Jeremià 46
46
––––––––-
1Hafatra izay nampitondrain’ny TOMPO an’i Jeremià mpaminany momba ireo firenen-kafa#46.1 Ny and 1 dia nitranga ho lohahevitra ho an’ny toko 46–51..
Ny faharesen’ny Ejiptianina tao Karkemisy
2Fanambaràna momba an’i Ejipta sy ny tafiky ny Farao Nekao, mpanjakan’i Ejipta. Tao Karkemisy teo amoron’ny ony Eofrata i Nekao no resin’i Nebokadnetsara mpanjakan’i Babilôna, tamin’ny taona fahefatra nanjakàn’i Jôiakima zanakalahin’i Josià mpanjakan’i Joda#46.2 Ny fiandohan’ny and 2 dia mitsangana ho lohahevitry ny and 2-28. –Nekao: jereo 2 Mp 23.29-35 sy ny naoty momba ny Jer 22.13. –Karkemisy: tanàn-dehibe any avaratr’i Mezôpôtamia, eo akaikin’ny sisin-tanin’i Siria sy Torkia ankehitriny. –ny taona fahefatra nanjakàn’i Jôiakima: jereo 22.13; 25.1 sy nta. –Momba an’i Ejipta: jereo Is 19.1 sy nta..
3Manome baiko ny manamboninahitra hoe:
«Omany ny ampinga kely sy lehibe
ary mandrosoa hiady.
4Afatory ny lasely,
ary taingeno ny soavaly!
Anaovy ny satro-by fiarovan-doha ka milahara!
Arangarangao ny lefona;
iakanjoy ny akanjo vy fiarovan-tratra.»
5Ahoana izao zavatra hitako izao?
Raiki-tahotra izy ka mihemotra.
Resy ireo miaramila mahery fo
sady mitsoaka mandositra,
ka tsy misy miherika akory.
Fihorohoroana hatraiza hatraiza#46.5 Jereo 6.25 sy nta.,
hoy ny teny hentitry ny TOMPO.
6Tsy afa-mandositra ny faingam-pandeha
ary tsy mahavonjy tena ny mahery fo;
fa any avaratra eo amoron’ny ony Eofrata izy
no ho tafintohina ka hianjera.
7Iza àry ity tahaka an’i Neily tondraka,
na ireo sampany misy rano misamboaravoara?
8I Ejipta no tahaka an’i Neily tondraka,
na ireo sampany misy rano misamboaravoara,
fa hoy izy hoe: «Hiakatra hanafotra ny tany aho,
ary handringana ny tanàna sy ny mponina ao aminy.
9Manafiha amin’izay, ry soavaly,
ary miriota mafy, ry kalesy!
Aoka hiainga ny mahery fo,
dia ireo olon’i Kosy sy Pota
izay mpitondra ampinga kely
sy ireo olon’i Loda izay mirongo tsipîka#46.9 Kosy: faritanin’i Sodàna ankehitriny; ny dikany mahazatra dia i Etiôpia. –Pota, Loda: jereo ny naoty Is 66.19.!»
10Kanefa, ho an’ny Tompo ANDRIAMANITR’izao rehetra izao,
ity andro ity dia ho andro famaizana
mba hanafaizany ny fahavalony.
Ka ny sabatra dia handripaka sy hiletra azy
ary himamo amin’ny ran’ireo;
satria toa sorona vonoina hatolotra
amin’ny Tompo ANDRIAMANITR’izao rehetra izao
no any amin’ny tany avaratra
manamorona ny ony Eôfrata.
11Ry Ejipta mahonena,
miakara hatrany Gilehada
ka makà balsama ho anao...
Nefa tsy ilaina ny hampitomboanareo ny fitsaboana
satria tsy misy fanafody hahasitrana ny ferinao.
12Ren’ny firenen-kafa ny henatrao
fa nanenika ny tany ny tolokonao.
Nifamingana ny samy mahery fo
ka niara-nianjera izy roa tonta.
Fanafihana an’i Ejipta
13Hafatra nampitondrain’ny TOMPO an’i Jeremià mpaminany fony i Nebokadnetsara mpanjakan’i Babilôna tonga nanafika an’i Ejipta#46.13 Ity ady nataon’ny Babilônianina tamin’i Ejipta ity dia tokony ho niseho nandritra ny ririnina 601-600 tal J.K; ampit Jer 43.10-13.:
14Ambarao any Ejipta ny vaovao
ary ampandreneso ao Migdôla
sy ao Memfisa ary ao Tahapanehesa#46.14 Migdôla: tanàna ejiptianina amin’ny sisin-tany avaratra atsinanan’i Ejipta (Eks 14.2; Jer 44.1). –Memfisa, Tahapanehesa: jereo 2.16 sy nta.,
ka ataovy hoe: «Mivonòna hiady ary miomàna,
fa efa ripaky ny ady ny manodidina anao.»
15Fa inona no miseho?
Mianjera amin’ny tany
ny ombalahy masina#46.15 Amin’ny ejiptianina fahiny ny ombilahy masina tao Memfisa dia mampiseho ny hery mpiaro ny tanàna, eny ny tany manontolo mihitsy aza. Dkt hafa «nianjera amin’ny tany ireo lehilahy maherinao.» ianteheranao!
Tsy nahatohitra izy fa voatosiky ny TOMPO
16Izay mampivembena miaramila maro
sy mampianjera azy hifanindry.
Dia nifampiresaka ireo hoe:
«Andeha isika hiverina any amin’ny firenentsika,
dia any amin’ny tany nahaterahantsika,
mba ho afaka amin’ny ady mandoza.»
17Fa ny Farao mpanjakan’i Ejipta kosa
dia omeo anaram-bosotra hoe:
«Rabetabataba tsy misy vokany#46.17 dia omeo anaram-bosotra: araka ny dkt tranainy grika sy latinina ary siriaka; hebreo «tany izy no niantsoantso hoe»..»
18–Teny hentitra no ataon’ilay Mpanjaka
Izay antsoina hoe «TOMPOn’izao rehetra izao»:
Velona aho ka mianiana fa ho tonga ny fahavalo.
Azo antoka tahaka ny fisian’i Tabôra
amin’ny samy tendrombohitra izany;
azo antoka tahaka ny fisian’i Karmela
izay mandòndona eo amoron-dranomasina!
19Ry mponina any Ejipta ô, mifeheza entana
mba handeha any amin’ny fahababoana.
Fa hodorana ny tanànan’i Memfisa,
ka ho lao tsy hisy mponina intsony.
20Toa ombivavy kely tsara tarehy i Ejipta!
Kinanjo tamy avy any avaratra#46.20 Jereo 1.14 sy nta.
ny fihitra hanaikitra azy!
21Voakarakara toa ombilahy kely mifahy
ireo miaramila mpikarama an’ady tao Ejipta.
Nefa, na ireo koa aza, nihemotra
ka samy lasa nandositra avokoa.
Tsy nisy nahajoro nony tonga ny andro mahory
izay hirotsahako an-tsehatra hamely azy.
22Toy ny fitsaitsaikan’ny menarana
no fialan’ny tafika ejiptianina,
raha vao tonga hamely azy ny fahavalo
izay toy ny mpikapa hazo mandrangaranga famaky.
23Kapain’ireo ny alany, na dia matevina aza,
hoy ny teny hentitry ny TOMPO.
Fa marobe noho ny andiam-balala izy
ka tsy tambo isaina.
24Rakotra henatra ny mponin’i Ejipta:
eo an-tanan’ny vahoaka avy any avaratra
no efa nanolorana azy!
25Izao no lazain’ny TOMPOn’izao rehetra izao sady Andriamanitr’i Israely: «Indro Aho hirotsaka an-tsehatra hamely an’i Amôna andriamanitr’i Teba#46.25 Teba: tanàn-dehibe tany Ejipta ambony., hamely an’i Ejipta sy ny andriamaniny ary ny mpanjakany, eny, hamely ny Farao sy izay rehetra miantehitra aminy. 26Hatolotro eo an-tanan’ireo mitady hahafaty azy izy, dia i Nebokadnetsara mpanjakan’i Babilôna mbamin’ireo miaramilany.
Rehefa afaka izany, vao hiverina amin’ny laoniny toy ny taloha i Ejipta. Izany no teny hentitra avy amiko TOMPO.»
Afaka i Israely
(Jereo 30.10-11)
27Aza matahotra kosa ianareo,
ry taranak’i Jakôba mpanompoko.
Aza kivy ianao, ry firenena Israely,
fa indro Aho hamonjy anao
avy any amin’ny faritany lavitra any;
indro Aho hamonjy ireo taranakao
avy any amin’ny tany izay nahababo azy.
Hiverina ianareo, ry taranak’i Jakôba,
ka hiadana sy handry feizay
fa tsy hisy hanaitaitra intsony.
28Ry taranak’i Jakôba mpanompoko,
aza matahotra ianareo,
satria Izaho no miaraka aminareo;
teny hentitra avy amiko TOMPO izany.
Hofongorako ny firenen-kafa rehetra
izay nanelezako anareo;
ianareo kosa tsy mba hofongorako,
na dia tsy maintsy faiziko
araka ny hitsiny ihany aza
fa tsy havelako ho afa-maina!
Voafantina amin'izao fotoana izao:
Jeremià 46: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.