Isaià 63
63
Ilay mpanosihosy voaloboka mahatahotra
1Iza àry ity tonga avy any Edôma,
avy any Bôtserà renivohiny,
ka manao fitafiana miloko mena?
Izato izy miedinedina amin’akanjo marevaka,
miandranandrana amin’ny haben’ny heriny!
–Izaho izany, hoy ny Tompo,
dia Izaho izay mitory ny fanafahana
sady manan-kery hamonjy#63.1 Edôma: faritra ao atsimon’ny Ranomasina Maty. Ny Edômita dia noheverin’ny Israelita ho fahavalo nentim-paharazana, indrindra taorian’ny faharavàn’i Jerosalema tamin’ny taona 587 tal J.K. (Sal 137.7; Fit 4.21-22; Ezek 25.12; 35.5,12,15; 36.5; Hôb 10-15; jereo koa Is 34.5 sy nta.) –Ny anarana hoe Edôma sy Bôtserà dia milaza loko mena ny voalohany ary fiotazam-boaloboka ny faharoa.!
2–Nahoana no mena ny akanjonao
ary nahoana ny fitafianao
no tahaka ny an’ny mpanosihosy voaloboka
ao amin’ny famiazam-boaloboka?
3–Izaho irery no nanosihosy ny famiazam-boaloboka
fa tsy nisy niaraka tamiko na dia iray aza
ireo olona avy tamin’ny vahoakako.
Nanosihosy hafa firenena tamin’ny fahatezerako Aho
ary nanitsakitsaka azy tamin’ny fahavinirako;
dia nipitipitika tamin’ny fitafiako ny rany
ka voalotoko ny akanjoko rehetra#63.3 nanosihosy: ampit Apôk 14.20; 19.15. –dia nipitipitika... rehetra: ampit Apôk 19.13a..
4Fa efa tao am-poko tao izao andro famaliana izao,
satria tonga ny taona hanavotako ny vahoakako.
5Dia nijerijery olona Aho,
kanefa tsy nisy afaka hanampy Ahy.
Gaga Aho satria tsy nisy nanohana,
koa ny fahefàko ihany no nentiko hamonjy
ary ny fahavinirako no nandrisika Ahy#63.5 Jereo Is 59.16..
6Dia nentanim-pahatezerana Aho
ka nanamontsana ireo hafa firenena;
nataoko boboky ny fahavinirako ireny,
sady napariakako tamin’ny tany ny rany.
Tantaran’ny hatsarampon’ny Tompo
7Hampahatsiaroviko ireo mari-pitiavan’ny TOMPO
sy ireo antony tokony hiderantsika AZY,
araka izay rehetra nataony tamintsika
mbamin’ny soa be nafafiny ho an’ny taranak’Israely.
Famindrampo sy fitiavana tsy hita lany
no nanaovany an’izany ho azy.
8Hoy ny TOMPO ny amin’ny Israelita hoe:
«Tena vahoakako tokoa ianareo,
zanaka tsy handiso fanantenana Ahy.»
Ka dia tonga Mpamonjy azy ireo ny Tompo
9tamin’ny fahoriana rehetra nanjo azy.
Tsy solotena na anjely no namonjy azy
fa ny tenan’ny Tompo mihitsy.
Ny fitiavany sy indrafony no nanavotany azy,
ka nivimbinany azy sy nitondrany azy
nandritra ny androny rehetra fahiny.
10Saingy nikomy tamin’ny Tompo ireo
ka nanome alahelo ny Fanahiny Masina;
dia tonga fahavalon’ireo Izy
sady niady taminy mihitsy.
11Tamin’izay ny vahoakan’Andriamanitra
dia nahatsiaro ny tantarany fahiny,
dia izay tamin’ny andron’i Mosesy#63.11 dia izay...Mosesy: jereo Eks 14.15-23.:
«Nankaiza Ilay nampakatra avy ao amin’ny ony,
Ilay ho mpiandry ny andianondriny?
Nankaiza Ilay nametraka
ny Fanahiny Masina tao aminy?
12Izy no nampandroso ny sandriny mamirapiratra
teo ankavanan’i Mosesy,
ka nampisaraka ny ranomasina
teo anoloan’ny vahoakany
mba hananany laza mandrakizay.
13Izy no nampandeha azy ireo
teo amin’ny fanambanin’ny ranomasina;
toy ny soavaly mikarenjy any an-taniefitra ireo
ka tsy mba solafa-mamindra.
14Toy ny biby fiompy midina an-dohasaha
no nitondran’ny Fanahin’ny TOMPO azy
ho amin’ny toerana fialan-tsasatra.»
Tompo ô, tahaka izany tokoa
no nitarihanao ny vahoakanao
mba hanananao laza mamirapiratra.
Vavaka fangatahana
15Mba mitsinjova avy eny an-danitra, Tompo ô;
avy eo amin’ny fonenanao masina sy mamirapiratra
mba jereo izay manjo anay.
Nankaiza izao ny fitiavanao miredareda
sy ny fahasahianao hiady ary ny fahaizanao mangoraka?
Enga anie ny famindramponao,
tsy ho sakantsakananao hihatra aminay!
16Satria Ianao mihitsy no Rainay,
fa i Abrahama tsy mahalala anay,
ary i Jakôba tsy mahafantatra anay;
eny, TOMPO ô, Ianao no Rainay,
Ianao ilay nantsoina hatrizay hatrizay
amin’ny anaranao hoe «Mpanavotra anay.»
17TOMPO ô, nahoana re izahay
no avelanao haniasia lavitra ny lalanao,
sy hampikiry ny fonay tsy hanaja Anao?
Miverena noho ny fitiavanao ny mpanomponao,
dia izahay foko anjara fanananao.
18Vahoaka natokana ho Anao izahay,
saingy fotoana fohy no nanananay ny tany lovanay;
fa nohitsakitsahin’ny fahavalonay ny Toeramasinao.
19Efa ela izahay no vahoaka tsy nofehezinao
sady tsy niantsoana ny anaranao intsony!
Enga anie hotriarinao ny lanitra mba hidinanao,
ka hihorohoro eo anatrehanao ny tendrombohitra!
Voafantina amin'izao fotoana izao:
Isaià 63: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.