Jeremià 28
28
I Jeremià sy i Hananià mpaminany
1Tamin’iny taona iny ihany, izany hoe ny taona fahefatra nanjakàn’i Tsedekià mpanjakan’i Joda, andro iray tamin’ny volana fahadimy#28.1 volana fahadimy: izany hoe ny volana Jolay-Aogositra 594 tal J.K; jereo ny FTS amin’ny voambolana hoe FANISANANDRO. –Momba ny fanjakan’i Tsedekià, jereo 27.1 sy nta., dia nankao an-tranon’ny TOMPO i Hananià mpaminany, zanakalahin’i Hazora sady avy any Gibehôna. Niteny tamin’i Jeremià teo imason’ny mpisorona sy ny vahoaka rehetra teo izy, ka nanao hoe:
2–Izao no lazain’ny TOMPOn’izao rehetra izao sady Andriamanitr’i Israely:
«Hopotehiko ny ziogam-pamoretana angejan’ny mpanjakan’i Babilôna anareo. 3Ka alohan’ny roa taona manomboka androany, dia haveriko eto ireo fanaka rehetra tato an-tranoko, fanaka izay nalain’i Nebokadnetsara mpanjaka ka nentiny tany Babilôna. 4Haveriko eto koa i Jekonià, zanakalahin’i Jôiakima sady mpanjakan’i Joda, mbamin’ny Jodeanina rehetra izay nentina ho babo tany Babilôna, hoy ny teny hentitra avy amiko TOMPO. Eny, hopotehiko ny ziogam-pamoretana angejan’ny mpanjakan’i Babilôna anareo».
5Fa namaly an’i Hananià mpaminany i Jeremià teo imason’ny mpisorona sy ny vahoaka rehetra izay tao an-tranon’ny TOMPO 6ka nanao hoe:
–Eny, enga tokoa anie mba ho araka izay nolazainao no hataon’ny TOMPO! Hotanterahiny anie izay nambaranao ka haveriny avy any Babilôna hanketo indray ireo fanaka rehetra tao an-tranon’ny TOMPO miaraka amin’ny babo rehetra! 7Kanefa henoy tsara izao teny ataoko renao sy ren’ny vahoaka rehetra eto izao: 8Efa nisy tokoa mpaminany hatry ny ela talohanao sy talohako. Ireny mpaminany ireny dia manambara hafatra tamin’ireo tany matanjaka sy fanjakana malaza; nefa ady sy loza ary areti-mandringana no nambarany mazàna. 9Fa raha misy mpaminany iray milaza fahasambarana, ny ahalalana fa nirahin’ny TOMPO tokoa izy dia rehefa tanteraka izay nolazainy.
10Dia nesorin’i Hananià mpaminany ny zioga teo an-tsorok’i Jeremià mpaminany, ka nopotehiny. 11Avy eo dia hoy i Hananià teo imason’ny vahoaka rehetra teo: «Izao no lazain’ny TOMPO: ‹Alohan’ny roa taona androany, dia hopotehiko tahaka izao ny ziogam-pamoretana angejan’i Nebokadnetsara mpanjakan’i Babilôna ny firenena rehetra.› »
Dia lasa nandeha tamin’ny diany i Jeremià mpaminany.
12Saingy taorian’ny nanapotehan’i Hananià mpaminany ny zioga izay nolanjain’i Jeremià teo an-tsorony, dia nisy baikon’ny TOMPO tamin’i Jeremià nanao hoe:
13–Ndeha lazao amin’i Hananià izao hafatry ny TOMPO izao: «Satria nopotehinao ilay zioga hazo teo, dia zioga vy no hasolonao azy.»
14Sady nampian’i Jeremià hoe:
–Izao manko no lazain’ny TOMPOn’izao rehetra izao sady Andriamanitr’i Israely: «Zioga vy no apetrako eny an-tsoroky ny firenena rehetra amin’ity faritany ity, ka hanompo an’i Nebokadnetsara mpanjakan’i Babilôna izy; eny, na dia ny bibidia aza dia hampanekeko azy koa.»
15Avy eo dia hoy koa i Jeremià tamin’i Hananià mpaminany:
–Henoy tsara aho, ry Hananià: Tsy naniraka anao ny TOMPO, fa ianao no nanosika ity vahoaka ity hiantehitra amin’ny lainga. 16Koa lazain’ny TOMPO fa hoesoriny tsy ho eto ambonin’ny tany ianao; alohan’ny faran’ity taona ity, dia ho faty ianao satria nanosika ity firenena ity hikomy amin’ny TOMPO.
17Dia maty tamin’ny volana fahafito tamin’iny taona iny tokoa i Hananià mpaminany#28.17 volana fahafito: izany hoe Septambra-Oktôbra, jereo ny FTS amin’ny voambolana hoe FANISANANDRO. .
Voafantina amin'izao fotoana izao:
Jeremià 28: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.