Jeremià 17
17
Atsikafon’ny Tompo ny heloky ny vahoakan’i Joda
1Ny fahotan’ireo vahoakan’i Joda dia voasoratra
tamin’ny vy sy diamondra fanoratana.
Tahaka ny voasokitra soratra amin’ny vatofisaka
no mahavoasokitra izany ao am-pony
sy eny an-joron’ny alitarany#17.1 Zoron’ny alitara: jereo Eks 27.2, fa io no faritra heverina ho masina indrindra.;
2ka ho marika hiampangana azy ireo alitarany
sy ireo tsatokazo fanajany an’i Aserà,
eny akaiky hazo maitso sy eny ambony havoana#17.2 ho marika hiampangana azy: araka ny RM «araka ny tsaroan’ireo zanany lahy». –tsatokazo fanasinana: jereo Mpits 3.7 sy nta. –hazo maitso sy havoana: jereo 3.20 sy nta. –tendrombohitra: araka ny RM tendrombohitro. –And 3-4: ampit 15.13-14.
3ary eny antampon-tendrombohitra any an-tsaha.
Hatolotro horobaina avokoa
ny fanananao sy ny haren-tsarobidinao,
mbamin’ireo toeran-tsampinao koa aza
ho valin’ny ota nataonao
tao amin’ny faritaninao manontolo.
4Ary tsy maintsy hafoinao
ny zaratany izay nomeko anao.
Hampanompoiko ny fahavalonao
any amin’ny tany tsy fantatrao ianao,
satria narehitrao ny afom-pahatezerako
izay hirehitra mandrakizay.
Ny fialofana azo antoka sy ny fialofana sandoka
5Izao no lazain’ny TOMPO:
–Voaozona izay mitoky amin’olombelona
sy miantehitra amin’ny nofo ho heriny
ka mampiala ny fony amiko.
6Ho tahaka ny anjavidy ao an-tany hay izy
ka tsy hahita ny soa ho avy;
hitoetra an-tsaham-bato any an-taniefitra izy
dia eo amin’ny tanin-tsira tsy azo onenana.
7Fa hotahîna izay mitoky amiko
ka manana Ahy TOMPO ho fialofany.
8Ho tahaka ny hazo ambolena eo amoron-drano izy
ka misandraha-paka eo akaikin’ny renirano.
Tsy misy atahorany#17.8 Ampit Sal 1.3. na avy aza ny hafanana,
ary maitso hatrany ny raviny;
Na dia amin’ny taonan’ny hain-tany aza,
tsy manahy izy fa mamokatra hatrany.
9–Tsy misy zavatra mamitaka
hoatra ny fon’olombelona.
Tsy azo sitranina izy,
ary tsy misy mahafantatra ny aminy.
10–Izaho TOMPO kosa
dia mahita ny ao am-po
sy mamantatra ny ao an’eritreritra.
Koa araka ny fitondrantenany
sy ny vokatry ny asany avy
no hamaliako ny olona#17.10 Ny miafina ao an’eritreritra: jereo Jer 11.20 sy nta. –araka ny fitondrantenany avy: jereo Apôk 2.23..
11Tahaka ny akoho mikotrika atodin-gana#17.11 na tsipoy mikotrika ny atody tsy nalatsany. ,
toy izany izay manangon-karena tsy ara-drariny:
eo antenatenan’androny izy
no hilaozan’izany hareny izany,
ka ho lasa adala no iafarany.
Ny Tompo no hany loharanom-piainana
12Sezafiandrianana be voninahitra
sady miteronterona hatrany am-boalohany
no tempoly masina ho antsika#17.12 Jereo 3.17..
13Ry TOMPO fanantenàn’i Israely ô,
ho menatra izay rehetra mandao Anao.
Voasoratra anarana eo am-bovoka
izay nihataka taminao,
noho izy efa nandao Anao,
ry TOMPO loharano velona ô#17.13 Jereo 2.13..
Vavak’i Jeremià
14TOMPO ô, sitrano aho, dia ho sitrana;
vonjeo aho, dia ho voavonjy,
fa antony hiderako Anao izany.
15Indreo ny besinimaro milaza amiko hoe:
«Aiza ihany ity tenin’ny TOMPO?
Aoka ho tanteraka amin’izay izany!»
16Tsy izaho no nanery Anao
hanafaingana ny loza#17.16 Tsy izaho... hanafaingana ny loza: araka ny dkt tranainy grika anankiroa izany; ny RM dia manao hoe ho mpiandry ondry. , Tompo ô,
na nirary hiavian’ny antambo.
Fantatrao tokoa izany,
satria niharihary teo anatrehanao
izay hafatra naloaky ny molotro.
17Aoka tsy ho fampitahorana ahy Ianao
fa Ianao no fialofako
amin’ny androm-pahoriana!
18Aoka ireo mpanenjika ahy no ho menatra
fa tsy ny tenako velively;
aoka ireo no ho trotraka, fa tsy izaho.
Ataovy tonga aminy ny andro mandoza,
ary potipoteho tanteraka izy.
Antso ho fanajana ny andro sabata
19Izao no voalazan’ny TOMPO tamiko:
–Mandehana, ka mijoroa eo amin’ny vavahadim-bahoaka izay fandalovan’ny mpanjakan’i Joda raha miditra sy mivoaka ny tanàna izy; ary hanaovanao toy izany koa amin’ny vavahady rehetra eto Jerosalema. 20Ka lazao amin’ny mpandalo hoe: «Mihainoa ny tenin’ny TOMPO ianareo mpanjakan’i Joda sy ianareo rehetra vahoakan’i Joda ary ianareo rehetra mponina eto Jerosalema izay miditra amin’ireto vavahady ireto. 21Izao no lazain’ny TOMPO: Mitandrema tena ianareo mba tsy hitondra entana amin’ny andro sabata ka hampandalo azy amin’ireo vavahadin’i Jerosalema ireo#17.21 Fanajana ny sabata: jereo Ne 13.15-22.. 22Aza mitondra entana mivoaka ny tranonareo amin’ny andro sabata na manao raharaha akory amin’izany; fa atokany ho Ahy ny andro sabata tahaka izay efa nandidiako ny razanareo#17.22 Ny andron’ny Tompo: jereo Eks 20.8-10; Deot 5.12-14.. 23Nefa tsy nihaino izy na nampandry sofina fa nanamafy hatoka; eny, tsy nihaino izy fa nandà ny fampitandremako.
24«Ianareo kosa, mihainoa Ahy tsara, hoy ny teny hentitra avy amiko TOMPO. Aza mampandalo entana amin’ireo vavahadin’ny tanàna ireo amin’ny andro sabata; fa atokany ho Ahy izany andro izany ka aza manao raharaha akory ianareo. 25Amin’izay ireo mpanjaka mipetraka eo amin’ny sezafiandrianan’i Davida ka mandeha mitaingin-tsoavaly na kalesy sy ireo mpitondra sy ny vahoakan’i Joda ary ireo mponina rehetra eto Jerosalema dia hahazo hiditra amin’ireo vavahady ireo hatrany; ary ity tanàna ity dia honenana mandrakizay. 26Amin’izay dia ho avy ireo olona avy amin’ny tanànan’i Joda sy ny manodidina an’i Jerosalema mbamin’ny faritanin’i Benjamîna ary koa ireo olona avy eny amin’ny lemak’i Sefelà sy ny tany be tendrombohitra mbamin’ny faritr’i Negeba; ka hankao an-tempoly izy hanolotra sorona dorana manontolo sy sorona hafa, hanolotra fanatitra hanina sy vovo-javamanitra nafangaro ary sorom-pisaorana. 27Fa raha tsy mihaino Ahy kosa ianareo ka tsy manokana ny andro sabata ho Ahy fa mbola mitondra entana mandalo amin’ireo vavahadin’i Jerosalema ireo amin’ny andro sabata ihany, dia handrehetako afo ao anaty tanàna; ka handevona ireo tranony tsara tarehy izany afo izany sady tsy ho faty.»
Voafantina amin'izao fotoana izao:
Jeremià 17: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.