Jeremià 3
3
Vehivavy janga be kirina
1Hoy ny TOMPO tamiko:
Raha misy lehilahy misaraka amin’ny vadiny
ka mandao azy ravehivavy mba hanambady olon-kafa,
moa mahazo mampody azy indray ve izy?
Tsia, fa haloto ny tany.
Kanefa ianao, ry Israely,
dia efa lehilahy maro no nijangajanganao#3.1 Raha misy lehilahy...: jereo Deot 24.1-4. –Momba ny fivadihana amin’Andriamanitra nampitoviana amin’ny fijangajangana, jereo 2.20.,
hoy ny teny hentitry ny Tompo;
ka moa hahazo miverina amiko indray ve ianao?
2Atopazo eny amin’ny havoana#3.2 eny amin’ny havoana: eny no anatanterahana ny fivavahana momba ny fananahana (jereo 2.20). ny masonao:
jereo raha misy toerana tsy nandrian’olona taminao.
Tahaka ny Arabo mpirenireny any an-taniefitra
miandry ny rembiny
no nipetrahanao teo amoron-dalana
niandry ny lehilahinao.
Ny fijangajanganao sy ny faharatsianao
no nandotoanao ny tany.
3Koa nosakanako tsy ho avy aminao ny oram-be
sady tsy nisy koa ny oran-dohataona#3.3 Tany Palestinina dia nilaina mihitsy ny oran-dohataona mba hitomboan’ny voa eny amin’ny salohy sy hahatomombana ny vokatra. –Momba ity and ity, jereo Ham 4.7-8..
Nefa nikiry hijangajanga ihany ianao
fa tsy nety niaiky ny fahadisoanao.
4Ankehitriny anefa ianao
dia sahy miantsoantso Ahy hoe:
«Ry raiko sady sakaizako fahazaza,
5mbola ho tezitra amiko ihany ve ianao
ka hitahiry alahelo amiko hatrany?»
Izany no teninao tamiko,
nefa tsy nitsahatra nanao ratsy ianao,
sady tena havanana tamin’izany.
I Israely mpiodina sy i Joda mpivadika
6Tamin’ny andron’i Jôsià mpanjaka dia hoy ny TOMPO tamiko:
–Hitanao ve izay nataon’i Israely mpiodina? Nankeny amin’ny havoana rehetra sy teny am-pototry ny hazo maitso rehetra izy ka nanolo-tena hijangajanga#3.6 I Jôsià dia mpanjakan’i Joda ny taona 640-609 tal J.K; jereo ny naoty 1.2a. –Israely eto dia ny fanjakana avaratra teo aloha izay mifanohitra amin’i Joda eo amin’ny and 7. Ny vahoakan’Andriamanitra eto dia naseho ho toy ny vehivavy tanora iray: jereo 2.2 sy nta. Ireo fanjakana roa ireo dia oharina amin’ny mpirahavavy: jereo Ezek 23. –fijangajangana: jereo 2.20 sy nta.. 7Dia hoy Aho anakampo hoe: Rehefa afaka izany dia hiverina amiko izy. Kanjo tsy niverina izy; ary nahita izany i Joda mpivadika rahavaviny. 8Hitany fa nomeko taratasy fisaoram-bady#3.8 nomeko taratasy fisaoram-bady: jereo Deot 24.1,3; Is 50.1. Ny mpaminany eto dia tsy isalasalana fa milaza an-kolaka ny faharavan’i Samaria izay niseho tamin’ny 721 tal J.K (jereo 2 Mp 17). Ny fivadihan’ny vahoakan’Andriamanitra izay oharina amin’ny fanitsakitsahana tokantrano: jereo 5.7; 9.1; 13.27 sns. i Israely mpiodina, ary nisaorako noho izy nijangajanga. Kanefa tsy natahotra akory i Joda mpivadika fa mba lasa koa aza izy nijangajanga. 9Nijangajanga tamin’ireo andriamanitra vato aman-kazo izy ary nandoto ny tany tamin’ny nataony. 10Nefa na dia tao aza izany dia tsy mbola niverina tamiko tamin’ny fony fa tamin-tendro-molotra ihany i Joda mpivadika, rahavavin’i Israely. Izaho TOMPO no manao izany teny hentitra izany.
11Fa mbola niteny tamiko indray ny TOMPO hoe:
–Toa marimarina ihany i Israely mpiodina raha miohatra amin’i Joda mpivadika. 12Koa mandehana ambarao any avaratra any izao hafatra izao hoe:
Miverena, ry Israely mpiodina,
hoy ny teny hentitry ny TOMPO;
fa tsy hanao tarehy ratsy aminao Aho,
satria entanim-pitiavana,
fa tsy mitahiry hatezerana maharitra.
13Kanefa aoka hiaiky heloka ianao
fa nikomy tamiko TOMPO Andriamanitrao:
nivezivezy nanaraka ireo andriamani-kafa ianao
teny am-pototry ny hazo maitso rehetra teny
fa tsy nihaino ny feoko:
teny hentitra avy amiko TOMPO izany.
Ny fiverenan’i Joda
14Miverena amiko, ry zaza mpiodina, hoy ny teny hentitry ny TOMPO, satria Izaho no tomponareo. Hangalako iray isan-tanàna na roa isan-tarika ianareo ka hoentiko any an-tendrombohitra Tsiôna. 15Ka any no hanomezako anareo mpitondra araka izay sitrako sy afaka hitondra anareo amim-pahalalana sy amim-pahendrena.
16Amin’izany fotoana izany, hoy ihany ny teny hentitry ny TOMPO, dia hanjary ho maro sy hitombo be dia be ao amin’ity tany ity ianareo. Tsy horesahina intsony ny Vatamasina mirakitra ny fanekempihavanako. Tsy ho ao an-tsain’ny olona intsony izany fa hohadinoiny, tsy hisy ho manina azy na hanao Vatamasina hafa#3.16 Vatamasina: jereo Sal 132.6-7 sy nta.. 17Amin’izany fotoana izany i Jerosalema dia hantsoina hoe «Sezafiandrianan’ny TOMPO». Hivory ao ny firenena rehetra hanome voninahitra Ahy TOMPO sady tsy hanaraka intsony ny ditran’ny fony ratsy. 18Hankany amin’izay nielezan’ny vahoakan’i Israely ny vahoakan’i Joda ka hiara-miverina avy any amin’ny tany avaratra izy roa tonta ary hankany amin’ny tany izay nomeko ny razany ho fananany.
Miverina amin’Andriamanitra ilay vahoaka mpiodina
(Ny Tompo)
19Hoy Aho anakampo hoe:
Ahoana raha ataoko lohalaharana
amin’ireo zanako lahy ianao
ka homeko tany mahafinaritra
izay fananana tsara indrindra
eo amin’ny samy firenena?
Amin’izay dia hiantso Ahy ho rainao ianao
ka tsy hiodina amiko intsony.
20Kanjo toy ny vehivavy nisintaka tamim-badiny
no nisintahanao tamiko, ry taranak’i Israely;
teny hentitra avy amiko TOMPO izany.
21Injany misy feo re any an-tampon-kavoana:
tsy inona izany fa ireo Israelita
izay mitomany sy mitaraina mafy
satria diso lalana tamin’izay nalehany
ka nanadino Ahy TOMPO Andriamaniny.
22Miverena amiko, ry zaza mpiodina,
fa hositraniko amin’ny fiodinanareo ianareo!
(Ny vahoaka)
Indreto izahay manatona Anao,
satria Ianao no TOMPO Andriamanitray.
23Eny tokoa, fa nanodoka anay
ny fanompoan-tsampy teny an-kavoana
sy ny horakoraka teny an-tendrombohitra,
kanefa aminao TOMPO Andriamanitray ihany
no hahitan’Israely famonjena.
24Fa hatry ny fahazazànay
dia efa lanin’io fivavahana mahamenatra
nanompoana an’i Bahala io
ny zavatra rehetra nisasaran’ny razanay,
dia ny omby aman’ondriny sy ny osiny,
ny zanany lahy sy ny zanany vavy#3.24 ny zanany lahy sy ny zanany vavy: filazana an-kolaka ireo fanaovana sorona ny ankizy fanao teo amin’ny fivavahana kanahanita: jereo 7.31; 19.5; 22.3; Deot 18.10; 2 Mp 16.3; 17.17; 21.6; Sal 106.38..
25Aoka hatory ombàn-kenatra izahay
ka hanaiky ny fahafaham-baràka,
satria efa nanao heloka
teo anatrehanao TOMPO Andriamanitray.
Fa na izahay na ny razanay dia tsy nihaino
izay nolazain’ny TOMPO Andriamanitray
hatry ny fahazazànay ka mandrak’androany.
(Ny Tompo)
Voafantina amin'izao fotoana izao:
Jeremià 3: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.