Levitîka 23
23
Ireo fankalazana fanaon’ny Israelita: Ny Sabata
1Dia niteny tamin’i Mosesy ny TOMPO 2mba hamepetra ny Israelita hoe:
«Ny fankalazana manetriketrika naraikitro dia hisy fanompoam-pivavahana hivorianareo; ka ireto avy ireo fankalazana manetriketrika naraikitro:
3«Andro enina no hanaovan-draharaha; fa ny fahafito dia sabata tena andro fitsaharana, ka hasiana fanompoam-pivavahana hivorianareo. Aza manao raharaha akory ianareo, fa sabata hanajana Ahy TOMPO izany, na aiza na aiza onenanareo#23.3 Jereo Gen 2.1-3; Eks 16.23-30; 20.8-11; 23.12; 31.12-17; 34.21; 35.2; Deot 5.12-14..
4«Ireto kosa no fankalazana manetriketrika hafa naraikitro ka hasiana fanompoam-pivavahana koa amin’ny fotoany avy:
Fetin’ny Paska sy fankalazana ny mofo tsy misy leviora
5«Ny volana voalohany, andro faha-14, rehefa hariva, dia fankalazana ny Paska hanajana Ahy TOMPO#23.5 Jereo Eks 12.1-147; Nom 28.16; Deot 16.1-2..
6«Io volana io ihany, andro faha-15, no anombohan’ny fetin’ny mofo tsy misy leviora hanajana AHY. Mandritra ny fito andro, dia mofo tsy misy leviora ihany no hohaninareo. 7Ny andro voalohany amin’ireo andro fito ireo, dia hisy fanompoam-pivavahana hivorianareo, ka aza manao ny raharaha andavanandro ianareo. 8Isan’andro mandritra ireo andro fito ireo, dia sorona levonina amin’ny afo no haterinareo ho AHY. Ary ny andro fahafito, dia hisy indray fanompoam-pivavahana hivorianareo, ka aza manao ny raharaha andavanandro ianareo#23.8 And 6-8: jereo Eks 12.15-20; 24.15; 34.18; Nom 28.17-25; Deot 16.3-8..»
Fetin’ny amboaram-bary voalohany
9Dia niteny tamin’i Mosesy ny TOMPO 10mba hamepetra ny Israelita hoe:
«Rehefa tafiditra any amin’ny tany izay omeko anareo ianareo ka hijinja ny vokatrareo any, dia mitondrà ilay amboara voalohany amin’ny vary ôrza hojinjainareo ho any amin’ny mpisorona#23.10 Ny fetin’ny amboaram-bary voalohany dia angamba mifandraika amin’izay voateny ao amin’ny Eks 23.19; 34.26 manao hoe: Ny voaloham-bokatry ny taninao dia hatolotrao ao an-tranoko. . 11Hahevahevany eo anatrehako no fomba fanolorana ilay amboara, mba hahazoanareo sitraka amiko; ka ny ampitson’ny sabata no hanevahevàny azy eo anatrehako. 12Iny andro hanoloranareo ny amboaram-bary iny, dia manatera zanakondrilahy tsy misy kilema sady iray taona ianareo mba ho sorona dorana manontolo ho Ahy TOMPO. 13Ny fanatitra vokatry ny tany hampombaina io sorona io kosa dia koba lafarinina tsara milanja enina kilao, voadity tamin’ny menaka, ka hatao fanatitra levonina amin’ny afo mba ho hanitra ankasitrahiko; ary ny fanatitra araraka dia divay iray litatra sy sasany. 14Alohan’izany andro hitondranareo ny amboaram-bary ho fanatitra ho Ahy Andriamanitrareo izany, dia aza mbola misy ihinanana ny mofo na lango na voambary avy amin’ny vokatra vao niakatra: ho fepetra raikitra hatrany hatrany izany ho anareo, na aiza na aiza honenanareo.
Ny fetin’ny Pentekôsta
15«Manisà fito herinandro ianareo, miantomboka amin’io ampitson’ny sabata io, izany hoe miantomboka amin’ilay andro nitondranareo ny amboaram-bary voalohany ho fanatitra hahevaheva eo anatrehako. Ho fito herinandro mipaka izany; 16ka amin’ny ampitson’ny sabata fahafito dia dimampolo andro no ho voaisanareo#23.16 Izany fanoritana ny dimampolo andro izany no nahatonga ilay anarana anankiray fiantsoana ity fety ity hoe Pentekôsta (fahadimampolo, amin’ny teny grika).. Amin’io andro io dia manolora fanatitra vaovao ho Ahy TOMPO indray ianareo; 17ka mitondrà, avy amin’ny fonenanareo, mofo roa ho fanatitra hahevaheva eo anatrehako. Ireo mofo ireo dia hatao amin’ny koba lafarinina tsara, milanja telo kilao, ka hasiana leviora no hanendasana azy: voaloham-bokatra natokana ho Ahy TOMPO izany. 18Miaraka amin’ireo mofo ireo, ny haterinareo koa dia zanakondrilahy fito tsy misy kilema samy iray taona, sy ombilahy iray ary ondrilahy roa mba hatao sorona dorana manontolo ho AHY; ho sorona levonina amin’ny afo ireo mba ho hanitra ankasitrahina ho AHY, sady hampombaina izany ny fanatitra vokatry ny tany sy ny fanatitra araraka. 19Hisy koa osilahy iray hataonareo sorona fanalana ny ota, ary zanakondrilahy roa samy iray taona hataonareo sorom-pihavanana. 20Hahevahevan’ny mpisorona eo anatrehako ireo zanakondrilahy roa ireo mbamin’ny mofo avy amin’ny voaloham-bokatra: dia zava-masina ho Ahy TOMPO izany ka ho anjaran’ny mpisorona. 21Amin’io andro io, dia hisy fanompoam-pivavahana hivorianareo, ka aza manao ny raharaha andavanandro ianareo: ho fepetra raikitra hatrany hatrany izany ho anareo, na aiza na aiza honenanareo#23.21 And Eks 23.16; 34.22; Nom 28.26; Deot 16.9-12..
22«Raha mijinja ny vokatry ny tanimbarinareo ianareo, dia aza jinjaina ny eny an-tsisiny; ary aza tsimponina ny salohim-bary natao hotsimponin’ny hafa amin’ny vokatrareo, fa avelao izany ho an’ny mahantra sy ny vahiny. Izaho no TOMPO Andriamanitrareo#23.22 Jereo 19.9-10; Deot 24.19-22..»
Ny andro fihobiana ny Tompo
23Dia niteny tamin’i Mosesy ny TOMPO 24mba hamepetra ny Israelita hoe:
«Ny andro voalohan’ny volana fahafito#23.24 Tamin’ny kalendary israelita fampiasa tany am-boalohany, dia manomboka fararano ny taona (tahaka ny fahita ao amin’ny kalendary jiosy ankehitriny izao indray). Teo amin’ny kalendary anombohan-taona faha-lohataona, dia mbola nitazona ny lanjany ihany ny andro voalohan’ny volana fahafito satria nifanandrify tamin’ny fisantarana ny taom-baovao araka ny kalendary tany amboalohany. dia ho andro fitsaharana ho anareo; hisy fanompoam-pivavahana hivorianareo amin’izany ka hihobianareo Ahy mba hahatsiarovako anareo. 25Aza manao ny raharaha andavanandro ianareo fa manolora sorona levonina amin’ny afo ho Ahy TOMPO#23.25 And 24-25: jereo Nom 29.1-6..»
Ny andro lehibe fankalazana ny Famelàn-keloka
26Dia niteny tamin’i Mosesy ny TOMPO nanao hoe:
27«Ny andro fahafolon’ny volana fahafito kosa dia andro fankalazana ny Famelàn-keloka#23.27 Jereo Lev 16.; hisy fanompoam-pivavahana hivorianareo amin’izany, ary hifady hanina ianareo sady hanatitra sorona levonina amin’ny afo ho Ahy TOMPO. 28Aza manao raharaha amin’io andro io, satria fankalazana ny Famelàn-keloka io, ka hanaovanareo eo anatrehako TOMPO Andriamanitrareo ny fombam-pivavahana famelan-keloka ho anareo. 29Fa ny olona rehetra, izay tsy mety mifady hanina amin’io andro io, dia hofongorana tsy ho anisan’ny vahoaka israelita. 30Ary ny olona rehetra, izay manao raharaha amin’io andro io, dia holevoniko tsy ho eo anivon’ny vahoaka israelita 31ka aza anaovan-draharaha io andro io: ho fepetra raikitra hatrany hatrany izany ho anareo, na aiza na aiza honenanareo. 32Ho tena fitsaharana ho anareo io andro io, ary hifadianareo hanina; miantomboka amin’ny harivan’ny andro fahasivin’ny volana ka miafara amin’ny ampitso hariva no hitandremanareo io fitsaharanareo io#23.32 And 27-32: jereo Lev 16; Nom 29.7-11..»
Ny fankalazana ny Tranotomboka
33Dia niteny tamin’i Mosesy ny TOMPO 34mba hamepetra ny Israelita hoe:
«Ny andro faha-15, amin’ny volana fahafito, no hiantombohan’ny fankalazana ny Tranotomboka#23.34 Jereo ny FTS amin’ny voambolana hoe FANISANANDRO., ho fanajana Ahy TOMPO mandritra ny fito andro. 35Ny andro voalohany, dia hisy fanompoam-pivavahana hivorianareo ka aza manao ny raharaha andavanandro ianareo. 36Isan’andro, mandritra ireo fito andro ireo, dia sorona levonina amin’ny afo no haterinareo ho AHY. Ny andro fahavalo dia hisy indray fanompoam-pivavahana hivorianareo ka mbola hanateranareo sorona levonina amin’ny afo koa ho AHY; andro lehibe famaranana ny fankalazana izany, ka aza anaovana ny raharaha andavanandro.
37«Ireo àry no fankalazana manetriketrika naraikitro, ka hasiana fanompoam-pivavahana hivorianareo sy hanateranareo sorona levonina amin’ny afo ho AHY, dia sorona dorana manontolo ombàn’ny fanatitra vokatry ny tany, na sorom-pihavanana ombàn’ny fanatitra araraka, samy amin’ny fotoanandrony avy. 38Ireo sorona ireo dia ankoatra ny zavatra fanolotrareo Ahy TOMPO: izany hoe ny sorona fanao amin’ny andro sabata sy ny fanomezana ary ny zavatra rehetra fanalàm-boady sy an-tsitrapo.
39«Ny andro faha-15, amin’ny volana fahafito, rehefa voaangonareo ny vokatry ny tany, dia hanao fankalazana ianareo, ho fanajana Ahy TOMPO mandritra ny fito andro; ka ny andro voalohany sy fahavalo dia ho andro fitsaharana. 40Hatreo amin’ny andro voalohany, dia haka izay voankazo tsara indrindra sy sampan-drofia ary rantsan’ny hazo mikirindro na rantsan’ny hazo malahelo eny amoron-drenirano ianareo, ka haneho hafaliana mandritra ny fito andro eo anatrehako TOMPO Andriamanitrareo. 41Eny, hankalazainareo isan-taona izany, mandritra ny fito andro amin’ny volana fahafito, ho fanajana AHY: ho lalàna raikitra hatrany hatrany izany ho anareo. 42Mandritra ny fito andro, dia Tranotomboka no hilasianareo Israelita teratany rehetra tsy an-kanavaka, 43mba hahafantaran’ny taranakareo fa tranotomboka no nampilasiako ny razany, fony Aho namoaka azy hiala tany Ejipta. Izaho no TOMPO Andriamanitrareo#23.43 And 34-43: jereo Eks 23.16; 34.22; Nom 29.12; Deot 16.13-15..»
44Toy izany no nameperan’i Mosesy ny Israelita ny amin’ireo fankalazana manetriketrika naraikitry ny TOMPO.
Voafantina amin'izao fotoana izao:
Levitîka 23: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.