Jôba 7
7
Ny valintenin’i Jôba (tohiny): mitaraina ny amin’Andriamanitra izy.
1Mafy tahaka ny asa fanompoana
ny fiainan’ny olombelona eto an-tany;
ary toy ny andron’ny mpikarama
no mahamàzana ny androny.
2Toy ny mpanompo mba maniry alokaloka izy
na tahaka ny mpikarama miandry ny karamany.
3Toy izany koa no nanjo ahy
am-bolana maro nahitam-pahoriana
ary alina nifandimby nizakam-pijaliana.
4Raha vao mandry aho,
dia manao anakampo hoe:
«Rahoviana aho no hifoha?»
Fa tsy mety tapitra ny alina,
ary mivadibadika aho mandra-maraina.
5Olitra sy hatina mifangaro vovoka
no mandrakotra ny tenako manontolo;
miempaka sady mandeha nana ny hoditro.
6Mandalo sy lany tsy misy fanantenana ny androko,
eny, mandalo faingana noho ny famahanan-tenona.
*
7Mba tsarovy, Andriamanitra ô,
fa tsio-drivotra miserana ny aiko;
tsy hahita fahasambarana intsony ny masoko.
8Ny masonao izay nijery ahy
dia tsy hahita ahy intsony;
rehefa hizaha ahy ianao,
dia tsy ho eo intsony aho.
9Ny rahona, rehefa misava, dia levona:
toy izany koa izay midina any an-toeran’ny maty
dia tsy mba hiakatra avy any intsony.
10Tsy hiverina any an-tranony intsony izy,
ary tsy hahalala azy intsony ny fonenany.
11Koa tsy hamehy vava hangina intsony aho,
fa misefosefo mafy ka tsy maintsy hiteny
ary tezitra anaty ka voatery hitaraina.
12Moa ve Ranomasimbe aho sa Dràgon-dranomasina#7.12 Eto i Jôba dia mety mampahatsiaro tantara tatsinanana tranainy momba ny fahariana izay milaza fa rehefa resin’Andriamanitra mpahary, ny Ranomasimbe sy ilay Dragon-dranomasina, dia napetrany tamin-toerana tsara ambina mba tsy ho afa-manelingelina intsony. Ampit Is 27.1; Sal 74.13.
no dia ataonao tsara ambina, Andriamanitra ô?
13Raha ilay mandry eo am-parafara iny aho
ka mba manantena hahita fitoniana sy fampiononana,
14dia tonga ianao mampitahotra ahy amin’ny nofiratsy,
ary mampihorohoro ahy amin’ny fahitana.
15Ka dia aleoko kendainao ho faty
toy izay mitofezaka misarin-kàrana.
16Tsy tantiko intsony, fa tsy ho velona ela aho.
Zava-poana ihany ny androm-piainako!
Koa avelao hilamina amin’izao aho.
*
17Inona moa ny olona no dia omenao lanja lehibe
ka andrianin’ny fonao aoka izany#7.17 Ampit Sal 8.5; 144.3.?
18Tonga mitsidika azy isa-maraina ianao
sady mizaha toetra azy tsy an-kiato.
19Rahoviana no hitsahatra ny fijerenao ahy
mba hamelanao ahy vetivety hitelin-drora?
20Na dia ho nanota aza aho,
nampaninona anao moa izany,
ry Mpiambina ny olombelona ô?
Nahoana no dia nataonao lasibatra aho?
Efa tonga enta-mavesatra ho anao ve aho?
21Nahoana no tsy avelanao ny fahadisoako
ary tsy esorinao ny heloka vitako?
Fa indro efa ho faty aho
ka handry eo amin’ny vovoka;
ary hitady ahy fatratra Ianao
saingy efa tsy izy intsony aho amin’izay.
Voafantina amin'izao fotoana izao:
Jôba 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.