Levitîka 25
25
Ny taona fialan-tsasatra ho an’ny tany volena
1Teo an-tendrombohitra Sinay, dia niteny tamin’i Mosesy ny TOMPO 2mba hamepetra ny Israelita hoe:
«Rehefa tafiditra ny tany izay omeko anareo ianareo, dia aoka ny tany volena homenareo fialàn-tsasatra mitsingerina mba ho mari-panajàna Ahy TOMPO. 3Enin-taona no hamafazanareo ny tanimbarinareo sy handrantsananareo ny voalobokareo ka hanangonanareo vokatra. 4Fa ny taona fahafito kosa dia fialan-tsasatra tanteraka no homenareo ny tany volenareo mba ho mari-panajana AHY: aza amafazana ny tanimbarinareo, ary aza rantsanana ny voalobokareo; 5tsy hojinjanareo akory aza izay vokatry ny voa nihintsana tamin’ny fararano lasa, ary tsy hotoazanareo akory ny sampaho vokatry ny voaloboka tsy norantsananareo, fa aoka ho taona fialàn-tsasatra ho an’ny tany volena izany. 6Izay zava-maniry voajanahary, mandritra ny fialàn-tsasatry ny tany volena, dia azo hanina ho anareo sy ny mpanomponareo mbamin’ny mpikarama sy vahiny tafaraka aminareo; 7ny biby fiompianareo sy ny bibidia izay eo amin’ny taninareo koa aza, dia ny zavatra rehetra voajanahary vokatry ny tany no hohaniny#25.7 And 1-7: jereo Eks 23.10-11..
Ny taona Jobily, taom-panafahana
8«Hanisa fito taona mitsingerina impito ianareo, izany fito taona impito, ka 49 taona no halàvan’izany. 9Ny andro fahafolon’ny volana fahafito, andro fankalazana ny Famelàn-keloka, dia hitsoka anjomara ombàm-pihobiana ianareo ka manerana ny taninareo no hitsofanareo azy. 10Izany no hanambarànareo fa voatokana ho Ahy ny taona fahadimampolo sy hiantsoanareo fanafahana ho an’ny mponina rehetra ao amin’ilay tany. Jobily ho anareo io taona io, ka samia mody amin’ny taninareo sy amin’ny fianakavianareo avy ianareo. 11Jobily ho anareo io taona fahadimampolo io; ka tsy hanao famafazam-bary ianareo, tsy hojinjanareo ny vokatry ny voa nihintsana tamin’ny fararano lasa, ary tsy hotoazanareo ny sampaho vokatry ny voaloboka tsy norantsananareo. 12Eny, Jobily tokoa io taona io ka hatokanareo ho Ahy. Kanefa izay zavatra voajanahary vokatry ny saha dia azonareo hanina.
13«Amin’io taona Jobily io, dia samy hody amin’ny taninareo avy ianareo. 14Rehefa mivarotra na mividy tany amin’ny namanareo ianareo, dia aza misy mamono antoka azy. 15Araka ny isan’ny taona, manomboka tamin’ny Jobily lasa, na koa araka ny isan’ny taom-pahavokarana ho avy no hividiananareo sy hivarotanareo azy amin’ny namanareo. 16Araka ny hamaro na havitsin’ny taona sisa no hampitomboana na hampihenana ny vidiny, satria araka ny isan’ny taom-pahavokarana no hivarotana azy. 17Koa aza misy mamono antoka ny mpiray firenena ianareo; izany no hanehoanareo fanajana Ahy satria Izaho no TOMPO Andriamanitrareo. 18Tanteraho ny didiko ary imasoy hotanterahinareo ny fitsipiko, dia handry feizay ao amin’ilay tany ianareo. 19Ary hahavoka-javatra ny tany, dia hihinana sady ho afa-po ianareo, ka handry feizay eo.
20«Angamba ianareo hanontany anakampo hoe: ‹Inona no hohaninay amin’ny taona fahafito, rehefa tsy manao famafazam-bary na fanangonam-bokatra izahay?› 21Izaho Tompo no hampidina aminareo ny fitahiako amin’ny taona fahenina ka hisy vokatra ampy telo taona ho anareo. 22Amin’ny taona fahavalo#25.22 Amin’ny taona fahavalo: izany hoe rehefa mety ho taona manaraka ny taona ahazoan’ny tany fialàn-tsasatra (jereo and 2-4)., dia hanao famafazam-bary ianareo kanefa mbola hihinana ny vokatra voaangona taloha; hatrany amin’ny taona fahasivy, mandra-pahatongan’ny fiakaram-bokatra, dia mbola afaka hihinana izany vokatra voaangona taloha izany ihany ianareo.
Ny zo hanavotra ny tany namidy
23«Ny tany dia tsy azo atao varo-maty, satria Ahy Tompo izany; fa vahiny sy mpivahiny eo amin’ny taniko ianareo. 24Noho izany, eran’ny tany izay holovanareo, dia havelanareo ho azo avotana ny tany namidy.
25«Raha tàhiny misy mihamahantra ny mpiray firenena aminao ka mivarotra ampahany amin’ny taniny, dia ho avy ny havany akaiky ka hanavotra izay tany amidiny. 26Raha tsy manan-kavana hanavotra ralehilahy, nefa hambinina izy atỳ aoriana ka hahazo izay ampy hoenti-manavotra ny taniny, 27dia izao no hataony: hanisa taona manomboka hatreo amin’ny nivarotany azy izy, ka ny an-kevitry ny taona sisa mandra-piavin’ny taona Jobily no haloany vola amin’ilay nivarotany azy; dia hody amin’ny fananany indray ralehilahy tompony. 28Fa raha tsy nahazo izay ampy handoavana izany izy, dia hitoetra eo an-tanan’ilay nivily azy ny tany mandra-pahatongan’ny taona Jobily. Io tany io, amin’ny taona Jobily, dia ho afaka teo an-tanan’ilay nividy azy; ka hody amin’ny fananany indray ralehilahy tompony.
29«Raha misy mivarotra trano itoerana ao anaty tanàna mimanda, dia azony avotana izany mandra-pahatapitry ny herintaona nivarotany azy; fa ao anatin’io fe-potoana io no hahazoany manavotra azy. 30Fa raha tsy voaavotra mandra-pahatapitry ny herintaona kosa ilay trano, dia tapaka ho varo-maty ho an’ilay nividy azy sy ho an’ny taranany; na amin’ny taona Jobily aza, dia tsy ho afaka teo an-tanan’ilay nividy azy izany trano izany. 31Fa ny trano, ao anaty tanàna tsy misy manda manodidina kosa, dia hatao tahaka ny tany ihany: ho azo avotana izany na koa ho afaka teo an-tanan’ilay nividy azy amin’ny taona Jobily.
32«Momba ny tanànan’ny levita kosa dia izao: ny trano, izay anjarany eo an-tanàna, dia ho azon’ny levita avotana hatrany hatrany#25.32 tanànan’ny levita: jereo Nom 35.1-8; Jos 21.1-42; 1 Tan 6.39-66. Nanana zara tany avokoa ny foko israelita rehetra, afa-tsy ny fokon’i Levỳ; jereo Jos 14.4. –Manjavozavo ny rijan-teny hebreo, eto amin’ny and 32.33, ka tsy azo antoka ny dkt.. 33Na levita aza no mividy azy, dia ho afaka teo an-tanan’ilay nividy azy izany, amin’ny taona Jobily. Ny trano ao an-tanànan’ny levita manko no mba fananan’ny levita eo afovoan’ny Israelita. 34Fa ny saha manodidina ny tanànany kosa dia tsy azo amidy, satria fananana raikitra hatrany izany ho an’ny levita.
Ny fampisamboran-javatra amin’ny mahantra
35«Raha misy mihamahantra ny mpiray firenena aminareo, na ny vahiny valovotaka aza, ka tsy afa-manefa ny trosanareo, dia ampio izy mba hahazoany mivelona eo anilanareo#25.35 Jereo Deot 15.7-8.. 36Aza maka zana-bola na tombony aminy; izany no hanehoanareo fanajana Ahy Andriamanitrareo sady hahazoany mivelona eo anilanareo. 37Aza asiana zana-bola raha mampisambotra vola aza ianareo, ary aza maka tombony raha mampisambotra hanina azy ianareo#25.37 And 36-37: jereo Eks 22.24; Deot 15.7-11; 23.20-21.. 38Izaho no TOMPO Andriamanitrareo, Ilay namoaka anareo hiala tany Ejipta mba hanome anareo ny tany Kanahàna sady ho Andriamanitrareo.
Ny zo hanavotra olona
39«Raha misy mihamahantra ny mpiray firenena aminareo ka mitolo-tena ho mpanomponareo, dia aza ampanaovina asan’andevo izy 40fa ataovy toy ny mpikarama na vahiny valovotaka; ary mandra-pahatongan’ny taona Jobily no hanompoany anareo. 41Amin’izay, dia ho afaka teo an-tananareo izy mbamin’ny zanany ka hody any amin’ny fianakaviany sy hizaka indray ny fananany. 42Fa mpanompoko ny Israelita izay navoakako hiala tany Ejipta, ka tsy tokony hamidy tahaka ny andevo. 43Aza itratrevatrevana sy ampahoriana izy, fa izany no hanehoanareo fanajana Ahy Andriamanitrareo.
44«Ny amin’izay ho andevolahinareo na andevovavinareo, dia amin’ny firenena manodidina anareo no hividiananareo azy. 45Azonareo ividianana koa amin’ny zanak’ireo vahiny valovotaka eo anivonareo sy amin’ny taranaka haterany eo amin’ny taninareo; ary dia ho fanananareo ireny. 46Hataonareo lovan’ny zanakareo mandimby anareo ireny, mba hozakainy ho fananany. Ho mpanomponareo hatrany hatrany ireny; fa ny Israelita mpiray firenena aminareo kosa dia tsy azonareo itratrevatrevana sy ampahoriana#25.46 And 39-46: jereo Eks 21.2-6; Deot 15.12-18..
47«Raha misy tonga manankarena ny vahiny valovotaka eo anivonareo, fa ny mpiray firenena aminareo kosa misy mihamahantra ka mivarotra ny tenany ho mpanompon’ilay vahiny na ho mpanompon’olona taranak’ilay vahiny, 48dia azo avotana izy na efa lasa mpanompo aza. Ny anankiray amin’ireo rahalahiny no mahavotra azy, 49na ny rahalahin-drainy, na ny zana-drahalahin-drainy, na ny anankiray amin’ireo havany akaiky; mahazo miavo-tena koa izy, raha tàhiny manana ny ampy ho an’izany. 50Rehefa havotana izy, dia hanisa taona miaraka amin’ilay tompony, manomboka eo amin’ny taona nahampanompo azy ka miafara amin’ny taona Jobily; araka izay isan’ny taona no hanamboarana ny vola nividianana azy, ary araka izay fanao amin’ny mpikarama isan’andro no hanombanana ny asa vitany. 51Raha mbola maro ny taona sisa mandra-pahatongan’ny taona Jobily, dia ara-keviny amin’ilay vola nividianana azy no fanavotana haloa. 52Raha vitsy kosa ny taona sisa, dia hoisaina izany ka ara-kevitr’ireo taona ireo no fanavotana haloa. 53Tahaka ny mpikarama isan-taona izy mandritra ny itoerany eo amin’ilay tompony; ka harahinareo maso ilay tompony mba tsy hanao toetra mitratrevatreva aminy sy mampahory azy. 54Raha tsy misy hanavotana an’ilay mpiray firenena aminareo, dia ho afaka teo an-tanan’ny tompony izy mbamin’ny zanany amin’ny taona Jobily.
Izaho no Tompo Andriamanitrareo
55«Eny, mpanompoko ny Israelita, dia mpanompoko navoakako hiala tany Ejipta. Izaho no TOMPO Andriamanitrareo.
Voafantina amin'izao fotoana izao:
Levitîka 25: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.