory maro teo indray ny vahoaka, hany ka tsy afaka nisakafo Izy sy ny mpianany. Ren’ny fianakavian’i Jesoa izany ka niainga ireo mba haka Azy an-keriny satria hoe lasa adala Izy.