Mpitsara 7
7
Vatan-dehilahy telonjato no voafantina hiaraka amin’i Gidehôna
1Vao maraina be i Gidehôna, izay nantsoina koa hoe Jerobahala, no niainga niaraka tamin’ny tafiny manontolo ka nandeha nitoby teo akaikin’i Haîna-Harôda. Ny tobin’ny Midianita kosa dia terỳ avaratra, teo amin’ny lemaka anilan’ny havoana Môre#7.1 Jerobahala: jereo 6.32. I Haîna-Harôda, izany hoe loharano fangovitana, dia eo atsinanan’ny lemak’i Jizrehela. Ny havoana Môre dia eo atsimon’ny tendrombohitra Tabôra..
2Dia hoy ny TOMPO tamin’i Gidehôna:
–Maro loatra ny tafika miaraka aminao ka tsy hatolotro eo an-tanany ny Midianita, fandrao hirehareha amiko ny Israelita ka hanao hoe: «Ny herinay ihany no namonjy anay». 3Koa izao ankehitriny izao dia ambarao eo anatrehan’ny io tafika io hoe: «Aoka izay rehetra mangovitra#7.3 mangovitra: tsilalaon-teny momba ny hoe Harôda, jereo 7.1 sy nta. noho ny tahotra mba hody any an-tranony!»
Dia nanaovan’i Gidehôna fifantenana ny tafiny; ka andiany roapolo tamin’ireo no niverina nody fa andiany folo sisa nijanona. 4Nefa hoy indray ny TOMPO tamin’i Gidehôna:
–Mbola marobe ihany io tafika io, koa ampidino ho eo amoron-drano izy fa eo no hifantenako ho anao. Holazaiko aminao tsirairay izay tokony handeha hiaraka aminao sy izay tsy tokony handeha.
5Dia nampidinin’i Gidehôna hankeo amoron-drano ny tafiny; ary hoy ny TOMPO taminy:
–Izay rehetra milelaka ny rano amin’ny lelany toy ny fanaon’ny alika, dia avaho amin’ireo rehetra mandohalika hisotro kosa.
6Dia nisy telonjato ny lehilahy nandraoka rano tamin’ny tanany ho amin’ny vavany ka nilelaka azy, fa ny sisa rehetra kosa nandohalika hisotro. 7Ary hoy ny TOMPO tamin’i Gidehôna:
–Ireo telonjato lahy izay nilelaka rano ireo no hamonjeko ny Israelita ka hanolorako ny Midianita eo an-tananao. Ary ny amin’ireo sisa kosa dia aoka samy hody any amin’ny fonenany avy izy!
8Koa telonjato lahy ihany no notazonin’i Gidehôna hiaraka aminy fa ny Israelita hafa rehetra nalefany hody any amin’ny fonenany avy; saingy notazonina kosa ny vatsy sy ny trompetran’ireo nandeha.
Ny tobin’ny Midianita dia terỳ ambany kokoa tao amin’ny lemaka.
Fambara fandresena mialoha
9Tamin’io alina io dia hoy ny TOMPO tamin’i Gidehôna:
–Mitsangàna ka midîna ao an-tobin’ny Midianita, fa efa natolotro eo an-tananao io. 10Kanefa raha matahotra ny hanafika ny toby ianao, dia ento midina miaraka aminao aloha i Porà mpanomponao. 11Ho renao any izay ambaran’ny olona, dia hanana herimpo hanafika ianao.
Dia nidina niaraka tamin’i Porà mpanompony i Gidehôna hatreo amin’ny mpiambina lohalaharana eo amin’ny toby. 12Ary ny Midianita sy ny Hamalekita ary ireo mpifindrafindra lasy avy any atsinanana dia niparitaka teny amin’ny lemaka fa marobe tahaka ny valala; ny ramevany dia tsy hita isa fa tahaka ny fasika eny amoron-dranomasina. 13Ary fony tonga teo amin’ny toby i Gidehôna, dia nisy lehilahy iray nitantara ny nofiny tamin’ny namany hoe:
–Nanonofy aho, ka hitako fa nisy mofo ôrza iray nikodiadia namaky ny tobintsika Midianita; nahavoadòna tranolay anankiray izany ka nampiongana azy hivadika ambony ambany#7.13 Ny mofo ôrza dia manondro ny Israelita izay mpamboly, ary ny tranolay dia manondro ny Midianita izay mpifindrafindra lasy..
14Fa namaly azy ilay namany ka nanao hoe:
–Tsy zavatra hafa no asehon’izany fa ny sabatr’i Gidehôna, ilay Israelita zanakalahin’i Jôasy. Efa natolotr’Andriamanitra eo an-tanany isika miaraka amin’ny toby manontolo.
15Rehefa avy nandre ny fitantarana ny nofy sy ny heviny teo i Gidehôna, dia niankohoka hisaotra an’Andriamanitra. Ary niverina tany amin’ny tobin’ny Israelita izy ka niantso hoe:
–Mitsangàna ianareo fa efa natolotry ny TOMPO eo an-tanantsika ny tobin’ny Midianita.
Nitsoaka niverin-dalana ny Midianita
16Nozarain’i Gidehôna ho antokony telo ireo telonjato lahy, ka samy nomeny trompetra iray sy siny foana iray ary fanilo iray avy isan-dahy ka hapetraka ao anaty siny. 17Dia nanome baiko ireo izy hoe:
–Mijere ahy ianareo, ka izay ataoko no ataovy raha vao tonga eo an-tsisin’ny toby aho. 18Raha mitsoka trompetra ny tenako sy ny olona miaraka amiko, dia mba mitsofa trompetra manodidina ny toby koa ka miantsoantsoa hoe: «Ho an’ny TOMPO sy ho an’i Gidehôna!»
19Ary nony efa madiva hisasaka ny alina, dia tonga teo an-tsisin’ny toby i Gidehôna sy ny antokon’olona niaraka taminy. Vao avy nosoloina ny mpiambina tamin’izay. Nitsoka trompetra ry i Gidehôna sady namaky ny siny nentiny. 20Dia nanao toy izany koa ireo antokony roa hafa. Samy nihazona ny fanilo tamin’ny tanany havia izy rehetra ary nitana ny trompetra tamin’ny tanany havanana hitsofany azy; dia niantsoantso izy hoe: «Tafiho amin’izay, ho an’ny TOMPO sy ho an’i Gidehôna!»
21Samy nijoro teo amin’ny toerany manodidina ny toby avy izy rehetra. Fa tao anatin’ny toby kosa dia nihazakazaka ny miaramila rehetra sady niantsoantso sy nandositra. 22Ary raha nitsoka trompetra ireo telonjato lahy, dia nampifamonoan’ny TOMPO tamin’ny sabatra ny samy Midianita eran’ny toby manontolo. Ary izay sisa tsy maty dia nandositra hatrany Bety-Sità, an-dalana ho any Tseredà, sy hatrany an-tsisin’i Abela-Mehôlà, akaikin’i Tabata#7.22 I Tseredà dia tanàna tsy fantatra mazava ny misy azy; i Abela-Mehôlà dia tanàna teo andrefan’i Jôrdàna; ary i Tabata dia teo atsinanan’i Jôrdàna; araka izany koa angamba i Bety-Sità. .
23Dia novorina ny vatan-dehilahy israelita avy amin’ny foko naftalita sy i aserita ary koa avy amin’ny foko manasita manontolo ka nanenjika ny Midianita. 24Ary nandefa iraka nankany amin’ny faritra manontolo be tendrombohitra any Efraîma i Gidehôna hilaza hoe:
–Midîna ianareo hisakana ny Midianita ka mialohà azy hibahana ny toerana fitàna ny ony Jôrdàna hatrany Bety-Barà.
Dia nivory ny vatan-dehilahy efraîmita ka nidina nibahana ny toerana fitàna ny ony Jôrdàna hatrany Bety-Barà. 25Nosamboriny ireo lehibe midianita roa lahy, dia i Hôreba sy i Zeeba, ka i Hôreba novonoiny tao amin’ny vatolampin’i Hôreba ary i Zeeba kosa novonoiny tao amin’ny famiazam-boalobok’i Zeeba. Avy eo dia mbola nanenjika ny Midianita ihany izy. Ary ny lohan’i Hôreba sy i Zeeba dia avy teny atsinanan’i Jôrdàna no nentiny tany amin’i Gidehôna.
Voafantina amin'izao fotoana izao:
Mpitsara 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.