Isaià 65
65
Ny fitsarana ho avy
1Dia hoy ny TOMPO hoe:
Efa vonona hamaly Aho saingy tsy nisy nanontany;
efa niandry Aho, saingy tsy nisy nitady fanampiana tamiko;
koa firenena izay tsy niantso Ahy akory
no nanambarako hoe: «Inty Aho! Inty Aho#65.1 Ao amin’ny Rm 10.20-21 dia tsiahivin’i Paoly apôstôly ny and 1-2 araka ny dkt tranainy grika.!»
2Nanolo-tanana hatrany Aho
tamina vahoaka mpikomy,
dia olona manaraka ny lalan-dratsiny
sady mirona amin’ny saim-pantany.
3Vahoaka mampahatezitra Ahy mandrakariva izany;
sady eo imasoko no anaovany sorona eny an-tanimboly
sy andoroany zava-manitra mifangaro
eny amin’ny alitara tanimanga
ho fanajana ny andriamani-kafa.
4Mipetraka any am-pasana izy ireny
na misitrika any an-dava-bato#65.4 Ny mpanompo sampy dia nipetraka tany am-pasana satria nanantena hifandray amin’ny maty; ampit Lev 19.31; Deot 18.11-12. amin’ny alina,
sady mihinana hena kisoa
ary manisy ron-kena maloto ao an-doviany.
5Ka hoy ireo amin’izay ifanenany:
«Mihatakataha lavitra, aza mikasika ahy
fandrao mahafaty anareo ny fahamasinako#65.5 Mba maka tahaka ny olona voatokan’Andriamanitra ireo mpanompo sampy, ka mihevitra ho manan-kasina sady fady kasihina rehefa avy nanao ny fombafombam-pivavahany..»
Ireny fomban-tsampy isan-karazany ireny
dia toy ny setroka mampirongatra ny hatezerako
sy toy ny afo mampirehidrehitra azy isan’andro.
6Indro voasoratra eto anatrehako avokoa ireny,
koa tsy hangina Aho raha tsy voavaliko ny nataony,
ary hovaliako mitafotafo mihitsy aza;
7ka indray hatsingeriko aminy, hoy Aho,
ny heloka vitany sy ny heloky ny razany.
Satria ireto koa efa nandoro zava-manitra mifangaro
ho an’ny sampy teny an-tendrombohitra
sy nihantsy Ahy teny amin’ny havoana;
ka dia ho fatra mitafotafo mihitsy
no hasetriko ny fitondrantenany fahiny!
8Izao no lazain’ny TOMPO:
Rehefa ahitana sampaho mamy
eo amin’ny rantsam-boaloboka iray
dia ataon’ny olona hoe: «Aza simbana izany,
fa misy fitahiana hahazoan-divay tsara eo aminy»;
ho tahaka izany koa
no hataoko amin’ny mpanompoko
mba tsy hosimbako izy rehetra.
9Homeko taranaka ny firenen’i Jakôba sy ny fokon’i Joda.
Ireny no ho tompon’ny tendrombohitro:
ireo voafidiko no ho tompony,
ireo mpanompoko no honina eo.
10Ho an’ny vahoakako izay nitady Ahy
dia hanjary saha fiandrasana ondry i Sarôna,
ary hanjary valan’omby ny lohasaha Hakôra#65.10 Ny faritr’i Sarôna dia lemaka mahavokatra eo amoron’ny Ranomasina Mediteranea. –ny lohasaha Hakôra: jereo Jos 7.24-26; 15.7; Hôs 2.17..
11Ianareo izay nandao Ahy TOMPO kosa
ka nanadino ny mankeny an-tendrombohitro masina,
ianareo izay nandroso sakafo ho an’i Gada
sady nanatitra divay voaharoharo ho an’i Menỳ#65.11 tendrombohitro masina: jereo 56.7 sy nta. –Gada: andriamanitry ny anjara teo amin’ny fanompoan-tsampy tany Kanahàna fahizay; ka fahita teo amin’ny anaran-tanàna sy anaran’olona sasantsasany izany voambolana izany (jereo Jos 11.17; 15.37; Gen 30.11). –Menỳ: andriamanitry ny vintana teo amin’ny fanompoan-tsampy fahizay koa.,
12dia hatolotro ho voan’ny sabatra ianareo
ka haringana avokoa eo am-pandohalehana,
satria nantsoiko ianareo fa tsy namaly
ary nitenenako fa tsy nihaino.
Izay ratsy eo imasoko no nataonareo,
ary izay tsy sitrako no nofidinareo.
13Koa hoy Izaho Tompo ANDRIANANAHARY hoe:
Indro ny mpanompoko hihinana,
fa ianareo kosa ho mosarena;
indro ny mpanompoko hisotro
fa ianareo kosa ho main-ketaheta;
indro ny mpanompoko hifaly,
fa ianareo kosa ho menatra.
14Indro ny mpanompoko hihorakora-pifaliana
noho ny hasambarana ao am-pony,
fa ianareo kosa hiantsoantso noho ny alahelom-po
sy hikiakiaka noho ny fanahy torotoro.
15Eo amin’ny olom-boafidiko
dia hatao ohatra ny anaranareo
amin’ny fomba fanozonana toy izao:
«Hovonoin’ny Tompo ANDRIANANAHARY
tahaka an-dRanona na Ranona anie ianao!»
Ho fanasoavana ny mpanompoko kosa
dia anarana hafa no hotononina aminy.
16Fa izay hifampirary fitahiana eto amin’ity tany ity,
dia hifanao izany ao amin’Andriamanitra hany mahatoky;
izay hianiana eto amin’ity tany ity,
dia hanao izany ao amin’Andriamanitra hany mahatoky.
Lanitra vaovao sy tany vaovao
Hoy kosa ny TOMPO hoe:
Eny, ireo fahoriana taloha dia hohadinoina
sy ho voakosoka tanteraka tsy ho eo imasoko.
17Fa indro Aho mahary habakabaka vaovao sy tany vaovao
ka tsy hotsarovana intsony
ny habakabaka sy tany taloha#65.17 ny habakabaka sy tany taloha: ampit Is 66.22; 2Pt 3.13; Apôk 21.1.
na ho mby ao an-tsaina akory aza.
18Fa mifalia sy miravoravoa hatrany ianareo
ny amin’ny zavatra izay hoarîko:
dia i Jerosalema heni-karavoana
ary ny vahoakany heni-kafaliana.
19Izaho koa hiravo amin’i Jerosalema
sy hifaly amin’ny vahoakako.
Fa tsy ho re ao Jerosalema intsony
na ny tomany na ny kiakiakam-pitarainana#65.19 Ampit Apôk 21.4..
20Tsy hisy ao intsony ny zaza minono
izay ho faty anatin’ny andro vitsivitsy
na ny antitra tsy hahatapitra ny androny;
fa ho maty tanora izay maty zato taona,
ary heverina ho olona voaozona
izay tsy mahatratra zato taona.
21Hanao trano ny vahoakako,
ka hitoerany tokoa izany;
hamboly voaloboka izy
ka hihinana tokoa ny vokany.
22Tsy hanao trano hitoeran’ny hafa intsony izy
na hamboly zavatra hohanin’ny olon-kafa;
fa ho tahaka ny andro hiainan’ny hazo
ny andro hiainan’ny vahoakako,
ary ny olom-boafidiko hanaram-po
amin’ny vokatry ny asa vitany#65.22 hanaram-po... vitany: jereo 62.8-9; Jer 31.5; Ham 9.14..
23Tsy hisasatra foana intsony izy
na hitera-jaza ho fatin’ny loza tampoka;
fa fianakaviana izay notahiko izy,
na ny tenany na ny zanany naterany.
24Mbola tsy miantso akory izy,
dia efa hamaly azy Aho;
ary mbola tsy tapi-miteny izy,
dia efa azoko ny tiany holazaina.
25Hiara-miraoka ahitra ny amboadia sy ny zanak’ondry;
ny liona hihinam-bilona toy ny omby,
ary ny menarana kosa dia vovoka no ho fihinany.
Tsy hisy fanaovan-dratsy intsony, hoy AHO,
na fanimbàn-javatra intsony,
manerana ny tendrombohitro masina#65.25 tendrombohitro masina: jereo 56.7 sy nta. –Momba ny and manontolo dia jereo Is 11.6-9.!
Voafantina amin'izao fotoana izao:
Isaià 65: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.