Josoa 24
24
Ny fanapahan-kevitr’i Israely hanompo ny Tompo
1Namory ny fokon’i Israely rehetra tao Sekema#24.1 Ny tanàna Sekema izay 50 km eo ho eo any avaratr’i Jerosalema, dia toeram-pivavahana iray ho an’ny fivoriamben’ny foko 12 ao amin’ny Israely. i Josoa. Nantsoiny avokoa ireo loholony sy lehilahy ary mpitsarany sy manamboninahiny, ka tonga niseho teo anatrehan’Andriamanitra. 2Dia hoy i Josoa tamin’ny vahoaka rehetra:
–Izao no lazain’ny TOMPO Andriamanitr’i Israely: «Tany andafin’ny ony Eofrata no niorim-ponenana ny razambenareo fahiny, izany hoe ny fianakavian’i Tera, rain’i Abrahama sy i Nahôra; ary nanompo andriamani-kafa ry zareo. 3Fa Izaho no naka an’i Abrahama razambenareo avy tany am-pitan’ny ony Eofrata ary nitondra azy namakivaky ny tany Kanahàna manontolo#24.3 Jereo Gen 12.1-7. sady nampahamaro ny taranany. Nomeko ho zanakalahin’i Abrahama i Itsehàka, 4ary nomeko ho zanakalahin’i Itsehàka kosa i Jakôba sy i Hesao. Natolotro ho fananan’i Hesao ny faritra havoan’i Sehîra; fa i Jakôba sy ny zanany kosa nidina tany Ejipta. 5Tatỳ aoriana, dia naniraka an’i Mosesy sy i Aharôna Aho ka namely an’i Ejipta araka izay efa nataoko teo aminy; rehefa izany vao nasaiko navoaka ny razanareo#24.5 Jereo Eks 7–12.. 6Ary nony navoakako avy tany Ejipta ny razanareo, dia tonga teo amin’ny Ranomasin’ny Volotara; nefa ny Ejiptianina nanenjika azy hatreo an-kalesy sy an-tsoavaly. 7Tamin’izay ny razanareo no niantso vonjy tamiko TOMPO; koa nametrahako haizina mikitroka#24.7 haizina mikitroka: jereo Eks 14.19 ary Eks 13.21 sy nta. tanelanelan’ireo sy ny Ejiptianina sady nazerako tamin’ireto Ejiptianina ireto ny onjan-dranomasina ka nanafotra azy. Fantatrareo tsara izay efa nataoko hamelezana ny Ejiptianina! Avy teo dia nipetraka ela tany an-taniefitra ny razanareo. 8Rehefa izany vao nentiko ho any amin’ny tanin’ny Amôrita izay monina any ampita atsinanan’i Jôrdàna ianareo; niady taminareo ry zareo, nefa natolotro teo an-tananareo ka lasanareo ny taniny ary naringako teo anoloanareo izy. 9Nitsangana koa i Balàka, zanakalahin’i Tsipôra sady mpanjakan’i Môaba, ka niady taminareo. Nampiantso an’i Bilehama zanakalahin’i Behôra izy hanozona anareo; 10nefa tsy nanaiky hihaino an’i Bilehama Aho, ka voatery nitsodrano anareo i Bilehama ary nafahako tsy ho azon’ny tanan’i Balàka ianareo#24.10 Jereo Nom 22–24.. 11Dia niampita an’i Jôrdàna ianareo ka tonga tao Jerikao; ary niady taminareo ny mponina tao Jerikao, toy izany koa ny Amôrita sy Perizita, ny Kanahanita sy Hetita, ny Girgasita sy Hivita ary Jebosita nefa samy natolotro tao an-tananareo ireny#24.11 Jereo 3.4-17; 6.1-21.. 12Ary nandefasako takola-panenitra teo alohanareo ka ireny no nampandositra ireo mpanjaka amôrita anankiroa teo anoloanareo#24.12 takola-panenitra... nampandositra: dkt hafa hakiviana teo anoloanareo ka izany no nampadositra. –mpanjaka amôrita anankiroa: jereo 12.2-5., fa tsy ny sabatrareo na ny tsipîkanareo velively. 13Nomeko tany izay tsy nasainareo ianareo, nomeko tanàna izay tsy naorinareo nefa onenanareo, nomeko tanim-boaloboka sy tanin’ôliva izay tsy nambolenareo nefa ihinananareo ny voany.»
14Dia hoy ihany i Josoa hoe:
–Koa ankehitriny manajà ny TOMPO ka manompoa Azy amim-pahitsiana sy fahamarinana. Ario ny andriamanitra izay notompoin’ny razanareo tany ampitan’i Eofrata sy tany Ejipta, ka manompoa ny TOMPO. 15Nefa raha tàhiny tsy sitrakareo ny hanompo ny TOMPO, dia fidio anio izay hotompoinareo, na ny andriamanitra izay notompoin’ny razanareo tany ampitan’i Eofrata na ny andriamanitry ny Amôrita izay mponina teto amin’ny tany onenanareo; fa izaho sy ny ankohonako kosa dia hanompo ny TOMPO izahay.
16Dia namaly ny vahoaka nanao hoe:
–Sanatria anay ny handao ny TOMPO mba hanompo andriamani-kafa! 17Satria ny TOMPO Andriamanitsika ihany no nampakatra ny razantsika niala tamin’ny toerana fanandevozana tany Ejipta; Izy no nanao ireny famantarana lehibe fantatsika tsara ireny; Izy no niaro ny razantsika#24.17 ny razantsika: raha ara-bakiteny kokoa dia hoe antsika (manambara fiombonana eo amin’ny Israelita ankehitriny sy ireo razany). Jereo koa 24.5 ahitana hoe ny razanareo toy izay ianareo. teny amin’ny lalana rehetra nalehany sy teny amin’ny firenena rehetra noteteziny. 18IZY no nandroaka ny firenena rehetra teo anoloantsika, indrindra ny Amôrita izay nonina teto amin’ity tany ity. Koa hanompo ny TOMPO ihany koa izahay fa Izy no Andriamanitray.
19Dia hoy i Josoa tamin’ny vahoaka:
–Tsy hainareo ny hanompo ny TOMPO; fa Andriamanitra masina Izy#24.19 Jereo Eks 20.5., ka tsy hahazaka ny fahadisoanareo aman’otanareo. 20Raha mandao ny TOMPO ianareo ka manompo andriamani-kafa, dia hisapotina hampahory anareo Izy Tompo ka hahafongana anareo rehefa avy nasiany soa.
21Fa hoy ny vahoaka tamin’i Josoa:
–Tsia, fa ny TOMPO ihany no hotompoinay.
22Dia hoy indray i Josoa tamin’ny vahoaka:
–Ny tenanareo ihany no vavolombelona fa efa nifidy ny hanompo ny TOMPO ianareo.
Ka novalian’ny vahoaka hoe:
–Eny, vavolombelon’izany izahay!
23Dia nofaranan’i Josoa hoe:
–Ankehitriny àry, esory ny andriamani-kafa izay eo anivonareo ka atodiho amin’ny TOMPO Andriamanitr’Israely ny fonareo.
24Ka niteny tamin’i Josoa ny vahoaka hoe:
–Ny TOMPO Andriamanitray no hotompoinay ary ny baikony no hankatoavinay.
25Tamin’izany andro izany dia nanao fanekempihavanana tamin’ny vahoaka tao Sekema i Josoa, ka nanome azy fepetra amam-pitsipika. 26Dia nosoratan’i Josoa tao amin’ny bokin’ny lalànan’Andriamanitra ireo teny ireo; ary naka vato lehibe iray izy ka nanangana azy teo am-pototry ny hazo oaka, izay toera-masin’ny TOMPO. 27Avy eo dia hoy i Josoa tamin’ny vahoaka rehetra:
–Jereonareo ity vato ity fa izy no ho vavolombelona amintsika satria efa nandre ny teny rehetra nolazain’ny TOMPO tamintsika; ary ho vavolombelona aminareo koa izy mba tsy hivadihanareo amin’Andriamanitrareo!
28Dia noravan’i Josoa ny vahoaka, ka samy niverina tany amin’ny zarataniny avy.
Ny nahafatesan’i Josoa
29Taorian’izany zavatra izany, dia maty teo amin’ny faha-110 taonany i Josoa zanakalahin’i Nona sady mpanompon’ny TOMPO. 30Koa nalevina teo amin’ny faritry ny zarataniny izy, dia tao Timnata-Sera, any amin’ny tendrombohitr’i Efraîma, eo avaratry ny tendrombohitra Gahasa. 31Nandritra ny andro rehetra niainan’i Josoa, dia nanompo ny TOMPO ireo Israelita; ary taorian’ny nahafatesan’i Josoa, dia nitohy izany nandritra ny andro rehetra niainan’ireo loholona izay nahita maso ny asa rehetra nataon’ny TOMPO ho an’i Israely.
32Ny taolambalon’i Jôsefa, izay nampiakarin’ny Israelita avy tany Ejipta, dia naleviny tao Sekema, tao amin’ny sombin-tany izay novidin’i Jakôba volafotsy zato tamin’ny taranak’i Hamôra, ilay mpanorina an’i Sekema; ka nanjary nolovan’ny taranak’i Jôsefa izany#24.32 Jereo Gen 33.19 sy nta..
33Maty koa i Elehazara zanakalahin’i Aharôna ka nalevina tao amin’ny havoana izay nomena an’i Pinehasa zanany lahy#24.33 Elehazara: jereo 14.1 sy nta. –tao amin’ny havoana izay nomena... na tao Gibehà (tanàna) izay nomena... , tany amin’ny tendrombohitr’i Efraîma.
Voafantina amin'izao fotoana izao:
Josoa 24: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.