Jeremià 18
18
I Jeremià tao amin’ny mpanefy tanimanga
1Nisy baiko avy amin’ny TOMPO ho an’i Jeremià nanao hoe:
2–Mitsangàna, ary midîna any an-tranon’ny mpanefy tanimanga, fa any no hampandrenesako anao ny teniko.
3Dia nidina tao an-tranon’ny mpanefy tanimanga aho, ka indro izy nanao ny asany teo ambony kodia fanodinana. 4Ary raha simba ny vilany ataony fa mety hitranga amin’ny tanimanga eo an-tanan’ny mpanefy ihany izany, dia anaovany vilany hafa indray iny araka izay tiany hanaovana azy. 5Dia nanafatra ahy ny TOMPO hoe: 6«Moa tsy afaka manao aminareo toy izay ataon’ity mpanefy tanimanga ity va Aho, ry olon’i Israely, hoy ny fanontaniana hentitra avy amiko TOMPO? Indro eo an-tanako ianareo, tahaka ny tanimanga eo an-tanan’ny mpanefy azy. 7Indraindray dia milaza ny hanongotra sy hanjera ary handrava firenena iray na fanjakana iray Aho. 8Nefa raha miala amin’ny ratsy izay nahatonga ny fandrahonako izy, dia hiova hevitra amin’ny loza izay nokasaiko hamelezana azy Aho. 9Ary indraindray dia milaza ny hanorina sy hamboly firenena iray na fanjakana iray Aho. 10Nefa raha manao izay ratsy eo imasoko izy ka tsy mihaino ny feoko, dia hiova hevitra Aho amin’ny soa izay nampanantenaiko hatao aminy.
11«Ankehitriny, ry Jeremià, mitenena amin’ny olon’i Joda sy ny mponin’i Jerosalema, ka ambarao aminy hoe: ‹Izao no lazain’ny TOMPO: Indro efa namolavola loza hamelezana anareo Aho, ary eo am-panomanana ny tetika hampiharana izany. Koa samia miala amin’ny fitondrantena ratsy avy ianareo ary ovay ho tsara ny fitondrantenanareo sy ny asanareo.› »
12Kanjo nifikitra tamin’ny ditram-pony sy ny firehan-dratsiny izy ka namaly hoe: «Mamoiza! Izay efa tapakay ihany no hataonay.»
Hadinon’i Israely ny Tompony
13Noho izany dia izao no lazain’ny TOMPO:
Mba anontanio ange any amin’ny firenen-kafa
raha mba nisy nandrenesana zavatra toy izao!
Zava-mahatsiravina loatra ity nataon’i Israely.
14Moa ve ny harambato eny an-tsaha
mba ilaozan’ny oram-panalan’i Libano?
Moa mba efa ritra ve ny rano
izay mikoriana mangatsiatsiaka
avy any an-tany hafa any? Tsia.
15Fa ny vahoakako kosa nanadino Ahy,
ka nandoro zava-manitra mifangaro
tamin’ireo sampy tsinontsinona
izay nandavo azy teny an-dalany
mba hialany amin’ny lalana mahazatra
ary nampandeha azy tamin’ny lalan-kely
izay mbola tsy voasoritra akory.
16Io vahoakako io no nahatonga ny taniny
hampahonena sy hampivarahontsana mandrakizay.
Ka ny olona rehetra mandalo azy
dia mivanàka sady mihifikifi-doha.
17Tahaka ny vovoka tsofin’ny rivotra
avy any atsinanana
no hampielezako ny vahoakako
eo anoloan’ny fahavalony.
Amin’ny androm-pahavoazany
dia hiambohoako izy fa tsy hatrehiko!
Ny fiokoana tamin’i Jeremià sy ny vavaka nataony
18Dia hoy ny olona hoe: «Andeha isika hanao tetika hamelezana an’i Jeremià, fa tsy ho foana akory ny mpisorona hanome fampianarana, na ny olon-kendry hanolo-tsaina na ny mpaminany hampita ny tenin’Andriamanitra. Andeha hasiantsika amin’ny fanalam-baràka izy, ka tsy horaharahaintsika akory izay lazainy#18.18 Jereo 4.9; 8.9. –fa tsy ho foana...Andriamanitra: dkt hafa aroso indraindray fa hisy hatrany fampianarana avy amin’ny mpisorona*, torohevitra avy amin’ny olon-kendry ary tenin’Andriamanitra avy amin’ny mpaminany* na hoe fa tsy ho foana ny fampianarana na tsisy mpisorona aza, tsy ho foana ny torohevitra na tsisy olon-kendry aza ary tsy ho foana ny tenin’Andriamanitra na tsisy mpaminany aza..»
19TOMPO ô, hevero tsara ny amiko
ary henoy ny tenin’ireo miampanga ahy.
20Moa tokony hovaliana ratsy ve ny soa?
Nefa izy manomana fandrika hamely ahy
Ianao kosa, ry Tompo, aoka hahatsiaro
fa nitsangana nitaraina teo anatrehanao aho
mba hialan’ny fahatezeranao taminy.
21Noho izany, avelao ny zanany
ho fatin’ny mosary;
ary ny tenan’ireo mpiampanga ahy
poteho amin’ny sabatra.
Aoka ny vadiny ho maty anaka
sy ho tonga mpitondratena.
Aoka ny lehilahy lehibe
haripaky ny areti-mandringana
ary ny zatovony ho faty an’ady.
22Aoka ny fidradradradrana
no ho re avy ao an-tranony,
rehefa hataonao tonga tampoka
ny andia-miaramila hamely azy!
Fa namela-pandrika hisamborana ahy izy
sy nanafina harato haningorana ny tongotro.
23TOMPO ô, fantatrao avokoa ny teti-dratsy
nokotrehiny hamonoana ahy ho faty.
Ka aza avelanao ny helony
ary aza kosehinao ny hadisoany.
Aoka ho lavo eo anatrehanao izy,
ary asio amin’ny androm-pahatezeranao.
Voafantina amin'izao fotoana izao:
Jeremià 18: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.