Levitîka 11
11
FEPETRA NY AMIN’NY HOE MADIO SY MALOTO
Biby madio sy biby maloto
1Dia niteny tamin’i Mosesy sy i Aharôna ny TOMPO 2mba hamepetra ny Israelita hoe#11.2 Misy lisitra mitanisa biby tahaka izao any amin’ny Deot 14.3-20. Tsy azo antoka hifanaraka amin’ny tena izy ny anaram-biby sasantsasany.:
«Izao no ho fihinanareo amin’ny biby rehetra eto ambonin’ny tany: 3ny biby rehetra mivaky kitro sady mandinika. 4Kanefa ny biby mandinika fotsiny na mivaky kitro fotsiny tsy hohaninareo, fa maloto aminareo ireny, ohatra: ny rameva satria mandinika ihany izy nefa tsy mba mivaky kitro; 5ny hiràka#11.5 hiràka: biby mampinono ka mitovy amin’ny bitro ny halehibeny., satria mandinika ihany izy nefa tsy mba mivaky kitro; 6ny bitro, satria mandinika ihany izy nefa tsy mba mivaky kitro; 7ny kisoa, satria mivaky kitro ihany izy nefa tsy mba nandinika. 8Koa aza haninareo ny henany ary aza kasihinareo akory ny fatiny: maloto aminareo ireny.
9«Izao no ho fihinanareo amin’ny biby rehetra ao anaty rano, na farihy na ranomasina na renirano: ny biby rehetra misy vombony sy kirany. 10Ho fady aminareo kosa izay tsy misy vombony sy kirany amin’ny zavamananaina rehetra mihetsiketsika anaty rano: 11eny, ho fady aminareo ireny, ka aza haninareo ny henany ary fadio ny mikasika ny fatiny. 12Izay biby rehetra ao anaty rano, kanefa tsy misy vombony na kirany, dia ho fady aminareo.
13«Izao kosa no hofadînareo amin’ny vorona ka tsy hohaninareo: ny voromahery sy ankoay isan-karazany; 14ny fanindry sy papango isan-karazany; 15ny goaika isan-karazany; 16ny aostritsa, ny tararaka, ny vorondriaka, ny hitsikitsika isan-karazany, 17ny vorondolo, ny manarana, ny vorondolobe, 18ny gisabe, ny sama, ny arosy, 19ny vanobe, ny vano isan-karazany, ny takodara ary ny ramanavy.
20«Ny bibikely rehetra manana elatra sady mandia tongotra efatra dia ho fady aminareo. 21Amin’ireo bibikely ireo anefa, dia ho azonareo hanina ihany izay manampingotra ambony faladiany hitsipitsipihany eo amin’ny tany; 22ka ireto avy izany: ny valala fihinana, ny solama, ny hargôla ary ny hagaba samy isan-karazany avy#11.22 Ny voambolana hebreo etoana no avy hatrany dia nogasîna hitanisana ireo karazam-balala fihinana ireo.. 23Fa ny biby hafa manana elatra sady mandia tongotra efatra dia ho fady aminareo.
Biby sy zavatra mahaloto rehefa sendra voakasika
24«Ireto biby hotanisaina manaraka ireto koa dia hahaloto anareo. Na zovy na zovy mikasika ny fatin’ireo, dia haloto mandra-paharivan’ny andro; 25ary na zovy na zovy mitondra ny fatin’ireo, dia haloto koa mandra-paharivan’ny andro sady tsy mainty hanasa fitafiana. 26-28Ireto avy àry no ho biby maloto aminareo:
–ny biby rehetra tsy mba mivaky kitro ary ny biby rehetra tsy mba mandinika: na zovy na zovy mikasika azy, dia haloto.
–ny biby rehetra mandia tongotra efatra sady mandeha amin’ny faladiany#11.26 Ohatra, ny orsa.: na zovy na zovy mikasika ny fatin’ireo, dia haloto mandra-paharivan’ny andro; ary na zovy na zovy mitondra ny fatin’ireo, dia haloto koa mandra-paharivan’ny andro sady tsy maintsy hanasa fitafiana.
29«Amin’ny biby madinika mifanaretsaka ambonin’ny tany, dia ireto avy no ho maloto aminareo: ny kionkona, ny totozy, ny androngo isan-karazany 30toy ny sitry na antsiantsy na matahotrandro na mosaraina, ary ny tana. 31Amin’ny biby madinika rehetra, dia ireo no ho maloto aminareo; ka na zovy na zovy mikasika ny fatin’ireo, dia haloto mandra-paharivan’ny andro. 32Haloto avokoa, ny zavatra ilatsahan’ny fatiny, na fanaka hazo, na fitafiana, na hoditra, na lasàka, na inona na inona fitaovana ampiasaina; eny, haloto mandra-paharivan’ny andro izany, ary tsy maintsy asoka anaty rano vao hadio. 33Raha siny tanimanga no sendra ilatsahana fatim-biby madinika, dia haloto avokoa ny zavatra ao anatin’io siny io, ka tsy maintsy hovakînareo ilay siny; 34haloto koa ny zava-pihinana rehetra notapohana rano avy amin’io siny io. Haloto ihany koa ny zava-pisotro rehetra ilatsahan’ny fatin’ireo, na inona na inona fitaovana nisy azy. 35Haloto avokoa ny fitaovana rehetra ilatsahan’ny fatin’ireo, na fanendasana izany na vilany mirakotra; ka tsy maintsy montsaninareo izany, satria haloto izy ka ho maloto aminareo. 36Ny amin’ny loharano na lavaka fantsakana, sendra ilatsahana fatim-biby madinika kosa, dia hadio ihany ny rano fa izay hanala ilay fatim-biby no haloto. 37Raha voa famafy no ilatsahan’ny fatim-biby, dia hadio ihany ny voa famafy; 38fa raha voan-javatra hohanina ka nalona tamin’ny rano kosa no ilatsahany, dia haloto aminareo izany voan-javatra izany.
39«Raha biby fihinan-kena no maty ho azy, izay mikasika ny fatiny dia haloto mandra-paharivan’ny andro; 40izay mihinana amin’ny henany kosa dia haloto mandra-paharivan’ny andro sady tsy maintsy manasa fitafiana; ary izay hitondra ilay fatim-biby, dia haloto mandra-paharivan’ny andro ihany koa sady tsy maintsy manasa fitafiana.
41«Ny bibikely rehetra mifanaretsaka ambonin’ny tany dia ho fady aminareo ka tsy fihinana. 42Aza misy haninareo ireny bibikely ireny, na ny mikisaka amin’ny kibony, na ny mandia tongotra efatra na mihoatra noho ny efatra, satria fady aminareo ireny. 43Aoka tsy hanota fady na handoto tena amin’ireny bibikely rehetra ireny ianareo, fandrao hanjary maloto ianareo. 44Fa Izaho no TOMPO Andriamanitrareo. Masina Aho ka mitandrema tena mba ho masina ianareo; ary aoka ny tenanareo tsy holotoinareo amin’izay bibikely mandady amin’ny tany. 45Fa Izaho no TOMPO Izay nitondra anareo niakatra avy tany Ejipta mba ho Andriamanitrareo; ka dia ho masina ianareo, satria masina Aho#11.45 And 44-45: jereo 19.2; 1 Pt 1.16..»
46Ireo no fepetra momba ny biby sy ny vorona ary ny zavamananaina rehetra mihetsiketsika anaty rano na mifanaretsaka ambonin’ny tany; 47ka hanavahanareo ny biby madio sy maloto ary ny biby izay fihinana sy izay tsy fihinana.
Voafantina amin'izao fotoana izao:
Levitîka 11: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.