Lioka 3

Mitoriteny i Jôhany Mpanao batisa ary atao am-ponja

(Jereo Mt 3.1-12; Mk 10.1-8; Jôh 1.19-28)

1Tamin’ny taona faha-15 nanjakan’ny amperôra Tibèry#3.1 I Tibèry dia nandimby ny amperôra Aogosta tao Rôma (jereo 2.1 sy nta); taona 14–37 taor J.K. no naha-amperôra an’i Tibèry. Faramparan’ny taona 27 taor J.K. no nifanandrify amin’ny vaninandro tondroin’i Lioka eo. –fony i Pônty Pilato no nifehy an’i Jodea, i Herôda no nanjaka tao Galilea, i Filipo rahalahiny no nanjaka tao Itorea sy Trakônitida, i Lisania no nanjaka tao Abilèna, 2ary i Hàna#3.2 I Hàna dia mpisorombe nesorina tamin’ny asany teo amin’ny taona 15 taor J.K.; mbola nanampatra ny fahefàny ihany anefa izy, na tamin’ny andron’ilay mpisorombe dimbiny aza, dia i Kaiàfa vinantolahiny (jereo Jôh 18.13; Asa 4.6). mbamin’i Kaiàfa no mpisorombe – dia tonga tamin’i Jôhany zanakalahin’i Zakarià tany an-taniefitra ny tenin’Andriamanitra. 3Dia lasa i Jôhany nitety ny faritany manontolo amoron’ny ony Jôrdàna sady nanao antso avo hoe:

–Ialao ny toe-dratsy#3.3 Ialao ny toe-dratsy: jereo ny FTS amin’ny voambolana hoe FIBEBAHANA., meteza hatao batisa, dia havelan’Andriamanitra ny helokareo.

4Izany dia araka ny voalazan’ny Soratra Masina ao amin’ny boky mirakitra ny tenin’i Isaià mpaminany hoe:

«Injany misy feon’olona miantso mafy any an-taniefitra hoe:

Amboary ny lalan’ny Tompo;

ahitsio ny hizorany.

5Ny lohasaha rehetra hototofana;

ary ny tendrombohitra sy ny havoana rehetra haetry.

Ny miolakolaka hahitsy

ary ny mikitoantoana harenina:

6dia ho hitan’ny olombelona rehetra ny famonjena avy

amin’Andriamanitra#3.6 Is 40.3-5, voatsiahy araka ny dkt grika tranainy Septoazinta.!»

7Toy izao àry no tenin’i Jôhany tamin’ny vahoaka nidodododo hataony batisa:

–Ry tarana-menarana, iza no nanoro hevitra anareo mba tsy ho tratry ny fahatezeran’Andriamanitra izay efa antomotra? 8Asehoy amin’ny fitondrantena mendrika fa nialanareo tokoa ny toe-dratsinareo. Ary aza manao anakampo hoe: «Manana an’i Abrahama ho razambenay izahay#3.8 Ampit Jôh 8.33,37,39.!» Satria lazaiko aminareo fa hain’Andriamanitra ny manangana zanaka ho an’i Abrahama avy amin’ireto vato ireto. 9Indro efa eo am-poto-kazo rahateo ny famaky: koa ny hazo rehetra tsy mamoa voa tsara, dia hokapaina ka hatsipy any anaty afo.

10Ary hoy ny vahoaka nanontany an’i Jôhany hoe:

–Inona àry no tokony hataonay?

11Dia novaliany hoe:

–Izay manana akanjo roa, aoka hizara amin’izay tsy manana; ary izay manan-kohanina, aoka hanao toy izany koa.

12Mba nisy koa mpamory hetra tonga hatao batisa ka niteny tamin’i Jôhany hoe:

–Mpampianatra ô, inona no tokony hataonay?

13Dia novaliany hoe:

–Aza mitaky mihoatra noho izay voafetra halainareo.

14Nisy ihany koa miaramila nanontany azy hoe:

–Mba inona kosa no tokony hataonay?

Dia hoy izy taminy:

–Aza maka zavatr’olona an-keriny na am-pitaka, fa aoka ianareo ho afa-po amin’ny karamanareo.

15Velom-panantenana tokoa ny vahoaka ary samy nieritreritra tao am-pony hoe: «I Jôhany va re sa tsia no Mesia?» 16Fa i Jôhany kosa niteny tamin’izy rehetra hoe:

–Ny ahy, rano no anaovako batisa anareo. Indro tamy kosa ilay Mahery noho izaho, ary tsy mendrika hamaha ny fehikapany akory aho; ny Azy, ao amin’ny Fanahy Masina sy afo no hanaovany batisa anareo. 17Eny an-tanany ny fikororohana#3.17 fikororohana: jereo Mt 3.12 sy nta. hanadiovany tanteraka ny vary eo am-pamoloana: ka ny vary moa hangoniny an-tsompitra, fa ny mololo hodorany amin’ny afo tsy mitsaha-mirehitra.

18Fananarana maro samihafa koa no nanambaràn’i Jôhany ny Vaovao Mahafaly tamin’ny olona.

19Notsinîn’i Jôhany hatrany kosa i Herôda mpanjaka noho izy naka an’i Herôdiada vadin-drahalahiny ary noho ny ratsy hafa rehetra vitan’ity mpanjaka. 20Kanjo vao mainka nanampy heloka indray i Herôda, fa nanidy an’i Jôhany tao am-ponja.

Atao batisa miaraka amin’ny vahoaka i Jesoa

(Jereo Mt 3.13-17; Mk 1.9-11)

21Indray andro, raha mbola natao batisa ny vahoaka rehetra, dia mba natao batisa koa i Jesoa. Ary nivavaka Izy nandritra izany, ka nisokatra ny lanitra. 22Dia nidina teo ambonin’i Jesoa ny Fanahy Masina, niendri-batana toa voromahailala; sady nisy feo avy tany an-danitra nanao hoe:

–Ianao no Zanako, ilay Malalako; Ianao no sitrako#3.22 Ampit Sal 2.7; Is 42.1.!

Taranak’i Abrahama sy taranak’i Adama i Jesoa

(Jereo Mt 1.1-17)

23Tokony ho telopolo taona i Jesoa fony nanomboka ny asany, ka noheverin’ny olona fa zanak’i Jôsefa, zafin’i Helỳ, 24zafiafin’i Matatà, zafin-dohalik’i Levỳ, zafin-kitrokelin’i Melkỳ, zafim-paladian’i Janày, ary zafin-dorian’i Jôsefa; 25dia i Jôsefa zanakalahin’i Matatîa, zafin’i Amôsa, zafiafin’i Nahoma, zafin-dohalik’i Jeslỳ, zafin-kitrokelin’i Nagày, 26zafim-paladian’i Mahàta, ary zafin-dorian’i Matatîa; dia i Matatià zanakalahin’i Semehỳ, zafin’i Jôsèka, zafiafin’i Jôdà, 27zafin-dohalik’i Jôhanàna, zafin-kitrokelin’i Resà, zafim-paladian’i Zerobabèla ary zafin-dorian’i Sealtièla; dia i Sealtièla zanakalahin’i Nerỳ, 28zafin’i Melkỳ, zafiafin’i Adỳ, zafin-dohalik’i Kôsàma, zafin-kitrokelin’i Elmadàma, zafim-paladian’i Era, 29ary zafin-dorian’i Josoa; dia i Josoa zanakalahin’i Eliezèra, zafin’i Jorîma, zafiafin’i Matàta, zafin-dohalik’i Levỳ, 30zafin-kitrokelin’i Simehôna, zafim-paladian’i Jodà, ary zafin-dorian’i Jôsefa; dia i Jôsefa zanakalahin’i Jônàma, zafin’i Eliakîma, 31zafiafin’i Meleà, zafin-dohalik’i Menà, zafin-kitrokelin’i Matatà, zafim-paladian’i Natàna, ary zafin-dorian’i Davida; 32dia i Davida zanakalahin’i Jisay, zafin’i Ôbeda, zafiafin’i Bôhaza, zafin-dohalik’i Salà, zafin-kitrokelin’i Nahasôna, 33zafim-paladian’i Haminadàba, ary zafin-dorian’i Admîna, dia i Admîna zanakalahin’i Arama, zafin’i Arnỳ, zafiafin’i Hesrôna, zafin-dohalik’i Peretsa, zafin-kitrokelin’i Jodà, 34zafim-paladian’i Jakôba, ary zafin-dorian’i Itsehàka; dia i Itsehàka zanakalahin’i Abrahama, zafin’i Terà, zafiafin’i Nahôra, 35zafin-dohalik’i Seròga, zafin-kitrokelin’i Rehò, zafim-paladian’i Falèga ary zafin-dorian’i Ebèra; dia i Ebèra zanakalahin’i Salà, 36zafin’i Kainàma, zafiafin’i Arfaksàda, zafin-dohalik’i Sema, zafin-kitrokelin’i Noà, zafim-paladian’i Lamèka, 37ary zafin-dorian’i Metosalà; dia i Metosalà zanakalahin’i Henôka, zafin’i Jarèda, zafiafin’i Malaleèla, zafin-dohalik’i Kainàma, 38zafin-kitrokelin’i Enôsa, zafim-paladian’i Sèta ary zafin-dorian’i Adama, dia i Adama zanak’Andriamanitra.

Voafantina amin'izao fotoana izao:

Lioka 3: DIEM

Asongadina

Hizara

Dika mitovy