Jeremià 5
5
Tanàna efa lò tanteraka
(Ny Tompo)
1Mandehana mivezivezy
eny an-dalamben’i Jerosalema ianareo;
dia jereo tsara sy hadihadio,
tadiavo eny amin’ny toera-malalaka
raha mahita olona anankiray
manao ny mahitsy sy ny rariny ianareo;
fa raha mahita anankiray monja ianareo
dia havelako ny helok’i Jerosalema.
(Jeremià)
2Rehefa manao fianianana ny mponina, dia manao hoe:
«Velona ny TOMPO, ka mianiana aho...»;
nefa tsy marina akory ny fianianany.
3TOMPO ô, moa tsy ny toe-panahy mahatoky ve
no zavatra andrandrainao?
Nokapohinao ny mponin’i Jerosalema,
nefa tsy nahoany akory izany.
Saika hofarananao ny aminy,
nefa tsy nino anatra izy.
Fa mafy loha toy ny vato izy,
ka tsy nety niverina taminao.
4Dia hoy aho anakampo hoe:
«Momba ireo olona mahantra ihany izany;
tsy misaina loatra izy ireny
ka tsy mahalala ny sori-dalan’ny TOMPO
na izay fitsipik’ilay Andriamaniny.
5Fa handeha hiteny amin’ireo olo-maventy aho;
ireny izao no mahalala ny sori-dalan’ny TOMPO,
dia izay fitsipik’ilay Andriamaniny.»
Kinanjo mitovy ihany izy rehetra:
samy efa nanapaka zioga
sy nanito ny fatorany amin’Andriamanitra.
6Noho izany dia hivoaka hamely azy
avy ao amin’ny kirihitr’ala ny liona;
ary handrotidrotika azy
eny an-tsaha ny amboadia.
Ny leôparda hamitsaka eo akaikin’ny tanànany
ka hamiravira izay rehetra mivoaka avy ao,
satria nohamaroiny ny fahadisoany
ary tsy hita isa ny fiodinany.
(Ny Tompo)
7Ry Jerosalema ô,
ahoana moa no hamelako ny helokao?
Ny zanakao efa nandao Ahy
ka nianiana tamin’ny andriamani-tsiizy.
Novokisako tamin’izay nilainy izy
nefa nanitsakitsa-bady ihany,
ka nirohotra ho amin’ny fijangajangana.
8Toa soavaly mpikarenjy tsara fahana izy,
ka samy nandeha mitrentrena
tamin’ny vadin’ny namany avy.
9Koa tsy hirotsaka an-tsehatra
hamely ireny olona ireny ve Aho,
ka hamaly faty ny firenena toy izany,
hoy ny teny hentitry ny TOMPO?
10Iakaro ka simbasimbao
ny tanimboalobony manao ambaratonga;
nefa aza potehina tanteraka!
Esory ny rantsam-boaloboka
satria tsy an’ny Tompo ireny#5.10 Mikasika ny voaloboka atao sarin’ny vahoakan’Andriamanitra, jereo Is 5.1-7..
11Fa efa nivadika tamiko mihitsy
na ny fanjakan’i Joda na ny fanjakan’i Israely,
hoy ny teny hentitry ny TOMPO.
Ny vokatry ny nandaozana ny Tompo
12Nandà ny Tompo ny vahoakan’i Joda,
ka nilaza hoe: «Tsy misy ny TOMPO;
tsy hahatratra antsika ny loza
sady tsy hahita ady na mosary isika.»
13Tsinontsinona ihany ireo mpaminaniny,
fa tsy ao aminy ny tenin’ny Tompo.
Aoka hotodîn’izay lazainy izy!
14Koa izao no lazain’ny TOMPO
Andriamanitr’izao rehetra izao:
«Noho izany tenin’ireo vahoaka ireo izany,
dia hataoko ho toy ny afo ny teniko
izay ampitondraiko anao, ry Jeremià;
ity firenena ity kosa dia ho toy ny kitay
ka holevonin’izany afo izany.
15Ny aminareo indray, ry vahoakan’i Israely,
hoy ny teny hentitry ny TOMPO,
dia indro Aho hahatonga
firenena avy lavitra hamely anareo,
dia firenena tsy mety resy
sady anisan’ireo tranainy indrindra,
firenena tsy fantatrareo ny fiteniny
sady tsy azonareo izay lazainy.
16Toy ny fasana misokatra ny tranon-jana-tsipîkany;
ary mpiady mahery ny miaramilany rehetra.
17Tapitra haripak’io firenena io avokoa
ny vokatrareo sy ny mofonareo,
ny zanakareo lahy sy ny zanakareo vavy,
ny omby sy ondry aman’osinareo,
ary ny voalobokareo sy ny aviavinareo.
Horavany amin’ny ady ny tanànamimanda
izay noheverinareo hitokiana.
18Nefa na amin’izany andro izany aza, hoy ny teny hentitry ny TOMPO, dia tsy hataoko ringana avokoa ianareo. 19Koa raha misy manontany hoe: «Nahoana no namely anay tamin’izao loza rehetra izao ny TOMPO Andriamanitray?», dia izao no havalinao, ry Jeremià: «Toy ny nandaozanareo ny TOMPO ka nanompoanareo ny andriamani-kafa tao amin’ny taninareo no hanompoanareo ny firenen-kafa any amin’ny tany izay tsy anareo!»
Vahoaka tsy mahalala ny fahefàn’Andriamanitra
20Ampitao amin’ny taranak’i Jakôba
izao hafatra izao
ka, ampandreneso ny vahoakan’i Joda,
hoy ny teny hentitry ny TOMPO:
21Henoy àry izao, ry vahoaka
dondrona sy tsy misaina,
mana-maso fa tsy mahita,
manan-tsofina fa tsy mandre#5.21 Ampit Is 6.9-10; Ezek 12.2; Mk 8.18..
22Tsy mba atahoranareo akory ve Izaho TOMPO?
Tsy mba mangovitra eo anatrehako ve ianareo?
Izaho anefa no nametraka ny fasika
ho fefin’ny ranomasina,
dia fetra mandrakizay tsy hihoarany:
na dia misamboaravoara mafy aza izy
dia tsy mahavaky izany fefy izany;
na dia mirohondrohona be aza ny onjany,
dia tsy afaka mihoatra#5.22 Ampit Jôb 38.8-11. azy.
23Ianareo kosa vahoaka mafy fo sy mpiodina,
misintaka lavitra ianareo dia lasa,
24fa tsy mba miteny anakampo hoe:
«Aoka hananantsika fanajana
ny TOMPO Andriamanitsika,
fa Izy no nanome antsika
ny orana amin’ny fotoany,
dia ny oram-pararano sy ny oran-dohataona
ka mitahiry ho antsika ireo herinandro
izay voatendry ho fotoam-pijinjana.»
25Ny helokareo no nanakorontana izany firindrana izany,
ny fahadisoanareo no nisakana ny soa ho anareo.
26Ahitana olon-dratsy manko ao amin’ny vahoakako,
miandry kendrin-tohina toy ny mpamandri-borona izy.
Namela-pandrika tokoa ny olon-dratsy,
mba hisamboran’olona.
27Tahaka ny tranom-borona feno vorona
dia feno zavatra nangalarina ny tranony.
Izany no nahatonga azy
ho lehibe sy manan-karena,
28ho matavy sy mandimandina.
Mihoa-pampana ny ratsy ataony:
Manohana ny ratsy fanahy izy amin’ny fitsarana
fa tsy manome rariny ny kamboty;
tsy raharahany akory izay zon’ny mahantra.
29Koa tsy hirotsaka an-tsehatra
hamely ireny olona ireny ve Aho,
ka hamaly faty ny firenena toy izany,
hoy ny teny hentitry ny TOMPO?
30Misy zava-doza sy mahatsiravina
miseho ao amin’ny tany:
31maminany lainga ny mpaminany,
mitady ny tombontsoany ny mpisorona#5.31 mitady ny tombontsoany ny mpisorona: dkt hafa manapaka araka ny fanohanan’ireny.,
ary ny vahoakako mankasitraka izany.
Koa rehefa tonga ny farany,
inona kosa no hataonareo?
Voafantina amin'izao fotoana izao:
Jeremià 5: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.