Jôba 30
30
Valinteny farany nataon’i Jôba (tohiny):
Fa ankehitriny kosa...
1Fa ankehitriny kosa dia mihomehy ahy
ireo tanora kokoa noho izaho,
dia ny zanak’ireo olona nolaviko
tsy ho naman’ny amboa mpiandry ondriko.
2Sady inona moa no azoko andrasana
amin’izay olona efa tra-pahosana?
3Anan’ny hanoanana sy ny fahantrana izy
ka mitady hohanina any an-tany hay#30.3 Dkt hafa mandositra any an-tany hay. –Rehefa avy nilaza ny fireharehan’ireo mpihomehy azy (and 1a) i Jôba, dia nitanisa ny fiainana mampalahelon’ireo razany (and 1b-8).
izay faritra mampalahelo sady karankaina.
4Mitsongo anan-dia akaiky kirihitra izy
ary mivelona amin’ny kifakafakan-javatra.
5Voaroakan’ny mpiara-monina
ireo karazan’olona ireo
sady voakora toy ny mpangalatra,
6ka mitady fialofana eny an-tehezan-tevana,
any an-dava-johy na any an-dava-bato.
7Mivangongo anaty ambiaty izy
ka mitrena ao anaty kirihitra.
8Karazan’olona adala sy kentrina izy,
ka noroahina tamin’ny kapoka
mba hiala ny tany nonenany.
9Ary dia ny tenako indray ankehitriny
no ataon’ny taranak’ireo olona ireo an-kira
sady efa tonga ambentin-teniny hatrany.
10Maharikoriko azy aho ka halaviriny;
ary tsy menatra ny mandrora ny tavako izy.
11Fa noketrahin’Andriamanitra aho mba hangaihay,
ka nahintsan’ireo olona ireo
ny lamboridy izay nihazonako azy.
12Faikan’olona no mihahohaho eo ankavanako
ka mitady hamingana handavo ahy#30.12 Jereo Sal 109.6; Zak 3.1.,
ary manangana tovon-tany hanatrarany ahy.
13Mandrava ny lalan-kalehako ireo,
ary samy miady fo hamery ahy
ka tsy mila ampiana akory amin’izany.
14Toy ny fiditra amin’ny fefy banga
no fibosesiny anaty korontana hamely ahy.
15Lasibatry ny fampitahorana aho,
ka toy ny rivotra mipaoka ny voninahitro izany;
dia nanjavona tahaka ny rahona
izay mba fanantenàko handresy.
16Ankehitriny miempo ato anatiko ny aiko
ary mangeja ahy ny androm-pahoriana.
17Ny alina mikiky ny taolako ho afaka amiko
ary ny fanaintainako tsy manam-pitsaharana.
18Naka an-keriny ny akanjoko Andriamanitra
ka manakenda ahy toy ny vozon-dobaka tery.
19Nazerany tao amin’ny fotaka aho
ka naetriny toy ny vovoka aman-davenona.
*
20Miantso Anao aho, Andriamanitra ô,
nefa tsy valianao akory;
mitsangana hivavaka eo anoloanao aho,
nefa dia jerenao fotsiny.
21Tonga masiaka amiko Ianao
ka mandrafy ahy amin’ny herinao.
22Avelanao hindaosin’ny rivotra aho
ka atambolimbolin’ny tafiotra mahery.
23Eny, fantatro fa hoentinao
any amin’ny fahafatesana aho,
dia any amin’ilay fonenana
ifamotoanan’ny olombelona rehetra.
24Kanefa nahoana Ianao no hanainga tanana
hamely izay efa mila ho trotraka,
dia ny olona tra-pahoriana
ka miantsoantso vonjy?
25Izaho kosa tsy efa nitomany
ireo niangaran’ny vintana ve aho
ary tsy efa nangoraka ny mahantra?
26Saingy mba niandrandra hasambarana aho,
kanjo sendra ny fahoriana;
ary mba nanantena ny mazava aho,
kanjo sendra ny haizina.
*
27Tsy mitsaha-mandevilevy ny tsinaiko;
androm-pahoriana no mianjady amiko.
28Mandeha amim-pisaonana aho;
tsy misy masoandro mihiratra ho ahy.
Vory vahoaka no hitsanganako
mba hiantsoantsoako vonjy.
29Ka tonga naman’ny amboadia aho
ary tonga zandrin’ny aositritsy
amin’izato feoko mampahonena.
30Mihamainty ny hoditro sady miempaka.
Mahamay sy mainan’ny tazo ireo taolako.
31Dia feo mitoreo no ataon’ny lokangako#30.31 Ny zava-maneno ambaran’i Jôba eto dia tsy fantatra mazava na dia voalaza matetika ao amin’ny T.T. aza. Tombantombana ihany ny dikanteny eto; jereo Sal 150.3 sy nta.
ary feo mitomany no avoakan’ny sodiko.
Voafantina amin'izao fotoana izao:
Jôba 30: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.