Jeremià 2
2
Israely, vahoaka mpivadika
1Nisy tenin’ny TOMPO tamiko nanao hoe:
2«Ndeha ataovy antso avo ao Jerosalema fa izao no lazaiko:
«Tsaroako ny toetranao fahiny, ry Israely.
Endrey izany fifikiranao tamiko
fony ianao mbola tanora!
Endrey izany fitiavanao Ahy
fony ianao mbola fofombadiko#2.2 fofombadiko: amin’ity and ity, tahaka izay ao amin’ny 2.20-25 ary matetika amin’ny perikopa hafa, ny vahoakan’i Israely dia nomena endrik’olona zatovovavy iray na vehivavy herotrerony iray.!
Nanaraka Ahy hatrany an-taniefitra ianao,
tany amin’ny faritany tsy nisy zava-maniry.
3Voatokana ho AHY irery ianao tamin’izay, ry Israely,
toy ireo voaloham-bokatry ny tany.
Izay rehetra nikasika anao
dia nahita raharaha tamiko,
ka niharan-doza avy hatrany.
Teny hentitra avy amiko TOMPO izany.
4Ry taranak’i Jakôba
sy ry fokon’i Israely rehetra,
henoy ny tenin’ny TOMPO
5fa izao no lazainy aminareo:
Inona moa no hadisoana
hitan’ny razanareo tamiko
no dia nanalavitra Ahy TOMPO izy?
Nandeha nanaraka zava-poana izy
ka dia tonga zava-poana koa!
6Tsy nanontany tena akory izy hoe:
Mba aiza àry izao ny TOMPO
izay nitondra antsika niala tany Ejipta
sy nitarika antsika namakivaky ny taniefitra,
faritany karankaina sy be hantsana,
tany mangentana sy mampahatahotra
fa tsy andalovan’olona sady tsy misy mponina?
7Izaho no nampiditra anareo
ho ao amin’ny tany lonaka
mba hihinananareo ny vokatra tsara avy aminy;
kanjo rehefa tafiditra tao ianareo
dia nolotoinareo ny taniko
ary ny fananako nametrahanareo zava-maharikoriko.
8Tsy nanontany akory ny mpisorona hoe:
«Mba aiza àry izao ny TOMPO?»
Ny mpahay lalàna kosa tsy nahalala Ahy,
ireo mpitarika nikomy tamiko,
ny mpaminany niteny tamin’ny anaran’i Bahala,
ary izy rehetra samy nifikitra
tamin’ny andriamani-tsiizy sady tsy mahasoa.
9Noho izany dia hifandahatra
hiady aminareo Aho,
ary hatrany amin’ny zafinareo no hiadiako;
teny hentitra avy amiko TOMPO izany.
10Fa mba mandehana ange miampita
any amin’ny nosy Kitima ka zahao,
mba maniraha olona hanadihady
any amin’ny Arabo ao Kedara#2.10 ny nosy Kitima na ireo nosy Grika. –Kedara: any avaratry ny taniefitr’i Arabia, izany hoe any atsinanan’i Palestinina, mifanohitra amin’ny mankany amin’ireo nosy grika.,
raha mahita toe-javatra tahaka izao any e!
11Moa ve nisy firenena
efa nanova ny andriamaniny,
nefa tsy andriamanitra akory ireny!
Fa ny vahoakako kosa efa nanakalo ny voninahiny
tamin’ireo andriamanitra tsy mahasoa akory.
12Koa aoka ho gaga ianareo any an-danitra
ka samia raiki-tahotra sy mangorohoro;
teny hentitra avy amiko TOMPO izany.
13Faharatsiana roa sosona
no nataon’ny vahoakako:
fa sady nahafoy Ahy loharano velona izy
no nihady lava-drano ho azy,
kanjo lava-drano mitriatra ireny
ka tsy nahatan-drano.
Mangidy tokoa ny fandaozana ny Tompo
14Mpanompo ve i Israely ankehitriny?
Moa nateraka ho andevo ve izy?
Tsia, koa nahoana izy
no ho rembin’ny firenen-kafa?
15Tahaka ny fieron’ny biby masiaka
no fandrahonan’ireo azy;
ka nahatonga ny taniny ho lao
sy nandorana ny tanànany ho tsy azo onenana.
16Na dia ny mponina tao Memfisa
sy tao Tahapanehesa aza
mba nanety ny lohanao hangadihady#2.16 Tahapanehesa, Memfisa: tanàn-dehibe ejiptianina tany avaratr’i Ejipta. Memfisa no renivohitr’i Ejipta ambany tany aloha, ka tokony 20 km ao atsimon’i Kera ankehitriny. –hanety ny lohany hangadihady: fomba fampijaliana atao amin’ny babo an’ady (jereo Is 7.20)., ry Israely.
17Ny nahatonga izany taminao ve
tsy noho ny nandaozanao
ny TOMPO Andriamanitrao
tamin’ny andro nitantanany anao
teny an-dalana?
18Ankehitriny, inona no soa ho anao
amin’ny fankanesana any Ejipta?
Hisotro ny ranon’i Neily ve?
Ary inona no soa ho anao
amin’ny fankanesana any Asiria?
Hisotro ny ranon’i Eofrata ve?
19Aoka ho voasazy ianao noho ny ratsy nataonao
ary hofaizina noho ny fivadihanao!
Ho fantatrao amin’izay fa mangidy sy ratsy
ny nandaozanao Ahy TOMPO Andriamanitrao
sy ny tsy anajanao Ahy intsony,
hoy ny teny hentitry ny Tompo,
ANDRIAMANITR’izao rehetra izao.
I Israely, vehivavy tsy mahatombin-tsiraka sy tsy mahatoky
20Hatramin’ny ela no efa nanapahanao ny zioganao
ary namahanao ny fatoranao tamiko
ka nilazanao hoe: «Tsy hanompo intsony aho».
Kinanjo teny amin’ny havoana rehetra
sy teny am-pototry ny hazo maitso rehetra teny
no nitsilailay toy ny vehivavy mpivaro-tena#2.20 Ny fivarotan-tena masina no toetra mampiavaka ny fivavahana kanahanita; amin’izany fanao izany no nanantenàna ahazoan’ny fianakaviana sy ny biby fiompy fananahana ary ahazoan’ny saha fahavokarana. Io no antony nilazan’ny mpaminany ny fivadihan’i Israely tamin’ilay Andriamaniny ho fivarotan-tena. Jereo ohatra Jer 3.1; 5.7; 13.27 ets; Hos 4.13-14; jereo Jer 3.8 sy nta. ianao.
21Izaho anefa no namboly anao
tahaka ny voaloboka tsara,
dia rantsana tsara tokoa.
Koa nahoana àry ianao
no niova ho sampany ratsy
sy tonga voaloboka hafa?
22Na dia misasa ny tenanao
toy ny fanasa lamba aza ianao
ka hampiasa savony betsaka,
dia tsy ho afaka ny fahadisoanao
fa ho toy ny tseroka eo anatrehako,
hoy ny teny hentitry ny Tompo ANDRIANANAHARY.
23Ahoana no ahasahianao nilaza hoe:
«Tsy nandoto tena aho,
tsy nanaraka ny fivavahana tamin’i Bahala?»
Jereo ange izay nataonao tao an-tsaha#2.23 Ny lohasahan’i Hinôma ao atsimon’i Jerosalema no lazain’i Jeremià an-kolaka eto. Momba ireo fombafomba fanompoan-tsampy natao tao, jereo Jer 7.31-32; 32.35; 2 Mp 23.10 sy nta. e!
Aoka hiaiky izay nataonao ianao,
fa toy ny ramevavavy mihazakazaka etsy sy eroa.
24Toy ny borikivavidia zatra any an-taniefitra ianao:
Miandry lahy izy ka manimbolo rivotra,
sady maimay erỳ ka tsy misy mahasakana azy.
Tsy sahirana akory ireo lahy rehetra mitady azy,
fa mahita azy amin’ny volana mahamaimay azy!
25«Atsaharo ny hazakazakao#2.25 Ny hazakazaka mankany amin’ny sampy ka analavirana ny Tompo izany., ry Israely,
fandrao haradratra ny tongotrao tsy mikapa
ary koa ho maina ny tendanao.»
Nefa hoy ny navalinao hoe:
«Tsy mampiraika ahy izany,
fa tiako ny andriamani-kafa
ka tsy maintsy miaraka aminy aho.»
26Indray andro any anefa ianareo, ry mponin’i Israely
na ianareo sarambabem-bahoaka,
na ianareo mpanjaka sy mpitondra,
na ianareo mpisorona sy mpaminany,
dia samy ho menatra toy ny mpangalatra tra-tehaka.
27Fa ny tapa-kazo itenenanareo hoe:
«Ianao no raiko»;
ary ny sarivongam-bato ilazanareo hoe:
«Ianao no niteraka ahy».
Tokony hijery manatrika Ahy ianareo,
kanefa ny lamosina no atodikareo amiko.
Saingy nony tra-pahoriana ianareo,
dia hiantso vonjy amiko hoe:
«Midira an-tsehatra ianao hamonjy anay»;
28fa hamaly anareo kosa Aho hoe:
«Nankaiza ireo andriamanitrareo
izay nataonareo ho anareo?»
Aoka izy hamonjy anareo
raha afaka manao izany
amin’ny androm-pahorianareo!
Fa maro tahaka ny isan’ny tanànanareo
no isan’ny sampinareo, ry mponin’i Joda.
*
29Nahoana no mifandahatra amiko ianareo,
hoy ny teny hentitry ny TOMPO,
kanefa ianareo rehetra no nivadika tamiko?
30Nikapoka anareo toy ny zanako Aho,
fa tsy nahoanareo akory izany;
tsy zaka nanarina ianareo.
Tahaka ny liona namiravira
no namonoanareo ny mpaminany
ho fatin’ny sabatrareo.
31Aoka hodinihinareo ny tenin’ny TOMPO
ry taranaka ankehitriny#2.31 Toa teny natsofoka ho fampitandremana ny mpamaky no eto, tahaka izay hita ao amin’ny Mk 13.14 ohatra.!
Moa ve efa nanjary mahatahotra toy ny taniefitra
na toy ny tany ao anaty haizina Aho, ry Israely?
Ry vahoakako, nahoana no ilazanareo hoe:
«Efa afaka izahay ka tsy hiverina aminao intsony?»
32Moa manadino ny firàvany ve ny virijiny?
sa manadino ny etrany voarandrana#2.32 etrany voarandrana: ampit Is 3.20. ve ny ampakarina?
Tsia, nefa ianareo vahoakako efa nanadino Ahy
hatramin’ny andro maro tsy voaisa.
*
33Endrey izany tetikao hitady fitia,
hany ka nihazatra nanao heloka ianao!
34Hatramin’ny fitafianao avy no nahitana
ny ran’ny mahantra tsy manan-tsiny.
Tsy nahatratra azy nanapitsoka
ny varavaranao#2.34 Momba ny famonoana ireo mpangalatra tra-tehaka eo am-pangalarana, jereo Eks 22.1. akory ianao!
Nefa na eo aza izany rehetra izany,
35dia mihambo ho tsy manan-tsiny ianao,
ary tsy ara-drariny ny itezerako anao.
Koa noho ianao milaza ho tsy manao ratsy,
dia hanenjika anao amin’ny fitsarana Aho.
*
36Ahoana no nanovanao faingana ny tetikao?
Kanefa ho diso fanantenana amin’i Ejipta ianao
tahaka ny nahazo anao tamin’i Asiria.
37Dia hialanao amin-kenatra koa i Ejipta
ka hanaron-tava amin’ny tanana ianao;
satria Izaho TOMPO tsy manaiky
ny hitadiavanao io karazam-panampiana io,
fa tsy hanambina anao izany.
Voafantina amin'izao fotoana izao:
Jeremià 2: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.