Jeremià 13
13
I Jeremià sy ny fehikibo rongony
1Izao no voalazan’ny TOMPO tamiko: «Mandehana mividy fehikibo rongony ho anao ka afehezo ny kibonao izany, nefa aza alona rano.» 2Dia nividy fehikibo araka izay nolazain’ny TOMPO aho ka nafehiko ny kiboko. 3Ary nisy tenin’ny TOMPO fanindroany nanao tamiko hoe: 4«Ento ny fehikibo izay novidinao ka afehinao ny kibonao, ary mankanesa any Farà#13.4 Farà: araka ny dkt grika tranainy. Renirano mikoriana mankany Jôrdàna io, tokony ho adiny iray an-tongotra ao avaratr’i Hanatôta. Dkt mahazatra Eofrata. ka afeno ao an-tsefatsefaky ny harambato any izy.» 5Dia nankany Farà aho ary nafeniko tany ilay fehikibo araka izay nandidian’ny TOMPO ahy. 6Nony afaka andro maro dia hoy ny TOMPO tamiko: «Mankanesa indray any Farà ianao ary alao ilay fehikibo nasaiko nafeninao tany.» 7Dia niverina tany Farà aho mba hamongatra sy haka ilay fehikibo tao amin’ny toerana izay nanafenako azy. Kinanjo indro efa lò tanteraka, tsy azo ampiasaina intsony ilay fehikibo.
8Ary nisy tenin’ny TOMPO tamiko nanao hoe: 9«Izao no lazain’ny TOMPO: Hataoko lo tahaka ity fehikibo ity ny zavatra mampirehareha an’i Joda sy mampirehareha fatratra an’i Jerosalema. 10Fa vahoaka ratsy tsy mety mihaino izay lazaiko izy, mikiry amin’ny ditram-pony, mifikitra amin’ireo andriamani-kafa ka manompo azy sy miankohoka eo anatrehany. Koa ho tahaka io fehikibo tsy azo ampiasaina intsony io anie ity vahoaka ity! 11Toy ny amatoran’ny olona ny fehikibo amin’ny kibony, hoy ny teny hentitra avy amiko TOMPO, no nifatorako tamin’ny vahoakan’i Israely sy ny vahoakan’i Joda rehetra mba hahatonga azy ho vahoakako sy ho lazako, ho voninahitro sy ho firavako. Kanjo tsy nety nihaino Ahy izy.»
Ny divay sy ny fahatezeran’ny Tompo
12Ndeha lazao amin’ny vahoakan’i Israely sy amin’ny vahoakan’i Joda, ry Jeremià, ity hafatra ity: «Izao no lazain’ny TOMPO, Andriamanitr’i Israely: Ny siny rehetra dia natao hofenoina divay!» Ary raha mamaly anao izy hoe: «Fantatray tokoa fa natao hofenoina divay ny siny rehetra», 13dia hitenenanao hoe: «Izao no lazain’ny TOMPO: Indro hataoko mamo tanteraka ny mponina rehetra amin’ity tany ity, dia ny mpanjaka izay mipetraka eo amin’ny sezafiandrianan’i Davida, ny mpisorona, ny mpaminany ary ny mponina rehetra eto Jerosalema#13.13 Miteny an-kolaka momba ny lohahevitra izay hiverina matetika eto i Jeremià: ny fahatezeran’Andriamanitra dia oharina amin’ny divay izay mahamamo (jereo ohatra Jer 25.15-16).. 14Hampifandrotehiko ny olona ka ny ray aman-dreny hamely ny zanany, hoy ny teny hentitra avy amiko TOMPO. Tsy hitsitsy na hiantra na hamindra fo Aho fa handringana azy.»
Mihainoa fa sao tara loatra.
15Mihainoa, ka mandrenesa tsara;
aza miavonavona satria ny TOMPO no miteny.
16Omeo voninahitra ny TOMPO Andriamanitrareo,
dieny tsy mbola nahatonga haizina Izy
ary dieny tsy mbola tafintohina ny tongotrareo
eny an-tendrombohitra rakotry ny alina eny.
Miandry ny mazava ianareo,
kanjo hovany ho alo-pahafatesana izany
sy hataony toy ny rahona mainty.
17Raha tsy mihaino izany hafatra izany ianareo,
dia hitomany ao amin’ny toera-mangina aho
noho ny avonavonareo mihoa-pampana;
eny, ny masoko dia hamarin-dranomaso,
hamarin-dranomaso hijononoka be,
satria lasan-ko babo
ny andianondrin’ny TOMPO.
Hafatry ny Tompo ho an’ny ankohonan’ny mpanjaka
18Lazao amin’ny mpanjaka sy ny reniny hoe:
«Mipetraha amin’ny tany ianareo,
satria efa nianjera avy eny an-dohanareo
ny satroboninahitrareo tsara tarehy.
19Voahidy ny tanàna any Negeba,
ary tsy misy olona mamoha intsony,
satria lasan-ko babo avokoa ny vahoakan’i Joda;
eny, lasan-ko babo avokoa izy rehetra.
Afa-baràka i Jerosalema
20Atopazo ny masonao, ry Jerosalema, ka jereo:
tonga avy any avaratra ny fahavalonao!
Inona àry no hanjo ny vahoaka
izay nankiniko taminao,
dia ny ondrinao tsara tarehy?
21Ary inona no havalinao
raha izay nozarinao ho namanao
no nivadika hamely sy hanapaka anao?
Ho tratry ny fanaintainana
toy ny vehivavy miteraka ianao.
22Amin’izay dia hanontany tena ianao hoe:
«Ahoana no nahatonga izao tamiko?»
Ny halehiben’ny fahadisoanao
no nanaingàna ny morontongotr’akanjonao
ka nanaovana an-keriny taminao.
23Afaka hanova ny volon-kodiny ve ny Etiôpianina
na afaka hanova ny sorany ve ny leôparda?
Tsia! Dia toy izany koa ianareo,
izay efa zatra manao ratsy:
tsy afaka hanao ny tsara intsony ianareo!
24Koa haeliko ianareo ho toy ny poti-mololo
indaosin’ny rivotra avy any an-taniefitra.
25Ry Jerosalema, izao no voatendry ho anao,
dia ilay anjara nomaniko ho anao,
hoy ny teny hentitra avy amiko TOMPO,
satria nanadino Ahy ianao
ka nifikitra tamin’ireo andriamani-tsiizy:
26Izaho koa dia hanainga
ny morontongotr’akanjonao
hatreny amin’ny endrikao
ka ho hita mitanjaka ianao.
27Izato fanitsakitsaham-bady sy antsoantsom-pilàna
ary fijangajangana mahamenatra nafitsokao#13.27 Jereo 2.20; 3.8 sy nta.!
Teny amin’ny havoana sy teny an-tsaha teny
na nahitako ireo sampinao maharikoriko.
Lozanao, ry Jerosalema,
fa tsy mety hidio ianao!
Mandra-pahoviana no haharetan’izany?
Voafantina amin'izao fotoana izao:
Jeremià 13: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.