Josoa 17
17
1Izao no zaratany navoakan’ny antsapaka ho an’ny fokon’i Manase izay lahimatoan’i Jôsefa. Teny atsinanan’i Jôrdàna, ny tarik’i Makira, lahimatoan’i Manase sady rain’i Gilehada, dia nomena ny faritany Gilehada sy Basàna, satria miaramila mahery fo i Makira. 2Ny tany teny andrefan’i Jôrdàna kosa dia nomena ny Manasita sisa ho an’ireo tarika ao anatiny: dia ny tarik’i Abihezera, ny tarik’i Heleka, ny tarik’i Asriela, ny tarik’i Sekema, ny tarik’i Hefera, ny tarik’i Semidà. Tera-dehilahy taranak’i Manase izay zanakalahin’i Jôsefa ireo, samy araka ny tarika misy azy avy.
3Fa i Tselofehada, zanakalahin’i Hefera sy zafikelin’i Gilehada ary zafiafin’i Makira sy zafin-dohalik’i Manase, dia tsy mba niteraka zazalahy fa zazavavy ihany. Ka ireto avy no anarany: i Mahalà, i Nôhà, i Hôglà, i Milkà ary i Tiritsà. 4Nanatona an’i Elehazara mpisorona sy i Josoa zanakalahin’i Nona ary ireo loholom-bahoaka izy dimy mirahavavy ka nanao hoe:
–Ny TOMPO efa nandidy an’i Mosesy mba hanome anay zaratany eo anivon’ireo lehilahy mpiray foko aminay.
Dia nisy zaratany nomena azy teo anivon’ireo lehilahy mpiray foko aminy araka ny didin’ny TOMPO. 5Koa nanana tsinjara folo ny fokon’i Manase ankoatry ny faritany Gilehada sy Basàna izay eny ampita atsinanan’i Jôrdàna, 6satria ny vehivavy taranak’i Manase dia nomena zaratany koa fa tsy ny lehilahy ihany. (Ny faritany Gilehada dia an’ireo Manasita hafa).
7Ny velaran-tanin’i Manase dia mahafaoka hatreo Asera ka hatrany Mikmetata, any atsinanan’i Sekema; avy eo dia midina mianatsimo any amin’ny mponin’i Haîna-Tapoa. 8Ny faritanin’i Tapoa dia an’i Manase; fa ny tanànan’i Tapao izay eo amin’ny sisintany kosa dia an’ny Efraîmita. 9Avy eo ny sisin-tany dia midina atsimon’ny lohasahan-driakan’i Kanà, kanefa an’ny Efraîmita ireo tanàna eo atsimon’ny lohasahan-driaka na dia ao anatin’ny faritanin’i Manase aza. Dia mandalo any avaratry ny lohasahan-driaka indray ny sisin-tanin’i Manase ary mipaka amin’ny Ranomasina Mediteranea. 10Ny tanin’i Efraîma dia mitomandavana mianatsimo fa ny an’i Manase kosa mianavaratra; ary ny Ranomasina Mediteranea no samy sisiny andrefana. Ny fokon’i Asera no eo avaratra andrefan’ny fokon’i Manase ary ny an’i Jisakara no eo avaratra atsinanana. 11Tao amin’ny faritanin’i Jisakara sy i Asera dia nahazoan’ny fokon’i Manase an’ireto tanàna ireto: i Bety-Seana sy i Iblehama mbamin’ireo tanàna kely miankina aminy; i Dôra sy i Haîna-Dôra ary i Tahenàka sy i Megidao mbamin’ny mponina ao aminy avy sy ny tanàna kely samy miankina aminy, izany hoe ny faritanin’i Dôra#17.11 Ny faritanin’i Dôra: dkt hafa ny faritany telo na ny havoana telo. . 12Tsy naharoaka an’ireo Kanahanita hiala tamin’ireo tanàna ireo anefa ny taranak’i Manase; koa mbola nipetrahan’ny Kanahanita ihany izany faritany izany. 13Ary na dia efa nihanatanjaka aza ny Israelita, dia tsy naharoaka ny Kanahanita mihitsy saingy nampanao azy asa fanompoana.
14Ary nitaraina tamin’i Josoa ny taranak’i Jôsefa nanao hoe:
–Nahoana no anjara iray ihany tamin’ny antsapaka no mba nomenao anay, kanefa izahay efa tonga vahoaka marobe araka izay nitahian’ny TOMPO anay?
15Dia novalian’i Josoa hoe:
–Raha tàhiny vahoaka marobe ianareo ka tery ho anareo ny havoanan’i Efraîma, dia mandehana any amin’ny tanin’ny Perizita sy ny Refaîta ka tevezo ny ala any hipetrahanareo#17.15 Ny faritra be havoana nisy ny Perizita sy ny Refaîta dia tokony ho teny atsinanan’i Jôrdàna..
16Hoy kosa ny taranak’i Jôsefa hoe:
–Tsy ampy ho anay tokoa ny havoana, kanefa manana kalesy vy ireo Kanahanita rehetra monina ao amin’ny tany lemaka, na izay any Bety-Seana sy amin’ireo tanàna kely miankina aminy na izay any amin’ny lohasahan’i Jizrehela#17.16 Kalesy vy: kalesy fitondra miady ka nofonosina vy ny kodiarany roa toy ny an’ny sarety. Ny kalesy vy dia nahatonga ny Kanahanita hanana fahombiazana kokoa tamin’ny ady an-tany lemaka. Izany no nakan’ny Israelita tamin’ny voalohany ireo faritra be havoana. –Jizrehela: jereo 19.18 sy nta..
17Fa hoy i Josoa tamin’ny taranak’i Jôsefa, dia ny fokon’i Efraîma sy ny antsasa-pokon’i Manase tany andrefana:
–Vahoaka marobe sady matanjaka tokoa ianareo, ka tsy anjara iray ihany no ho anareo. 18Ho anareo koa ny havoana rakotra ala, dia hotevenareo ny ala ka halainareo ny vava ala; fa ho voaroakanareo ny Kanahanita na dia matanjaka sy manana kalesy vy aza ry zareo.
Voafantina amin'izao fotoana izao:
Josoa 17: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.