Lioka 6:1-11

Indray sabata, ry i Jesoa dia nandeha namaky tanimbary. Nioty salohim-bary ireto mpianany ary nikosoka tamin’ny tanany, dia nihinana. Fa hoy kosa ny Farisianina sasany hoe: –Nahoana ianareo no manao zavatra tsy fanao amin’ny andro sabata? Fa novalian’i Jesoa hoe: –Tsy novakînareo tao amin’ny Soratra Masina ve izay nataon’i Davida, raha noana izy mbamin’ireo olona niaraka taminy? Niditra tao an-tranon’Andriamanitra izy ka ny mofo apetraka eo anatrehan’Andriamanitra no nakany hohanina, ary dia nomeny koa ireo olona niaraka taminy; kanefa izany mofo izany, tsy azon’iza na iza hanina afa-tsy ny mpisorona irery ihany. Ary hoy koa i Jesoa tamin’ny Farisianina: –Ananan’ny Zanak’olona fahefana ny sabata! Indray sabata hafa koa, dia niditra tao amin’ny sinagôga i Jesoa ka nampianatra. Nisy lehilahy maty tanana ankavanana tao; ary nizaha taratra an’i Jesoa ireo mpahay lalàna sy Farisianina raha hanasitrana amin’ny andro sabata Izy mba hahitany antony hiampangana Azy. Fantatr’i Jesoa anefa ny eritreriny, ka hoy Izy tamin-dralehilahy maty tanana: –Mitsangàna ka ndeha mijoro etsy afovoan’ny olona. Dia nitsangana ilay marary ka nijoro. Ary niteny tamin’ny mpahay lalàna sy ny Farisianina i Jesoa hoe: –Manontany anareo Aho: inona moa no azo atao amin’ny andro sabata, ny manao soa sa ny manao ratsy? ny mamonjy ain’olona sa ny manala ain’olona? Dia nanopy maso manodidina nijery azy rehetra i Jesoa ka niteny tamin-dralehilahy hoe: –Atsory ny tananao. Dia natsotran’ilay marary ny tanany ka sitrana. Fa romotry ny hatezerana kosa ireo mpahay lalàna sy Farisianina ka niara-nioko ny amin’izay hanaovany an’i Jesoa.